ବାଙ୍କୀ: ଦିନକୁ ଦିନ ବଢ଼ିବାରେ ଲାଗିଛି ପୁଲିସ ବାବୁଙ୍କ ଦବଙ୍ଗଗିରି। ସାମାନ୍ୟ କଥା କଟାକଟିକୁ ନେଇ ତାତି ଯାଉଛନ୍ତି ପୋଲିସ ବାବୁ। ତେବେ ସେହିପରି କଟକ ଜିଲ୍ଲା ବାଙ୍କୀ ଅଞ୍ଚଳରେ ଦେଖିବାକୁ ମିଳିଛି ଆଉ ଜଣେ ପୁଲିସ ବାବୁଙ୍କ ଦାଦାଗିରି। ଜଣେ ବ୍ୟକ୍ତିଙ୍କୁ ଗୋଇଁଠା ମାରି ରାସ୍ତାଉପରେ ପକାଇ ପିଠି ଉପରେ ଗୋଡ଼ ଦେଇ ନିର୍ଧୂମ ପିଟିଛନ୍ତି ପୋଲିସ ବାବୁ। ଏପରିକି ବ୍ୟକ୍ତିଙ୍କ ପିଠି ଉପରେ ପୁଲିସ ବାବୁ ଗୋଡ଼ ଦେଇ ଚଢ଼ିବା ସମୟରେ ଫଟୋ ସୋସିଆଲ ମିଡିଆରେ ଭାଇରଲ ହେଉଛି। 

ସୂଚନା ଅନୁସାରେ , ବୁଧବାର ରାତିରେ ବାଙ୍କୀ ବୈଦେଶ୍ୱର ଥାନା ନିକଟସ୍ଥ ବ୍ରିଜ ନିକଟରେ ପୋଲିସ ଟିମ୍ ପାଟ୍ରୋଲିଂ କରୁଥିଲେ। ବୈଦେଶ୍ୱର ଥାନା ଅଧିକାରୀ ଘଟଣାସ୍ଥଳରେ ଉପସ୍ଥିତ ଥିଲେ। ଏହି ସମୟରେ ଜଣେ ଅଭିଯୁକ୍ତ ସେହି ରାସ୍ତା ଦେଇ ବାଇକରେ ଯାଉଥିଲେ। ବୈଦେଶ୍ୱର ଥାନାର ପଲିସ କର୍ମଚାରୀ ଅଭିଯୁକ୍ତକୁ ଅଟକାଇଥିଲେ। ପରେ ଅଭିଯୁକ୍ତ ଓ ପୋଲିସ କର୍ମଚାରୀଙ୍କ ମଧ୍ୟରେ ବଚସା ହୋଇଥିଲା। ପୋଲିସ କର୍ମଚାରୀ ରାଗି ଯାଇ ଅଭିଯୁକ୍ତକୁ ନିର୍ଧୂମ ପିଟିବା ସହିତ ତାଙ୍କ ପିଠି ଉପରେ ଚଢ଼ିଯାଇଥିଲେ।