ଭୁବନେଶ୍ୱର : ଇନ୍‌ଷ୍ଟିଚ୍ୟୁଟ୍ ଅଫ ମେଡିକାଲ୍ ସାଇନ୍ସ ଆଣ୍ଡ ସମ୍ ହସ୍ପିଟାଲ୍‌ରେ ଗତ ଅକ୍ଟୋବର ୨୭ ତାରିଖ ଦିନ ଆୟୋଜିତ ପେଡିଆଟ୍ରିକ ଋୟୁମଟୋଲୋଜି ଉପରେ ୩-ଦିନିଆ ୨୨ତମ ଜାତୀୟ ସମ୍ମିଳନୀ ଉଦ୍‌ଯାପିତ ହୋଇଯାଇଛି। ଏହି ସମ୍ମିଳନୀରେ ସାରା ଦେଶରୁ ପ୍ରାୟ ୩୦୦ ଜଣ ପ୍ରତିନିଧି ଯୋଗ ଦେଇଥିଲେ। ଶିଶୁମାନଙ୍କ କ୍ଷେତ୍ରରେ ଋୟୁମଟୋଲୋଜି ଏବଂ ଇମ୍ୟୁନୋଲୋଜିକୁ ନେଇ ଉପୁଜୁଥିବା ସମସ୍ୟା ସମ୍ପର୍କରେ ସଚେତନତା ସୃଷ୍ଟି କରିବା ହିଁ ଏହି ସମ୍ମିଳନୀର ମୁଖ୍ୟ ଉଦ୍ଦେଶ୍ୟ ଥିଲା। 

ଏହି ସମ୍ମିଳନୀରେ ଜର୍ମାନୀର ଦୁଇ ଜଣ ବିଶେଷଜ୍ଞ ଡାକ୍ତର ଡିର୍କ ଫୋଏଲ୍ ଏବଂ ଡାକ୍ତର ଏନ୍‌. ଧନ୍ୟଲକ୍ଷ୍ମୀ ଯୋଗ ଦେଇ ଅଟୋ ଇନ୍‌ଫ୍ଲାମେଟୋରୀ  ରୋଗ ଓ ଜେନେଟିକ୍ସ ସମ୍ପର୍କରେ ସେମାନଙ୍କର ଅନୁଭୂତି ବଖାଣିଥିଲେ। ଏପରିକି ମଧୁମେହ ରୋଗ ବିଶେଷଞ୍ଜ ଡାକ୍ତର ସ୍ୱୟଂସିଦ୍ଧ ମଙ୍ଗରାଜ ଏବଂ ଡାକ୍ତର ମନୋରଞ୍ଜନ ତ୍ରିପାଠୀ ପେଡିଆଟ୍ରିକ୍ ଅଷ୍ଟୋପୋରୋସିସ୍ ସମ୍ପର୍କରେ ବକ୍ତବ୍ୟ ରଖିଥିଲେ। ଏହି ଉଦ୍‌ଘାଟନୀ କାର୍ଯ୍ୟକ୍ରମରେ ଆଇଏମ୍‌ଏସ୍ ଆଣ୍ଡ ସମ୍ ହସ୍ପିଟାଲ୍‌ର ଡିନ୍ ପ୍ରଫେସର (ଡାକ୍ତର) ସଂଘମିତ୍ରା ମିଶ୍ର, ମେଡିକାଲ୍ ସୁପରିଟେଣ୍ଡେଂଟ ପ୍ରଫେସର (ଡାକ୍ତର) ପୁଷ୍ପରାଜ ସାମନ୍ତସିଂହାର, ଶିଶୁରୋଗ ବିଭାଗର ମୁଖ୍ୟ ପ୍ରଫେସର (ଡାକ୍ତର) ମମତା ଦେବୀ ମହାନ୍ତି ଏବଂ ପାଠ୍ୟକ୍ରମ ନିର୍ଦ୍ଦେଶକ ପ୍ରଫେସର (ଡାକ୍ତର) ମୃତ୍ୟୁଞ୍ଜୟ ଦାଶ ଯୋଗ ଦେଇଥିଲେ। 

ପ୍ରାୟ ୧୫୦ ଜଣ ଛାତ୍ରଛାତ୍ରୀ ଏହି ସମ୍ମିଳନୀରେ ପେଡିଆଟ୍ରିକ୍ ର‌୍ୟୁମାଟୋଲୋଜି ଏବଂ ଇମ୍ୟୁନୋଲୋଜି ସମ୍ପର୍କିତ ଗବେଷଣା ସନ୍ଦର୍ଭ ଉପସ୍ଥାପନ କରିଥିବା ବେଳେ ସମ୍ମିଳନୀରେ ପୋଷ୍ଟ ଗ୍ରାଜୁଏଟ୍ ଏବଂ ସୁପରସ୍ପେଶିଆଲିଟି ଛାତ୍ରଛାତ୍ରୀଙ୍କ ନିମନ୍ତେ ଏକ କୁଇଜ ପ୍ରତିଯୋଗିତା ଆୟୋଜନ କରାଯାଇଥିଲା। ଏହି ସମ୍ମିଳନୀକୁ ପ୍ରଫେସର (ଡାକ୍ତର) ପ୍ରଶାନ୍ତ କୁମାର ସାବତ, ପ୍ରଫେସର (ଡାକ୍ତର) ବିକ୍ରାନ୍ତ କୁମାର ପୃଷ୍ଟି, ଆସୋସିଏଟ୍ ପ୍ରଫେସର ଡାକ୍ତର ବ୍ରଜକିଶୋର ବେହେରା, ଡାକ୍ତର ବିଭୁଦତ ଦାଶ ଏବଂ ଆସିଷ୍ଟାଂଟ ପ୍ରଫେସର (ଡାକ୍ତର) ନିତୀଶ ଜେନା, ଡାକ୍ତର ଚନ୍ଦ୍ରଶେଖର ପାତ୍ର ଆୟୋଜନ କରିଥିଲେ ।