ଗଞ୍ଜାମ ଜିଲ୍ଲାର କବିସୂର୍ଯ୍ୟନଗର ଥାନା ଅନ୍ତର୍ଗତ ଖୋଜାପଲ୍ଲୀ ଗାଁରେ ସୋମବାର ଦିନ ଘଟିଥିବା ଏକ ଅଭାବନୀୟ ଘଟଣା ସମସ୍ତଙ୍କୁ ଅବାକ୍ କରିଦେଇଛି। ବଲ୍ ଭାବି ଖେଳୁଥିବା ବେଳେ ଦୁଇ ନାବାଳକଙ୍କ ହାତରେ ହଠାତ୍ ବୋମା ଫୁଟିଯାଇ ଭୟାବହ ପରିସ୍ଥିତି ସୃଷ୍ଟି ହୋଇଛି। ଏହି ଦୁର୍ଘଟଣାରେ ଦୁଇଜଣେ ନାବାଳକ ଗୁରୁତର ଭାବେ ଆହତ ହୋଇଥିବା ବେଳେ ତାଙ୍କ ମଧ୍ୟରୁ ଜଣଙ୍କ ଅବସ୍ଥା ଅତ୍ୟନ୍ତ ସଙ୍କଟାପନ୍ନ ରହିଛି।

ସୂଚନା ଅନୁସାରେ, ଦୁଇ ନାବାଳକ ଘର ବାରିପଟେ ଖେଳୁଥିବା ସମୟରେ ସେଠାରେ ପଡ଼ିଥିବା ଏକ ସନ୍ଦିଗ୍ଧ ବସ୍ତୁକୁ ବଲ୍ ଭାବି ଧରିଥିଲେ। ଖେଳିବା ସମୟରେ ହଠାତ୍ ସେହି ବସ୍ତୁଟି ବିସ୍ଫୋରଣ ଘଟାଇଥିଲା, ଯାହା ଫଳରେ ଦୁଇଜଣଙ୍କ ହାତ ଓ ଶରୀରରେ ଗୁରୁତର ଚୋଟ ଲାଗିଛି। ଆହତ ଦୁଇଜଣଙ୍କ ବୟସ କ୍ରମେ ୧୪ ବର୍ଷ ଓ ୮ ବର୍ଷ ବୋଲି ଜଣାପଡ଼ିଛି।

ଘଟଣା ପରେ ସ୍ଥାନୀୟ ଲୋକମାନେ ତୁରନ୍ତ ଉଭୟଙ୍କୁ ଉଦ୍ଧାର କରି ବ୍ରହ୍ମପୁର ଏମକେସିଜି ମେଡିକାଲ କଲେଜ ଓ ହସ୍ପିଟାଲରେ ଭର୍ତ୍ତି କରାଇଥିଲେ। ଡାକ୍ତରମାନେ ଦୁଇଜଣଙ୍କ ଅବସ୍ଥା ଉପରେ ନଜର ରଖିଥିବା ବେଳେ ଜଣଙ୍କ ସ୍ଥିତି ଗୁରୁତର ଥିବାରୁ ଚିନ୍ତା ବଢ଼ିଛି।

ଏପର୍ଯ୍ୟନ୍ତ ଏହି ବୋମା କିଏ ଓ କାହିଁକି ସେଠାରେ ରଖିଥିଲା, ସେନେଇ କିଛି ଜଣାପଡ଼ିନଥିବା ବେଳେ ପୁଲିସ ଘଟଣାସ୍ଥଳକୁ ପହଞ୍ଚି ସମ୍ପୂର୍ଣ୍ଣ ତଦନ୍ତ ଆରମ୍ଭ କରିଛି। ଏହି ଘଟଣା ଅଞ୍ଚଳରେ ଭୟ ଓ ଆତଙ୍କର ପରିବେଶ ସୃଷ୍ଟି କରିଥିବା ବେଳେ, ସ୍ଥାନୀୟ ଲୋକମାନେ ସୁରକ୍ଷା ବ୍ୟବସ୍ଥା ବୃଦ୍ଧି ପାଇଁ ଦାବି କରିଛନ୍ତି।

ଅଧିକ ପଢନ୍ତୁ : କୋଚିଂରୁ ଫେରୁଥିବା ବେଳେ ଛାତ୍ରୀଙ୍କୁ ଅପହରଣ, CCTVରେ ଧରାପଡ଼ିଲେ ଦୁର୍ବୃତ୍ତ