ଭୁବନେଶ୍ୱର: ଶ୍ରୀଜଗନ୍ନାଥ ମହାପ୍ରଭୁଙ୍କ ସ୍ଥାବର ସମ୍ପତ୍ତିର ସୁରକ୍ଷା ଓ ସଠିକ୍ ପରିଚାଳନା ପାଇଁ ଓଡ଼ିଶା ସରକାର ଏକ ବଡ଼ ପଦକ୍ଷେପ ଗ୍ରହଣ କରିଛନ୍ତି। ମହାପ୍ରଭୁଙ୍କ ନାମରେ ଥିବା ସମସ୍ତ ଭୂସମ୍ପତ୍ତିର ସୁରକ୍ଷା, ଜମିଜମା ରେକର୍ଡର ସଂଶୋଧନ ଏବଂ ବେଆଇନ ଦଖଲ ମୁକ୍ତ କରିବା ପାଇଁ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ ପକ୍ଷରୁ ସମସ୍ତ କ୍ଷେତ୍ରାଧିକାରୀଙ୍କୁ କଡ଼ା ନିର୍ଦ୍ଦେଶ ଦିଆଯାଇଛି।

ଏହିପ୍ରସଙ୍ଗରେ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଡ. ଅରବିନ୍ଦ ପାଢ଼ୀ ରାଜସ୍ୱ ପର୍ଷଦ, ସମସ୍ତ ଆରଡିସି (RDC), ଜିଲ୍ଲାପାଳ ଏବଂ ଭୂ-ଅଭିଲେଖ ନିର୍ଦ୍ଦେଶକ (DLRS)ଙ୍କୁ ଏକ ଗୁରୁତ୍ୱପୂର୍ଣ୍ଣ ଚିଠି ଲେଖିଛନ୍ତି। ଏହି କାର୍ଯ୍ୟକୁ ତୁରନ୍ତ ଏବଂ ପ୍ରାଥମିକତା ଭିତ୍ତିରେ ଶେଷ କରିବାକୁ ସେ କହିଛନ୍ତି।

"ମହାପ୍ରଭୁଙ୍କ ସମ୍ପଦର ସୁରକ୍ଷା ଆମର ନୈତିକ ଦାୟିତ୍ଵ"

ରାଜସ୍ୱ ସଚିବ ଡ. ପାଢ଼ୀ ନିଜ ଚିଠିରେ ଉଲ୍ଲେଖ କରିଛନ୍ତି ଯେ, ଶ୍ରୀଜଗନ୍ନାଥ ହେଉଛନ୍ତି ଓଡ଼ିଆ ଜାତିର ସ୍ୱାଭିମାନ ଓ ପରିଚୟ। ତେଣୁ ତାଙ୍କର ସମ୍ପତ୍ତିକୁ ସୁରକ୍ଷିତ ରଖିବା ସମସ୍ତଙ୍କର ସାମୂହିକ ଏବଂ ନୈତିକ କର୍ତ୍ତବ୍ୟ। ଶ୍ରୀଜଗନ୍ନାଥ ମନ୍ଦିର ପ୍ରଶାସନ (SJTA) ର ଅନୁରୋଧ ଓ ମାନ୍ୟବର କୋର୍ଟଙ୍କ ଆଦେଶକୁ ଆଧାର କରି ତୁରନ୍ତ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପ୍ରଶାସନକୁ ନିର୍ଦ୍ଦେଶ ଦିଆଯାଇଛି।

୧୧ ହଜାରରୁ ଅଧିକ ରାଜସ୍ୱ ମାମଲାର ହେବ ଶୀଘ୍ର ଫଇସଲା

ସରକାରଙ୍କ ଏହି ନୂଆ ନିର୍ଦ୍ଦେଶାବଳୀ ଅନୁସାରେ, ରାଜ୍ୟର ପ୍ରମୁଖ ୯ଟି ଜିଲ୍ଲା ଯଥା- ପୁରୀ, ଖୋର୍ଦ୍ଧା, କଟକ, ଜଗତସିଂହପୁର, ବାଲେଶ୍ୱର, ଭଦ୍ରକ, ଯାଜପୁର, ଗଞ୍ଜାମ ଓ କେନ୍ଦ୍ରାପଡ଼ାର ବିଭିନ୍ନ ତହସିଲରେ ଅଟକି ରହିଥିବା ୧୧,୬୭୫ଟି ବିବିଧ ରାଜସ୍ୱ ମାମଲାର ଶୀଘ୍ର ସମାଧାନ କରାଯିବ। ଏହା ସହିତ ଓଡ଼ିଶା ଇଷ୍ଟେଟ୍ସ ଆବୋଲିସନ୍ (OEA) ଆକ୍ଟ ଅଧୀନରେ ଦାଖଲ ହୋଇଥିବା ୨୫୭ଟି ମାମଲାରେ ବୋର୍ଡ ଅଫ୍ ରେଭେନ୍ୟୁଙ୍କ ନିର୍ଦ୍ଦେଶକୁ ତୁରନ୍ତ ଲାଗୁ କରିବାକୁ କୁହାଯାଇଛି।

ପୁରୁଣା ରେକର୍ଡ ଯାଞ୍ଚ କରି ପ୍ରସ୍ତୁତ ହେବ ସଠିକ୍ 'ROR'

ମହାପ୍ରଭୁଙ୍କ ଜମିର ମାଲିକାନାକୁ ସ୍ପଷ୍ଟ କରିବା ପାଇଁ ପ୍ରଶାସନ ପକ୍ଷରୁ ବ୍ୟାପକ ସ୍କ୍ରୁଟିନି କରାଯିବ। ୧୮୮୮-୮୯ ମସିହାରୁ ଆରମ୍ଭ କରି ୧୯୨୭-୨୮ ଏବଂ ୧୯୭୭-୭୮ ମସିହା ପର୍ଯ୍ୟନ୍ତ ସମସ୍ତ ପୁରୁଣା ସାବିକ ରାଜସ୍ୱ ଅଭିଲେଖ ଓ ରେକର୍ଡ ଅଫ୍ ରାଇଟ୍ସ (ROR) ଯାଞ୍ଚ କରାଯିବ।  ସାବିକ-ହାଲ୍ ସମନ୍ୱୟ ରିପୋର୍ଟର ସହି ପ୍ରମାଣିତ ନକଲ ଯଥାଶୀଘ୍ର ଶ୍ରୀମନ୍ଦିର ପ୍ରଶାସନ (SJTA) କୁ ହସ୍ତାନ୍ତର କରାଯିବ, ଯାହା ଦ୍ୱାରା କୋର୍ଟରେ ମାମଲା ପରିଚାଳନା ସହଜ ହେବ।

ଜାଲିଆତି ଓ ବେଆଇନ ଦଖଲ ଉପରେ ରହିବ ନଜର

ଜମି ମାଫିଆ ଏବଂ ଜାଲିଆତି କରୁଥିବା ଲୋକଙ୍କ ଉପରେ ରୋକ୍ ଲଗାଇବା ପାଇଁ ରାଜସ୍ୱ ନିରୀକ୍ଷକ (RI) ଓ ଅମିନମାନଙ୍କୁ କ୍ଷେତ୍ର ସ୍ତରରେ ନିୟୋଜିତ କରାଯିବ। ସେମାନେ ନିୟମିତ ଭାବେ ଜମି ପରିଦର୍ଶନ କରି ବେଆଇନ କାର୍ଯ୍ୟକଳାପ ଉପରେ ନଜର ରଖିବେ। ଏହି ସମଗ୍ର ପ୍ରକ୍ରିୟାର ଅଗ୍ରଗତି ନେଇ ଜିଲ୍ଲା ଓ ତହସିଲ ସ୍ତରରେ ପ୍ରତି ମାସରେ ବୈଠକ କରାଯାଇ ସମୀକ୍ଷା କରାଯିବ ଏବଂ ଏହାର ମାସିକ ରିପୋର୍ଟ ସିଧାସଳଖ ରାଜସ୍ୱ ବିଭାଗକୁ ପଠାଯିବ ବୋଲି ସରକାର ସ୍ପଷ୍ଟ କରିଛନ୍ତି।