ନୂଆଦିଲ୍ଲୀ: ଟି-୨୦ ଓ ଦିନିକିଆ ସିରିଜ୍ ପରେ ଏବେ ଟେଷ୍ଟ କ୍ରିକେଟ୍ରେ ମୁହାଁମୁହିଁ ହେବେ ଭାରତ ଓ ନ୍ୟୁଜିଲାଣ୍ଡ। ଗୁରୁବାର (ନଭେମ୍ବର ୧୯)ଠାରୁ ଆରମ୍ଭ ହେବ ଦୁଇ ଦେଶ ମଧ୍ୟରେ ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍। ତେବେ ଭାରତୀୟ କ୍ରିକେଟ୍ ପ୍ରେମୀଙ୍କ ପାଇଁ ଏହି ମ୍ୟାଚ୍ ଦେଖିବାକୁ ରାତିରୁ ଉଠିବାକୁ ପଡ଼ିବ। କାରଣ ଭାରତୀୟ ସମୟ ଅନୁସାରେ ଭୋର୍ ୩ଟା ୩୦ରେ ଆରମ୍ଭ ହେବ ପ୍ରଥମ ଟେଷ୍ଟ। ଟସ୍ ପଡ଼ିବ ଭୋର୍ ୩ଟାରେ।
କେବେ ଓ କେଉଁଠି ଖେଳାଯିବ ପ୍ରଥମ ଟେଷ୍ଟ?
ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ପ୍ରଥମ ଟେଷ୍ଟ ନଭେମ୍ବର ୧୯ରୁ ୨୩ ତାରିଖ ପର୍ଯ୍ୟନ୍ତ ନ୍ୟୁଜିଲାଣ୍ଡର ୱେଲିଂଟନ୍ସ୍ଥିତ ବେସିନ୍ ରିଜର୍ଭ ଷ୍ଟାଡିୟମ୍ରେ ଖେଳାଯିବ। ପାଞ୍ଚ ଦିନିଆ ଏହି ମୁକାବିଲାର ପ୍ରତ୍ୟେକ ଦିନର ଖେଳ ଭାରତୀୟ ସମୟ ଅନୁସାରେ ଭୋର୍ ୩ଟା ୩୦ରୁ ଆରମ୍ଭ ହେବ।
ଟିଭି ଓ ମୋବାଇଲରେ କେଉଁଠି ଦେଖିବେ ଲାଇଭ୍?
ଯଦି ଆପଣ ଟିଭିରେ ଭାରତ-ନ୍ୟୁଜିଲାଣ୍ଡ ମ୍ୟାଚ୍ ଦେଖିବାକୁ ଚାହୁଁଛନ୍ତି, ତେବେ Sony Sports Networkରେ ଏହାର ସିଧା ପ୍ରସାରଣ ଉପଲବ୍ଧ ହେବ। Sony Ten 1 ଓ Sony Ten 3 ଚ୍ୟାନେଲ୍ରେ ମ୍ୟାଚ୍ ଦେଖିପାରିବେ। ସେହିପରି ମୋବାଇଲ୍, ଲାପଟପ୍ କିମ୍ବା ଅନ୍ୟ ଡିଜିଟାଲ୍ ଡିଭାଇସ୍ରେ ମ୍ୟାଚ୍ର ଲାଇଭ୍ ଷ୍ଟ୍ରିମିଂ Sony LIV ଆପ୍ ଓ ୱେବସାଇଟ୍ରେ ଦେଖିପାରିବେ। ଏଥିପାଇଁ ଆବଶ୍ୟକ ସବ୍ସ୍କ୍ରିପସନ୍ ରହିବା ଜରୁରୀ।
ଏହି ଟେଷ୍ଟ ସିରିଜ୍ରେ ଭାରତର ନେତୃତ୍ୱ ନେବେ ଶୁଭମନ ଗିଲ୍। ଅନ୍ୟପଟେ ନ୍ୟୁଜିଲାଣ୍ଡ ଦଳର କମାଣ ସମ୍ଭାଳିବେ ଟମ୍ ଲାଥମ୍। ଭାରତୀୟ ଦଳରେ ଯଶସ୍ୱୀ ଜୟସ୍ୱାଲ, କେଏଲ୍ ରାହୁଲ, ଋଷଭ ପନ୍ତ, ରବୀନ୍ଦ୍ର ଜାଡେଜା, ଜସପ୍ରୀତ ବୁମ୍ରା ଓ ମହମ୍ମଦ ସିରାଜଙ୍କ ଭଳି ଅଭିଜ୍ଞ ଖେଳାଳି ରହିଛନ୍ତି।