ନୂଆଦିଲ୍ଲୀ: କ୍ରିକେଟ୍ ପ୍ରେମୀଙ୍କ ପାଇଁ ଏକ ବଡ଼ ଏବଂ ଖୁସିର ଖବର। ଆନ୍ତର୍ଜାତୀୟ କ୍ରିକେଟ୍ ପରିଷଦ (ICC) ଆସନ୍ତା ୨୦୩୫ ମସିହା ପର୍ଯ୍ୟନ୍ତ ହେବାକୁ ଥିବା ସମସ୍ତ ପୁରୁଷ କ୍ରିକେଟ୍ ଟୁର୍ଣ୍ଣାମେଣ୍ଟର ଖେଳସୂଚୀକୁ ଅନୁମୋଦନ ଦେଇଛି। ଏହା ସହିତ ୨୦୩୧ ପର୍ଯ୍ୟନ୍ତ ହେବାକୁ ଥିବା ପ୍ରମୁଖ ଟୁର୍ଣ୍ଣାମେଣ୍ଟଗୁଡ଼ିକର ଆୟୋଜକ ଦେଶଙ୍କ ନାମ ମଧ୍ୟ ଘୋଷଣା କରାଯାଇଛି, ଯେଉଁଥିରେ ଭାରତକୁ ଦୁଇଟି ବଡ଼ ମେଗା ଇଭେଣ୍ଟର ଆତିଥ୍ୟ ମିଳିଛି।

ଆଇସିସିର ଘୋଷଣା ଅନୁଯାୟୀ, ଭାରତ ଏକାକୀ ୨୦୨୯ ଚାମ୍ପିୟନ୍ସ ଟ୍ରଫିର ଆୟୋଜନ କରିବ, ଯାହା ଅକ୍ଟୋବର ୯ ରୁ ୨୮ ତାରିଖ ପର୍ଯ୍ୟନ୍ତ ଖେଳାଯିବ। ସେହିପରି ୨୦୩୧ ଦିନିକିଆ (ODI) ବିଶ୍ୱକପ୍‌ର ଆୟୋଜନ ଦାୟିତ୍ୱ ଭାରତ ଏବଂ ବାଂଲାଦେଶକୁ ମିଳିତ ଭାବେ ମିଳିଛି। ଏହି ମହାକୁମ୍ଭ ୨୦୩୧ ମସିହା ଅକ୍ଟୋବର ୯ ରୁ ନଭେମ୍ବର ୨୩ ପର୍ଯ୍ୟନ୍ତ ଅନୁଷ୍ଠିତ ହେବ। ଏହା ବ୍ୟତୀତ ୨୦୩୫ ମସିହା ଅକ୍ଟୋବର-ନଭେମ୍ବରରେ ହେବାକୁ ଥିବା ଦିନିକିଆ ବିଶ୍ୱକପ୍ ପାଇଁ ତାରିଖ ସ୍ଥିର ହୋଇସାରିଥିଲେ ମଧ୍ୟ ଆୟୋଜକ ଦେଶର ନାମ ଏପର୍ଯ୍ୟନ୍ତ ଘୋଷଣା କରାଯାଇ ନାହିଁ।

ଅନ୍ୟପଟେ ଟି-୨୦ ବିଶ୍ୱକପ୍‌ର ଆଗାମୀ ସଂସ୍କରଣଗୁଡ଼ିକ ପାଇଁ ମଧ୍ୟ ଆଇସିସି ବ୍ଲୁ-ପ୍ରିଣ୍ଟ୍ ପ୍ରସ୍ତୁତ କରିସାରିଛି। ୨୦୨୮ ମସିହାର ଟି-୨୦ ବିଶ୍ୱକପ୍ ଅକ୍ଟୋବର ୧୨ ରୁ ନଭେମ୍ବର ୧୨ ପର୍ଯ୍ୟନ୍ତ ଅଷ୍ଟ୍ରେଲିଆ ଏବଂ ନ୍ୟୁଜିଲାଣ୍ଡରେ ମିଳିତ ଭାବେ ଖେଳାଯିବ। ଏହାପରେ ୨୦୩୦ ଟି-୨୦ ବିଶ୍ୱକପ୍‌ର ଆୟୋଜନ ଇଂଲଣ୍ଡ, ସ୍କଟଲ୍ୟାଣ୍ଡ ଏବଂ ଆୟର୍ଲ୍ୟାଣ୍ଡ ମିଳିତ ଭାବେ କରିବେ। ତେବେ ୨୦୩୨ ଏବଂ ୨୦୩୪ରେ ହେବାକୁ ଥିବା ଟି-୨୦ ବିଶ୍ୱକପ୍‌ର ଆୟୋଜକ ଦେଶ ଏବଂ ଭେନ୍ୟୁ ସମ୍ପର୍କରେ ପରବର୍ତ୍ତୀ ସମୟରେ ନିଷ୍ପତ୍ତି ନିଆଯିବ।

ସେହିପରି ବିଶ୍ୱ ଟେଷ୍ଟ ଚାମ୍ପିୟନସିପ୍ (WTC) ଫାଇନାଲ୍ ୨୦୩୫ ପର୍ଯ୍ୟନ୍ତ ପ୍ରତି ଦୁଇ ବର୍ଷରେ ଥରେ ଜୁନ୍ ମାସରେ ଅନୁଷ୍ଠିତ ହେବା ଜାରି ରହିବ। ୨୦୨୯ ଏବଂ ୨୦୩୧ ମସିହାର WTC ଫାଇନାଲ୍ ମ୍ୟାଚ୍ ଇଂଲଣ୍ଡରେ ଖେଳାଯିବା ନେଇ ନିଶ୍ଚିତ ହୋଇଥିବା ବେଳେ ୨୦୩୩ ଏବଂ ୨୦୩୫ ଫାଇନାଲ୍ କେଉଁ ଦେଶରେ ହେବ, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।

ଏହି ନୂତନ କ୍ୟାଲେଣ୍ଡର ସମ୍ପର୍କରେ ମତ ରଖି ଆଇସିସିର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (CEO) ସଞ୍ଜୋଗ ଗୁପ୍ତା କହିଛନ୍ତି ଯେ, ଏହି ଟୁର୍ଣ୍ଣାମେଣ୍ଟଗୁଡ଼ିକ ବିଶ୍ୱ କ୍ରିକେଟ୍ ଢାଞ୍ଚାର ଏକ ଗୁରୁତ୍ୱପୂର୍ଣ୍ଣ ଅଂଶ ଏବଂ ଏହା ଖେଳକୁ ଅଧିକ ପ୍ରତିଯୋଗିତାମୂଳକ କରିବା ସହ ଏକ ନୂଆ ଦିଗଦର୍ଶନ ଦେବ। ଖେଳାଳି ଏବଂ ସଦସ୍ୟ ଦେଶଗୁଡ଼ିକୁ ବହୁତ ଆଗରୁ ଏ ସମ୍ପର୍କରେ ସୂଚନା ମିଳିବା ଦ୍ୱାରା ଭବିଷ୍ୟତ ପାଇଁ ଉନ୍ନତ ଯୋଜନା, ଉଚ୍ଚ-ପ୍ରଦର୍ଶନ କାର୍ଯ୍ୟକ୍ରମ ଏବଂ ଏକ ସୁବ୍ୟବସ୍ଥିତ କ୍ରିକେଟ୍ କ୍ୟାଲେଣ୍ଡର ପ୍ରସ୍ତୁତ କରିବାରେ ବେଶ୍ ସହାୟକ ହେବ ବୋଲି ସେ ଆଶା ପ୍ରକଟ କରିଛନ୍ତି।