କାମାକ୍ଷାନଗର: ଢେଙ୍କାନାଳ ଜିଲ୍ଲା କଙ୍କଡ଼ାହାଡ଼- କାମାକ୍ଷାନଗର ପୂର୍ତ୍ତ ବିଭାଗ ରାସ୍ତାର ଶକ୍ତିନଗର ଗାଁ ନିକଟରେ ଭୟଙ୍କର ସଡ଼କ ଦୁର୍ଘଟଣା ହୋଇଛି । ଦୁର୍ଘଟଣାରେ ଶଳା ଓ ଭିଣୋଇଙ୍କର ମୃତ୍ୟୁ ହୋଇଛି । ମୃତ ଶଳା ଜଣଙ୍କ ହେଲେ କଙ୍କଡ଼ାହାଡ଼ ଥାନା ଡ଼ଙ୍ଗାପାଳ ଗାଁର ରଞ୍ଜନ ନାୟକ ଏବଂ ଭିଣୋଇ ହେଲେ କୁସୁମୁଣ୍ଡିଆ ଗାଁର ମଣ୍ଟୁ ନାୟକ । 

ରଞ୍ଜନ ନାୟକ ଏବଂ ମଣ୍ଟୁ ନାୟକ ଉଭୟେ ଏକ ବାଇକ ଯୋଗେ କାମାକ୍ଷାନଗର ଆଡୁ ନିଜ ଘରକୁ ଫେରୁଥିଲେ । ଦଣ୍ଡାଧରରୁ ସାପ୍ତାହିକ ହାଟ ସାରି ଫେରୁଥିବା ଏକ ପିକଅପ ଗାଡି ଶକ୍ତିନଗର ଗାଁ ନିକରେ ସେମାନଙ୍କ ବାଇକୁ ମୁହାଁ ମୁହିଁ ଧକ୍କା ଦେଇଥିଲା । ଫଳରେ ଘଟଣା ସ୍ଥଳରେ ହିଁ ଉଭୟଙ୍କର ପ୍ରାଣ ବାୟୁ ଉଡ଼ିଯାଇଥିଲା । ଦୁର୍ଘଟଣା ଘଟାଇବା ପରେ ପିକଅପ ଗାଡି ଡ୍ରାଇଭର ଚମ୍ପଟ ମାରିଛି । ଖବର ପାଇ କଙ୍କଡ଼ାହାଡ଼ ପୋଲିସ ଘଟଣା ସ୍ଥଳରେ ପହଞ୍ଚି ଗାଡି ଗୁଡିକୁ ଜବତ କରିବା ସହ ମୃତ ଦେହକୁ ଉଦ୍ଧାର କରି ଅଧିକ ତଦନ୍ତ ଜାରି ରଖିଛି ।