କଟକ: ଏଣିକି ଭଗବାନଙ୍କୁ ଛାଡ଼ୁ ନାହାଁନ୍ତି ଲୁଟେରା । ସୁନା ଗହଣା ଚୋରି ପରେ ଏବେ ଠାକୁରଙ୍କୁ ବି ନେଉ ଯାଉଛନ୍ତି । କଟକ ଜିଲ୍ଲା ବାଲିଅନ୍ତା ଅନ୍ତର୍ଗତ ବୁଢ଼ାଲୋ ଗ୍ରାମରୁ ଗ୍ରାମଦେବତୀଙ୍କ ମୂର୍ତ୍ତି ଚୋରି ହୋଇଯାଇଛି । ବିଳମ୍ବିତ ରାତିରେ ମା ବୁଢ଼ୀ ଠାକୁରାଣୀଙ୍କ ପ୍ରତିମା ଚୋରି ହୋଇଥିବାର ଅଭିଯୋଗ ହୋଇଛି । ଯାହାକୁ ନେଇ ଗ୍ରାମରେ ଉତ୍ତେଜନା ପ୍ରକାଶ ପାଇଛି । 

ଗତକାଲି ବିଳମ୍ବିତ ରାତିରେ ମନ୍ଦିରରୁ ମୂର୍ତ୍ତି ଚୋରି ହୋଇଥିବା ଅନୁମାନ କରାଯାଉଛି । ଏ ନେଇ ଗ୍ରାମବାସୀଙ୍କ ପକ୍ଷରୁ ବାଲିଅନ୍ତା ଥାନାରେ ଅଭିଯୋଗ ହୋଇଛି । ସେପଟେ ମୂର୍ତ୍ତିକୁ ନେଇ ପଡ଼ୋଶୀ ଗ୍ରାମ ସହିତ ବୁଢ଼ାଲୋ ଗ୍ରାମର ବିବାଦ ରହିଥିଲା । ଏହି ମାମଲା କୋର୍ଟକୁ ଯାଇଥିଲା । ପୋଲିସ ବିଭିନ୍ନ ଦିଗରୁ ତଦନ୍ତ ଆରମ୍ଭ କରିଛି ।