ଭୁବନେଶ୍ୱର: ରାଜ୍ୟରେ ବିଦ୍ୟୁତ୍ ଭିତ୍ତିଭୂମିକୁ ଅଧିକ ମଜବୁତ କରିବା ସହ ସମସ୍ତ ଗ୍ରାହକଙ୍କୁ ନିରବଚ୍ଛିନ୍ନ ଏବଂ ଉନ୍ନତମାନର ବିଦ୍ୟୁତ୍ ସେବା ଯୋଗାଇଦେବାକୁ ରାଜ୍ୟ ସରକାର ଗୁରୁତ୍ୱ ଦେଇଛନ୍ତି। ଏନେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଗୁରୁବାର ଲୋକସେବା ଭବନରେ ଶକ୍ତି ବିଭାଗର ବିଭିନ୍ନ କାର୍ଯ୍ୟକ୍ରମ ଏବଂ ଆଗାମୀ ଦିନର ପ୍ରସ୍ତାବିତ ଯୋଜନାଗୁଡ଼ିକର ଏକ ଉଚ୍ଚସ୍ତରୀୟ ସମୀକ୍ଷା କରିଛନ୍ତି।

ଦୁଇ ବର୍ଷରେ ୧୫ଟି ନୂଆ ଗ୍ରୀଡ୍ ସବଷ୍ଟେସନ୍ ସ୍ଥାପନ

ସମୀକ୍ଷା ବୈଠକରୁ ମିଳିଥିବା ସୂଚନା ଅନୁଯାୟୀ, ଗତ ଦୁଇ ବର୍ଷ ଭେତରେ ରାଜ୍ୟରେ ମୋଟ ୧୫ଟି ନୂଆ ଗ୍ରୀଡ୍ ସବଷ୍ଟେସନ୍ କାର୍ଯ୍ୟକ୍ଷମ ହୋଇପାରିଛି। ଏହା ସହିତ ସାଢ଼େ ସାତ ଶହରୁ ଅଧିକ ସର୍କିଟ୍ କିଲୋମିଟର ଟ୍ରାନ୍ସମିସନ୍ ଲାଇନ୍ ବିଛାଯାଇଛି। ବର୍ତ୍ତମାନ ସୁଦ୍ଧା ଓଡ଼ିଶାରେ ମୋଟ ୨୧୦ଟି ଗ୍ରୀଡ୍ ସବଷ୍ଟେସନ୍ ସଫଳତାର ସହ କାମ କରୁଛି।

ଆଗାମୀ ୨୦୩୦ ମସିହା ସୁଦ୍ଧା ରାଜ୍ୟର ପ୍ରତ୍ୟେକ କୋଣଅନୁକୋଣରେ ଗୁଣାତ୍ମକ ବିଜୁଳି ପହଞ୍ଚାଇବାକୁ ମୁଖ୍ୟମନ୍ତ୍ରୀ କଡ଼ା ନିର୍ଦ୍ଦେଶ ଦେଇଛନ୍ତି। ଦ୍ରୁତ ଶିଳ୍ପାୟନ ଏବଂ ସାଧାରଣ ଲୋକଙ୍କ ଆବଶ୍ୟକତାକୁ ଦୃଷ୍ଟିରେ ରଖି ୭୬୫ କେଭି ଗ୍ରୀଡ୍‌ର ଏକ ସ୍ୱତନ୍ତ୍ର ରିଙ୍ଗ୍ ସିଷ୍ଟମ୍ ନିର୍ମାଣ କରାଯାଉଛି।

ନୂତନ ପ୍ରକଳ୍ପ ଏବଂ ରିଙ୍ଗ୍ ସିଷ୍ଟମ୍ ଯୋଜନା

ଏହି ବୃହତ୍ ରିଙ୍ଗ୍ ସିଷ୍ଟମ୍‌ର ଅଂଶବିଶେଷ ଭାବେ ଅନୁଗୋଳ ଏବଂ ସୁନ୍ଦରଗଡ଼ରେ ପୂର୍ବରୁ ଦୁଇଟି ୭୬୫/୪୦୦ କେଭି ଗ୍ରୀଡ୍ ଷ୍ଟେସନ୍ କାର୍ଯ୍ୟ କରୁଥିବା ବେଳେ ବର୍ତ୍ତମାନ ଗୋପାଳପୁର ଏବଂ ପାରାଦୀପରେ ଆଉ ଦୁଇଟି ସମାନ କ୍ଷମତାର ଗ୍ରୀଡ୍ ନିର୍ମାଣାଧୀନ ରହିଛି। ଏହାଛଡ଼ା କୋଲାବିରା, ଡୁବୁରି ଏବଂ ଆଠଗଡ଼ ନିକଟସ୍ଥ ବେତଖୋଲିରେ ଆହୁରି ତିନୋଟି ନୂତନ ୭୬୫/୪୦୦ କେଭି ସବଷ୍ଟେସନ୍‌ ସ୍ଥାପନ କରିବା ପାଇଁ ବ୍ଲୁ-ପ୍ରିଣ୍ଟ୍ ପ୍ରସ୍ତୁତ ହୋଇଛି।

ବର୍ତ୍ତମାନ ରାଜ୍ୟରେ ୫ଟି ୪୦୦ କେଭି ଗ୍ରୀଡ୍ ସବଷ୍ଟେସନ୍ ଚାଲୁଥିବା ବେଳେ ଅନ୍ୟ ୪ଟିର ନିର୍ମାଣ କାମ ଜାରି ରହିଛି ଏବଂ ଆଉ ଦୁଇଟି ଟେଣ୍ଡର ପ୍ରକ୍ରିୟାରେ ଅଛି। ଭବିଷ୍ୟତର ଆବଶ୍ୟକତାକୁ ଆଖିଆଗରେ ରଖି ଆହୁରି ୯ଟି ନୂଆ ୪୦୦ କେଭି ଗ୍ରୀଡ୍ ସବଷ୍ଟେସନ୍ ତିଆରି କରିବାକୁ ଯୋଜନା ରହିଛି।

୧୬ ହଜାର କୋଟିର ବୃହତ୍ ଶକ୍ତି ପ୍ରକଳ୍ପ

ଆଗାମୀ ୨୦୩୦-୩୧ ସୁଦ୍ଧା ଓଡ଼ିଶାରେ ପ୍ରାୟ ୫୯୦ଟି ନୂତନ ଶିଳ୍ପ ପ୍ରକଳ୍ପ ଆସିବାର ସମ୍ଭାବନା ରହିଛି। ଏହି ସମସ୍ତ ଶିଳ୍ପ ସଂସ୍ଥା ଏବଂ ସାଧାରଣ ଉପଭୋକ୍ତାଙ୍କୁ ନିରବଚ୍ଛିନ୍ନ ବିଜୁଳି ଯୋଗାଇବା ପାଇଁ ସରକାର ବଡ଼ଧରଣର ପଦକ୍ଷେପ ନେଇଛନ୍ତି। ଏଥିପାଇଁ ରାଜ୍ୟରେ ପ୍ରାୟ ୧୬ ହଜାର କୋଟି ଟଙ୍କା ବ୍ୟୟରେ ବିଭିନ୍ନ ଶକ୍ତି ପ୍ରକଳ୍ପ କାର୍ଯ୍ୟକାରୀ କରାଯିବ, ଯାହା ରାଜ୍ୟର ଶିଳ୍ପ ଓ ଆର୍ଥିକ ବିକାଶକୁ ଆହୁରି ଦ୍ରୁତଗତି ପ୍ରଦାନ କରିବ।

ଏହି ସମୀକ୍ଷା ବୈଠକରେ ଉପମୁଖ୍ୟମନ୍ତ୍ରୀ ତଥା ଶକ୍ତିମନ୍ତ୍ରୀ କନକ ବର୍ଦ୍ଧନ ସିଂଦେଓଙ୍କ ସମେତ ଉନ୍ନୟନ କମିଶନର, ମୁଖ୍ୟମନ୍ତ୍ରୀଙ୍କ ଅତିରିକ୍ତ ମୁଖ୍ୟ ଶାସନ ସଚିବ, ଶକ୍ତି ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ, ଓପ୍‌ଟକେଲ୍ (OPTCL) ର ସିଏମଡି ଏବଂ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।