କୋଲକାତା: ପଶ୍ଚିମବଙ୍ଗର ରାଜଧାନୀ କୋଲକାତାରୁ ଏକ ମର୍ମନ୍ତୁଦ ତଥା ରହସ୍ୟଜନକ ଘଟଣା ସାମ୍ନାକୁ ଆସିଛି। ସହରର ପ୍ରସିଦ୍ଧ ଏନ୍‌ଆରଏସ୍‌ ମେଡିକାଲ କଲେଜ ଏବଂ ହସ୍ପିଟାଲ୍ ପରିସରରୁ ଜଣେ କର୍ମରତ ନର୍ସଙ୍କ ମୃତଦେହ ଉଦ୍ଧାର କରାଯାଇଛି। ହସ୍ପିଟାଲର ଏକ ଶୌଚାଳୟ ଭିତରୁ ମୃତଦେହ ମିଳିବା ପରେ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି।

ପ୍ରାଥମିକ ସୂଚନା ଅନୁଯାୟୀ, ମୃତ ନର୍ସ ଜଣକ ହସ୍ପିଟାଲରେ ଡ୍ୟୁଟିରେ ଥିଲେ। କିଛି ସମୟ ପାଇଁ ସେ ନିଜ କାର୍ଯ୍ୟସ୍ଥଳରୁ ଅନୁପସ୍ଥିତ ରହିବାରୁ ସହକର୍ମୀମାନେ ତାଙ୍କୁ ଖୋଜାଖୋଜି କରିଥିଲେ। ପରେ ହସ୍ପିଟାଲର ଏକ ଶୌଚାଳୟର କବାଟ ଭିତରୁ ବନ୍ଦ ରହିଥିବା ଦେଖି ସନ୍ଦେହ ହୋଇଥିଲା। କବାଟ ଭାଙ୍ଗି ଭିତରକୁ ପ୍ରବେଶ କରିବା ପରେ ନର୍ସଙ୍କୁ ଅଚେତ ଅବସ୍ଥାରେ ପଡ଼ିଥିବା ଦେଖିବାକୁ ମିଳିଥିଲା। ତୁରନ୍ତ ତାଙ୍କୁ ଉଦ୍ଧାର କରାଯାଇ ଚିକିତ୍ସା କେନ୍ଦ୍ରକୁ ନିଆଯାଇଥିଲେି ମଧ୍ୟ ସେତେବେଳକୁ ତାଙ୍କର ମୃତ୍ୟୁ ହୋଇସାରିଥିଲା ବୋଲି ଡାକ୍ତର କହିଥିଲେ।

ପୋଲିସ ତଦନ୍ତ ଏବଂ ହସ୍ପିଟାଲରେ ଉତ୍ତେଜନା

ଘଟଣା ସମ୍ପର୍କରେ ଖବର ପାଇବା ମାତ୍ରେ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ମୃତ୍ୟୁର ପ୍ରକୃତ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଏହା ଏକ ଆତ୍ମହତ୍ୟା ନା ଏହା ପଛରେ କୌଣସି ବଡ଼ ଷଡ଼ଯନ୍ତ୍ର ଅଛି, ସେ ନେଇ ପୋଲିସ ତଦନ୍ତ ଜାରି ରଖିଛି।

ପୂର୍ବରୁ କୋଲକାତାର ଆରଜି କର ହସ୍ପିଟାଲ୍ ଘଟଣାକୁ ନେଇ ସାରା ଦେଶରେ ପ୍ରତିବାଦ ଜାଗ୍ରତ ହୋଇଥିବାବେଳେ, ବର୍ତ୍ତମାନ ଏନ୍‌ଆରଏସ୍‌ ହସ୍ପିଟାଲରେ ଏଭଳି ଏକ ଅଘଟଣ ଘଟିବା ସ୍ୱାସ୍ଥ୍ୟକର୍ମୀ ଏବଂ ସାଧାରଣ ଜନତାଙ୍କ ମଧ୍ୟରେ ଭୟ ଓ ଉତ୍ତେଜନା ସୃଷ୍ଟି କରିଛି। ହସ୍ପିଟାଲ କର୍ତ୍ତୃପକ୍ଷ ଏବଂ ପୋଲିସ ମିଳିତ ଭାବେ ସିସିଟିଭି ଫୁଟେଜ୍ ଯାଞ୍ଚ କରୁଛନ୍ତି।