ବଲାଙ୍ଗିର: ବଲାଙ୍ଗିର ପୁଲିସକୁ ମିଳିଛି ବଡ଼ ସଫଳତା । ଦୁଇ ଦୁଇଟି ପୃଥକ ଅପରାଧିକ ମାମଲାରେ ୫ ଜଣ ଅପରାଧୀଙ୍କୁ ଗିରଫ କରିଛି ପୁଲିସ । ସେମାନେ ହେଲେ ରାଜୀବନଗରର ଚିଙ୍କୁ ବେହେରା ଓ ପିଣ୍ଟୁ ମାଝୀ, ତୁଳସୀ ନଗରର ମନୋଜ ଖଟାର, ରାଧାରାଣୀ ପଡାର ଭାଗିରଥୀ ଠେଲା ଏବଂ ସଦର ଥାନା ଅର୍ନ୍ତଗତ ଶିକାଛିଡା ଗ୍ରାମର ବ୍ୟାସଦେବ ମଲ୍ଲିକ । ସେମାନଙ୍କ ଠାରୁ ୩ ଟି ବାଇକ, ୩ ଟି ମୋବାଇଲ ଫୋନ, ନଗଦ ୧୭ ହଜାର ଟଙ୍କା, ଗୋଟିଏ ଏଟିଏମ କାର୍ଡ ଜବତ କରାଯାଇଛି ।  ଏ ନେଇ ଟାଉନ ଥାନାରେ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ସଦର ଏସଡିପିଓ ପ୍ରଦୀପ ସାହୁ ।

ଗତବର୍ଷ ଏପ୍ରିଲ ମାସରେ ଖୁଜେନପାଲି ନିକଟରେ କିଛି ଦୁବୃର୍ତ୍ତ ଜଣେ ବ୍ୟକ୍ତିଙ୍କୁ ଅଟକାଇ, ମାରଣାସ୍ତ୍ର ଦେଖାଇ ତାଙ୍କ ଠାରୁ ମୋବାଇଲ ଓ ନଗଦ ୩୫୦୦ ଟଙ୍କା ଲୁଟି ନେଇଥିଲେ । ବ୍ୟକ୍ତି ଜଣକ ଏ ନେଇ ସଦର ଥାନାରେ ଅଭିଯୋଗ କରିଥିଲେ । ସେହିଭଳି ଗତ ଜାନୁୟାରୀ ୯ ତାରିଖ ଦିନ ଜଣେ ରେଳ କର୍ମଚାରୀଙ୍କୁ ଧମକଚମକ ଦେଇ ୮୦ ହଜାର ଟଙ୍କା ନେଇଯାଇଥିଲେ । ତଦନ୍ତ ସମୟରେ ଏହି ଦୁଇ ଅପରାଧ ପଛରେ ଚିଙ୍କୁ ବେହେରା, ପିଣ୍ଟୁ ମାଝୀ ଓ ମନୋଜ ଖଟାର ରହିଥିବା ପୁଲିସ ଜାଣିବାକୁ ପାଇଥିଲା । ତେବେ ଗତକାଲି ସେମାନଙ୍କୁ ଗିରଫ କରିବାରେ ସଫଳ ହୋଇଛି । 

ସେହିଭଳି ଭୀମଭୋଇ ମେଡିକାଲ କଲେଜ ହସ୍ପିଟାଲରୁ ବାଇକ ଚୋରୀ କରୁଥିବା ଦୁଇଜଣ ଚୋରଙ୍କୁ ଗିରଫ କରିଛି ଟାଉନ ପୁଲିସ । ଭାଗିରଥୀ ଠେଲା ଓ ବ୍ୟାସଦେବ ମଲ୍ଲିକ ମୋଟର ସାଇକେଲ ଚୋରୀ କରୁଥିବା ସମୟରେ ସେଠାକାର ସୁରକ୍ଷା କର୍ମୀ ଓ ପୁଲିସ କର୍ମଚାରୀ ମାନେ ଧରିଥିଲେ । ୫ ଜଣ ଅପରାଧିଙ୍କ ସ୍ୱାସ୍ଥ୍ୟ ପରୀକ୍ଷା କରିବା ପରେ ତାଙ୍କୁ କୋର୍ଟଚାଲାଣ କରାଯାଇଥିବା ନେଇ କହିଛନ୍ତି ଏସଡିପିଓ ।