ଜନ୍ମାଷ୍ଟମୀର ପବିତ୍ର ଅବସରରେ ଓଡ଼ିଶାର ଦୁଇ ପ୍ରମୁଖ ସହର କଟକ ଓ ଭୁବନେଶ୍ୱରରେ ପାରମ୍ପରିକ ମାଟି ଅନୁକୂଳ ସହ ଆରମ୍ଭ ହୋଇଛି ଚଳିତ ବର୍ଷର ଶାରଦୀୟ ଦୁର୍ଗାପୂଜା ପ୍ରସ୍ତୁତି। ଶତାବ୍ଦୀ ପୁରୁଣା ପରମ୍ପରାକୁ ଅନୁସରଣ କରି ବିଭିନ୍ନ ପୂଜା କମିଟି ନଦୀତଟରେ ବିଧିବିଧାନରେ ପୂଜାର୍ଚ୍ଚନା କରିବା ପରେ ଦେବୀ ଦୁର୍ଗାଙ୍କ ପ୍ରତିମା ନିର୍ମାଣ ପାଇଁ ପବିତ୍ର ମାଟି ସଂଗ୍ରହ କରିଛନ୍ତି।

କଟକରେ ମହାନଦୀ ତଟରେ ମଙ୍ଗଳାବାଗ ସମେତ ଅନେକ ପୂଜା କମିଟି ପୁରୋହିତଙ୍କ ଦ୍ୱାରା ମନ୍ତ୍ରୋଚ୍ଚାରଣ, ହୋମ ଓ ସ୍ୱସ୍ତିବାଚନ କରାଇବା ପରେ ମାଟି ଅନୁକୂଳ କରିଥିଲେ। ଏହି ରୀତିନୀତିକୁ ଦୁର୍ଗାପୂଜାର ଶୁଭାରମ୍ଭ ବୋଲି ମନେ କରାଯାଏ। ଏହା ପରେ ପ୍ରତିମା ନିର୍ମାଣ ଓ ମଣ୍ଡପ ପ୍ରସ୍ତୁତି କାମ ଜୋରଦାର ହେବ।

ସେହିପରି ଭୁବନେଶ୍ୱରର କୁଆଖାଇ ନଦୀପଠାରେ ମଧ୍ୟ ଉତ୍ସବମୁଖର ପରିବେଶ ଦେଖିବାକୁ ମିଳିଥିଲା। ନୟାପଲ୍ଲୀ, ସହିଦନଗର, ଚନ୍ଦ୍ରଶେଖରପୁର, ସାଲିଆସାହି, ଡୁମୁଡୁମା, ବରମୁଣ୍ଡା ଓ କଳାରାହାଙ୍ଗ ସମେତ ୨୦ରୁ ଅଧିକ ପୂଜା କମିଟି ବିଧିବିଧାନରେ ପୂଜା ସମ୍ପନ୍ନ କରି ମାଟି ସଂଗ୍ରହ କରିଥିଲେ। କମିଟି ସଦସ୍ୟମାନେ ପବିତ୍ର ମାଟିକୁ ଶୋଭାଯାତ୍ରାରେ ନିଜ ନିଜ ପୂଜାମଣ୍ଡପକୁ ନେଇଯାଇଥିଲେ।

ମଙ୍ଗଳାବାଗ ପୂଜା କମିଟିର ସଭାପତି ନୃସିଂହ ଚୌଧୁରୀ କହିଛନ୍ତି, “ଜନ୍ମାଷ୍ଟମୀଠାରୁ ଅଧିକ ଶୁଭ ଦିନ ଆଉ କିଛି ନାହିଁ। ଆମ କମିଟିରେ ୧୮୮୧ ମସିହାରୁ ଏହି ପରମ୍ପରା ଚାଲିଆସୁଛି। ପ୍ରତିବର୍ଷ ଏହି ଦିନ ମାଟି ଅନୁକୂଳ ସହ ଦୁର୍ଗାପୂଜା ପ୍ରସ୍ତୁତିର ଶୁଭାରମ୍ଭ ହୁଏ।”

ମାଟି ଅନୁକୂଳ ସହ ଏବେ ରାଜ୍ୟର ରୂପାନଗରୀ କଟକ ଓ ରାଜଧାନୀ ଭୁବନେଶ୍ୱରରେ ଶାରଦୀୟ ଦୁର୍ଗାପୂଜାର ଉତ୍ସାହ ଆରମ୍ଭ ହୋଇଯାଇଛି। ଆଗାମୀ କିଛି ସପ୍ତାହ ଧରି ପ୍ରତିମା ଗଢ଼ା, ଥିମ୍ ମଣ୍ଡପ ଓ ଆଲୋକ ସଜ୍ଜା କାମ ଜୋରଦାର ହେବ।