ଖବର ଓଡିଶା : 18/03/2023:
ମାଟ୍ରିକ ପ୍ରଶ୍ନପତ୍ରରେ ତ୍ରୁଟି ହୋଇଥିବା ମାନିଛନ୍ତି ବୋର୍ଡ କର୍ତୃପକ୍ଷ । ତେବେ ମୁଦ୍ରଣ ଜନିତ ତ୍ରୁଟି ପାଇଁ କୌଣସି ପରୀକ୍ଷାର୍ଥୀଙ୍କୁ ଆଉ ଥରେ ପରୀକ୍ଷା ଦେବାକୁ ପଡିବ ନାହିଁ । ପ୍ରେସମିଟ୍ କରି ଏହି ସୂଚନା ଦେଇଛନ୍ତି ବୋର୍ଡ ସଭାପତି ଡକ୍ଟର ରାମାଶିଷ ହାଜରା । ଯେଉଁ ଯେଉଁ ପରୀକ୍ଷା କେନ୍ଦ୍ରରୁ ଅଭିଯୋଗ ଆସୁଛି, ତାହାର ଏକ ତାଲିକା ପ୍ରସ୍ତୁତ କରାଯାଉଛି । ମୂଲ୍ୟାୟନ ସମୟରେ ବି ସେଟ ପ୍ରଶ୍ନପତ୍ରର ଉତ୍ତର ଦେଇଥିବା ଛାତ୍ରଙ୍କ ଉତ୍ତରଖାତାକୁ ମୂଲ୍ୟାୟନ ପାଇଁ ସ୍ୱତନ୍ତ୍ର ବ୍ୟବସ୍ଥା ଗ୍ରହଣ କରାଯିବ । ପ୍ରଶ୍ନପତ୍ରରେ ବିଭ୍ରାଟ ଯୋଗୁଁ ପରୀକ୍ଷାର୍ଥୀଙ୍କ ମୂଲ୍ୟାୟନ କିଭଳି ପ୍ରଭାବିତ ହେବ ନାହିଁ, ତା ଉପରେ ଗୁରୁତ୍ୱ ଦିଆଯାଉଥିବା କହିଛନ୍ତି ବୋର୍ଡ କର୍ତୃପକ୍ଷ । ଆଜି ମାଟ୍ରିକ ପରୀକ୍ଷାରେ ହୋଇଥିବା ଇତିହାସ ଓ ରାଜନୀତି ବିଜ୍ଞାନ ପରୀକ୍ଷାରେ ସେଟ ବି ପ୍ରଶ୍ନପତ୍ରରେ ତ୍ରୁଟି ଥିବା ନେଇ ବିଭିନ୍ନ ପରୀକ୍ଷା କେନ୍ଦ୍ରରୁ ଅଭିଯୋଗ ଆସିଛି । ସାମାଜିକ ବିଜ୍ଞାନର ସେଟ ବି ପ୍ରଶ୍ନପତ୍ରରେ ୫୦ଟି ପ୍ରଶ୍ନ ବଦଳରେ ୪୯ଟି ପ୍ରଶ୍ନ ଥିବା କୁହାଯାଉଛି । ପ୍ରଶ୍ନପତ୍ରରୁ ୧୯ ନଂ ପ୍ରଶ୍ନ ସମ୍ପୂର୍ଣ୍ଣ ଗାଏବ ହୋଇ ଯାଇଛି।କିଛି ପରୀକ୍ଷା କେନ୍ଦ୍ରରେ ସେଟ- ବି ର ପ୍ରଶ୍ନପତ୍ରରେ ସେଟ-ଏ- ପ୍ରଶ୍ନ ପଡିଥିବା ମଧ୍ୟ ଅଭିଯୋଗ ହୋଇଛି ।ଫଳରେ ଏହାକୁ ନେଇ ଘୋର ମାନସିକ ଚାପରେ ଥିବା ଛାତ୍ରଛାତ୍ରୀ ମୁଣ୍ଡରେ ହାତ ଦେଇଛନ୍ତି । ଅପରପକ୍ଷେ, ବୋର୍ଡ ନିଜ ତ୍ରୁଟିକୁ ସ୍ୱୀକାର କରିବା ସହ ଏଥିଯୋଗୁ ଛାତ୍ରଛାତ୍ରୀଙ୍କର ଗୋଟିଏ ବି ମାର୍କ କଟିବନି ବୋଲି ପ୍ରତିଶ୍ରୁତି ଦେଇଛି । ସୂଚନା ମୁତାବକ ଜଗତସିଂହପୁର ଜିଲ୍ଲାର ବୃନ୍ଦାବନ ସରକାରୀ ଉଚ୍ଚ ବିଦ୍ୟାଳୟ ସମେତ ଗଜପତି ଜିଲ୍ଲାର ପାରଳାଖେମୁଣ୍ଡିର ସରସ୍ୱତୀ ଶିଶୁ ବିଦ୍ୟାମନ୍ଦିରରେ ବି ଏପରି ଅଭିଯୋଗ ଆସିଛି। ଏହା ବ୍ୟତୀତ ରାଜ୍ୟର ବିଭିନ୍ନ ସ୍କୁଲରେ ବି ସମାନ ସମସ୍ୟା ଉପୁଜିଥିବା ଜଣାଯାଇଛି।