ନ୍ୟୁଚଣ୍ଡିଗଡ: ଇଣ୍ଡିଆନ୍ ପ୍ରିମିୟର ଲିଗ୍ (IPL)ର ୧୯ତମ ସଂସ୍କରଣ ଏବେ ରୋମାଞ୍ଚକର ମୋଡ଼ରେ ପହଞ୍ଚିଛି। ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (RCB) ପ୍ରଥମ ଦଳ ଭାବେ ଫାଇନାଲ୍‌ରେ ପ୍ରବେଶ କରିସାରିଥିବା ବେଳେ ଦ୍ୱିତୀୟ ସ୍ଥାନ ପାଇଁ ଏବେ ୩ଟି ଦଳ ମଧ୍ୟରେ କଡ଼ା ଟକ୍କର ଚାଲିଛି। ଆଜି ଅନୁଷ୍ଠିତ ହେବାକୁ ଥିବା ହାଇଭୋଲ୍ଟେଜ୍ ଏଲିମିନେଟର ମ୍ୟାଚ୍‌ରେ ସନରାଇଜର୍ସ ହାଇଦ୍ରାବାଦ (SRH) ଏବଂ ରାଜସ୍ଥାନ ରୟାଲ୍ସ (RR) ପରସ୍ପରକୁ ଭେଟିବେ। ଏହି ମ୍ୟାଚ୍‌ରେ ଯେଉଁ ଦଳ ଜିତିବ ସେ ଟ୍ରଫି ଆଡ଼କୁ ଆଉ ଏକ ପାଦ ଆଗେଇବ ଏବଂ ହାରିବା ଦଳର ଆଇପିଏଲ୍ ଅଭିଯାନ ଏହିଠାରେ ହିଁ ଶେଷ ହେବ।

ମୁହାଁମୁହିଁ ଲଢ଼େଇରେ ହାଇଦ୍ରାବାଦ ଆଗରେ

ସନରାଇଜର୍ସ ହାଇଦ୍ରାବାଦ ଏବଂ ରାଜସ୍ଥାନ ରୟାଲ୍ସର ପରିସଂଖ୍ୟାନକୁ ଦେଖିଲେ ହାଇଦ୍ରାବାଦର ପଲ୍ଲା ଭାରି ଥିବା ଜଣାପଡ଼େ। ଦୁଇ ଦଳ ମଧ୍ୟରେ ଏପର୍ଯ୍ୟନ୍ତ ମୋଟ ୨୩ଟି ମ୍ୟାଚ୍ ଖେଳାଯାଇଛି, ଯେଉଁଥିରୁ ହାଇଦ୍ରାବାଦ ୧୪ଟିରେ ବିଜୟୀ ହୋଇଥିବା ବେଳେ ରାଜସ୍ଥାନ ମାତ୍ର ୯ଟି ମ୍ୟାଚ୍ ଜିତିବାରେ ସଫଳ ହୋଇଛି।

ଚଳିତ ୨୦୨୬ ସିଜନର ଲିଗ୍ ପର୍ଯ୍ୟାୟରେ ମଧ୍ୟ ଦୁଇ ଦଳ ଦୁଇଥର ସାମ୍ନାସାମ୍ନି ହୋଇଥିଲେ ଏବଂ ଉଭୟ ମ୍ୟାଚ୍‌ରେ ହାଇଦ୍ରାବାଦ ବାଜି ମାରିଥିଲା। ଏପ୍ରିଲ ୧୩ରେ ଖେଳାଯାଇଥିବା ମ୍ୟାଚ୍‌ରେ SRH ୫୭ ରନ୍‌ରେ ଜିତିଥିଲା, ଯେଉଁଥିରେ ଈଶାନ କିଷାନ ୯୧ ରନ୍‌ର ଦମଦାର ଇନିଂସ ଖେଳିଥିଲେ। ସେହିପରି ଏପ୍ରିଲ ୨୫ର ଦ୍ୱିତୀୟ ମ୍ୟାଚ୍‌ରେ ମଧ୍ୟ ଈଶାନଙ୍କ ବ୍ୟାଟ୍ ଚାଲିଥିଲା ଏବଂ ସେ ୩୧ ବଲ୍‌ରୁ ୭୪ ରନ୍ କରିଥିଲେ। ଏହି ମ୍ୟାଚ୍‌ରେ ବୈଭବ ସୂର୍ଯ୍ୟବଂଶୀ ମଧ୍ୟ ମାତ୍ର ୩୭ ବଲ୍‌ରେ ୧୦୩ ରନ୍‌ର ବିସ୍ଫୋରକ ଶତକ ହାସଲ କରିଥିଲେ।

କେମିତି ରହିବ ମୁଲ୍ଲାନପୁରର ପାଣିପାଗ?

ମୁଲ୍ଲାନପୁରର ପିସିଏ ଷ୍ଟାଡିୟମରେ ଆଜି ସନ୍ଧ୍ୟା ୭:୩୦ରେ ଏହି ମ୍ୟାଚ୍ ଆରମ୍ଭ ହେବ। ଆଜି ଏଠାରେ ପାଣିପାଗ ସମ୍ପୂର୍ଣ୍ଣ ସଫା ରହିବ ଏବଂ ବର୍ଷାର କୌଣସି ଆଶଙ୍କା ନାହିଁ। ତେବେ ଖେଳର ପ୍ରଥମ ଦୁଇ ଘଣ୍ଟା ଅତ୍ୟଧିକ ଗରମ ଅନୁଭୂତ ହେବ ଏବଂ ତାପମାତ୍ରା ୪୦-୪୧ ଡିଗ୍ରୀ ସେଲସିୟସ ପର୍ଯ୍ୟନ୍ତ ରହିପାରେ। ଏଭଳି ପରିସ୍ଥିତିରେ ପ୍ରଥମେ ଫିଲ୍ଡିଂ କରୁଥିବା ଦଳର ଖେଳାଳିମାନେ ବେଶ୍ ହନ୍ତସନ୍ତ ହୋଇପାରନ୍ତି।

ପିଚ୍ ରିପୋର୍ଟ

ନ୍ୟୁଚଣ୍ଡିଗଡ ସ୍ଥିତ ଏହି ଷ୍ଟାଡିୟମର ପିଚ୍ ନମ୍ବର-୪ରେ ଆଜିର ମ୍ୟାଚ୍ ଖେଳାଯିବ। ଏହି ପିଚ୍ ସାଧାରଣତଃ ବ୍ୟାଟିଂ ପାଇଁ ବେଶ୍ ଅନୁକୂଳ ମାନାଯାଏ। ଚଳିତ ସିଜନରେ ଏହି ପିଚ୍‌ରେ ପଞ୍ଜାବ କିଙ୍ଗସ ବିପକ୍ଷରେ ୨୨୩ ରନ୍‌ର ବଡ଼ ସ୍କୋରକୁ ପିଛା କରି ରାଜସ୍ଥାନ ରୟାଲ୍ସ ଚମତ୍କାର ବିଜୟ ହାସଲ କରିଥିଲା। ସେହି ମ୍ୟାଚ୍‌ରେ ଯଶସ୍ୱୀ ଜୈସୱାଲ ୨୭ ବଲ୍‌ରେ ୫୧ ରନ୍ ଏବଂ ବୈଭବ ୧୬ ବଲ୍‌ରେ ୪୩ ରନ୍‌ର ଦ୍ରୁତ ଇନିଂସ ଖେଳିଥିଲେ।