କୋଲକାତା ହୋଟେଲ ଅଗ୍ନିକାଣ୍ଡରେ ୪ ଜଣ ଓଡ଼ିଆଙ୍କ ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ଅଛନ୍ତି ଜଗତସିଂହପୁର ଜିଲ୍ଲାର ମନୋଜ ପାତ୍ର, ଦୁଷ୍ମନ୍ତ କୁମାର ନାୟକ ଏବଂ ଦୁଷ୍ମନ୍ତ କୁମାର ସ୍ବାଇଁ। ଏମାନେ ଭୁବନେଶ୍ବରରେ ଏକ ଘରୋଇ ଫାଇନାନ୍ସ କଂପାନୀରେ କାମ କରୁଥିବାବେଳେ କୋଲକତା କଂପାନୀ କାମରେ ଯାଇଥିଲେ। ସେହିଭଳି କଟକ ସିଡିଏ ଅଂଚଳର ଜଣେ ବ୍ୟବସାୟୀ ରାଜେଶ ସାନ୍ତୁକାଙ୍କର ବି ଏହି ଅଗ୍ନିକାଣ୍ଡରେ ମୃତ୍ୟୁ ହୋଇଛି। 

ଗତକାଲି ସନ୍ଧ୍ୟାରେ ବଡ଼ ବଜାର ଅଞ୍ଚଳର ମେଚୁଆ ଫଳ ପଟ୍ଟି ଅଞ୍ଚଳରେ ଥିବା ଋତୁରାଜ ହୋଟେଲରେ ଅଗ୍ନିକାଣ୍ଡ ଘଟି ୧୪ ଜଣଙ୍କର ମୃତ୍ୟୁ ଘଟିଛି। ଗତକାଲି ରାତି ୮.୧୫ ସମୟରେ କୋଲକାତାର ସବୁଠାରୁ ବ୍ୟସ୍ତବହୁଳ ଅଞ୍ଚଳ ମଛୁଆ ଫାଲ ପଟ୍ଟିର ଏକ ରେଷ୍ଟୁରାଣ୍ଟରେ ଏହି ଘଟଣା ଘଟିଥିଲା। ନିଆଁ ଲାଗିବା ମାତ୍ରେ ରେଷ୍ଟୁରାଣ୍ଟ ଭିତରେ ହଇଚଇ ସୃଷ୍ଟି ହୋଇଥିଲା। ତୁରନ୍ତ ଅଗ୍ନିଶମ ବାହିନୀକୁ ଖବର ଦିଆଯାଇଥିଲା କିନ୍ତୁ ରାସ୍ତା ସଂକୀର୍ଣ୍ଣ ହୋଇଥିବାରୁ ଅଗ୍ନିଶମ ବାହିନୀ ଟିମକୁ ଘଟଣାସ୍ଥଳରେ ପହଞ୍ଚିବାକୁ କଠିନ ପରିଶ୍ରମ କରିବାକୁ ପଡିଥିଲା।

ଦୁର୍ଘଟଣା ସମୟରେ ଧୂଆଁ ଯୋଗୁଁ ଅନେକ ଲୋକ ଭିତରେ ଫସି ରହିଥିଲେ ଏବଂ କିଛି ଲୋକ ଜୀବନ ବଞ୍ଚାଇବା ପାଇଁ ଉପର ମହଲା ଆଡ଼କୁ ଦୌଡ଼ିଥିଲେ କିନ୍ତୁ ସେଠାରୁ ବାହାରକୁ ଆସିବାରେ ମଧ୍ୟ ବହୁତ ଅସୁବିଧା ହୋଇଥିଲା।ରେଷ୍ଟୁରାଣ୍ଟର ଜଣେ କର୍ମଚାରୀ ନିଜ ଜୀବନ ବଞ୍ଚାଇବା ପାଇଁ ଉପରରୁ ଡେଇଁ ପଡ଼ି ମୃତ୍ୟୁବରଣ କରିଥିଲେ। ଭିତରକୁ ପ୍ରବେଶ କରିବା ପାଇଁ ଅଗ୍ନିଶମ ବାହିନୀକୁ କାନ୍ଥ ଭାଙ୍ଗିବାକୁ ପଡିଲା। ଦୁର୍ଘଟଣାରେ ୧୪ ଜଣଙ୍କ ମୃତଦେହ ଉଦ୍ଧାର କରାଯାଇଥିବା ବେଳେ ପ୍ରାୟ ପଚାଶ ଜଣଙ୍କୁ ଉଦ୍ଧାର କରାଯାଇଛି।