ଚଣ୍ଡିଗଡ଼: ୨୦୨୭ ପଞ୍ଜାବ ବିଧାନସଭା ନିର୍ବାଚନକୁ ନେଇ ଏବେଠାରୁ ରାଜନୈତିକ ତତ୍ପରତା ବଢ଼ାଇଛି ଭାରତୀୟ ଜନତା ପାର୍ଟି (ବିଜେପି)। ନିର୍ବାଚନୀ ପ୍ରସ୍ତୁତିକୁ ଅଧିକ ମଜବୁତ କରିବା ଲକ୍ଷ୍ୟରେ ଦଳ ପକ୍ଷରୁ ଦୁଇଟି ଗୁରୁତ୍ୱପୂର୍ଣ୍ଣ କମିଟି ଗଠନ କରାଯାଇଛି। ଏହି କମିଟିରେ ଆମ୍ ଆଦମୀ ପାର୍ଟି (ଆପ୍) ଛାଡ଼ି ବିଜେପିରେ ସାମିଲ ହୋଇଥିବା ରାଜ୍ୟସଭା ସାଂସଦ ରାଘବ ଚଢ଼ାଙ୍କୁ ସ୍ଥାନ ମିଳିଛି।

ଦଳର ରାଜ୍ୟ ସଭାପତି କେୱଲ ସିଂହ ଢିଲ୍ଲୋଁ ନିର୍ବାଚନୀ ଇସ୍ତାହାର କମିଟି ଏବଂ ଚାର୍ଜସିଟ୍ କମିଟି ଗଠନ ନେଇ ଘୋଷଣା କରିଛନ୍ତି। ଏହା ସହ ଆଗାମୀ ଦିନରେ ଆଉ କିଛି ଗୁରୁତ୍ୱପୂର୍ଣ୍ଣ କମିଟି ଗଠନ କରାଯିବ ବୋଲି ସେ ସୂଚନା ଦେଇଛନ୍ତି।

ଇସ୍ତାହାର କମିଟିର ଅଧ୍ୟକ୍ଷ ଅବିନାଶ ରାୟ ଖାନ୍ନା

ବିଜେପି ପକ୍ଷରୁ ଗଠିତ ଇସ୍ତାହାର କମିଟିର ଅଧ୍ୟକ୍ଷ ଭାବେ ଦଳର ବରିଷ୍ଠ ନେତା ତଥା ପୂର୍ବତନ ରାଜ୍ୟସଭା ସାଂସଦ ଅବିନାଶ ରାୟ ଖାନ୍ନାଙ୍କୁ ଦାୟିତ୍ୱ ଦିଆଯାଇଛି। ଏହି କମିଟିରେ ମନପ୍ରୀତ ସିଂହ ବାଦଲ, ଅଶ୍ୱିନୀ ଶର୍ମା, ମନୋରଞ୍ଜନ କାଲିଆ, ସୋମ ପ୍ରକାଶ, ରାଣା ଗୁରମିତ ସିଂହ ସୋଢ଼ୀ, ଅଶ୍ୱିନୀ ସେଖ୍ରୀ, ସତନାମ ସିଂହ ସାନ୍ଧୁ, ରାଘବ ଚଢ଼ା, ରାଜିନ୍ଦର ଗୁପ୍ତା, ହରଭଜନ ସିଂହ, ପରମପାଲ କୌର ଏବଂ ଏଚ୍‌.ଏସ୍‌. ଫୁଲକାଙ୍କୁ ସଦସ୍ୟ ଭାବେ ସାମିଲ କରାଯାଇଛି।

ଏହି କମିଟିର ମୁଖ୍ୟ କାମ ହେବ ଆଗାମୀ ବିଧାନସଭା ନିର୍ବାଚନ ପାଇଁ ଦଳର ଇସ୍ତାହାର ପ୍ରସ୍ତୁତ କରିବା। ପଞ୍ଜାବର ରାଜନୈତିକ ପରିସ୍ଥିତି, ଜନସାଧାରଣଙ୍କ ଆଶା ଓ ବିଭିନ୍ନ ଜନସମସ୍ୟାକୁ ଆଧାର କରି ନିର୍ବାଚନୀ ପ୍ରତିଶ୍ରୁତି ପ୍ରସ୍ତୁତ କରିବା ଏହାର ଗୁରୁତ୍ୱପୂର୍ଣ୍ଣ ଦାୟିତ୍ୱ ରହିବ।

ଚାର୍ଜସିଟ୍ କମିଟିର ନେତୃତ୍ୱ ନେବେ ସୁନୀଲ ଜାଖଡ଼

ସେହିପରି ଦଳର ଅନ୍ୟ ଏକ ପ୍ରମୁଖ କମିଟି ଚାର୍ଜସିଟ୍ କମିଟିର ଅଧ୍ୟକ୍ଷ ଭାବେ ପୂର୍ବତନ ପଞ୍ଜାବ ବିଜେପି ସଭାପତି ସୁନୀଲ ଜାଖଡ଼ଙ୍କୁ ନିଯୁକ୍ତ କରାଯାଇଛି। ଏହି କମିଟିରେ ଇକବାଲ ସିଂହ ଲାଲପୁରା, ବିଜୟ ସାମ୍ପଲା, ଶ୍ୱେତ ମଲିକ, ମହାରାଣୀ ପ୍ରଣୀତ କୌର, ରବନୀତ ସିଂହ ବିଟ୍ଟୁ, ଦିନେଶ ବାବୁ, ସୁଶୀଲ ରିଙ୍କୁ, ଗେଜା ରାମ, ବିକ୍ରମଜିତ ସିଂହ ସାହନୀ, ଅଶୋକ ମିତ୍ତଲ, ସନ୍ଦୀପ ପାଠକ, ଏସ୍‌.ଏସ୍‌. ଚନ୍ନୀ ଏବଂ ଜଗମୀତ ସିଂହ ବରାଡ଼ଙ୍କୁ ସାମିଲ କରାଯାଇଛି। ଏହି କମିଟି ପଞ୍ଜାବରେ ଶାସନ କରୁଥିବା ଆପ୍ ସରକାରଙ୍କ ବିରୋଧରେ ବିଭିନ୍ନ ପ୍ରସଙ୍ଗ ଓ ଅଭିଯୋଗକୁ ଏକାଠି କରି ଦଳର ନିର୍ବାଚନୀ ଆଭିମୁଖ୍ୟ ପ୍ରସ୍ତୁତ କରିବ।

୨୦୨୭ ନିର୍ବାଚନ ଉପରେ ବିଜେପିର ନଜର

ପଞ୍ଜାବରେ ୨୦୨୭ ମସିହାରେ ବିଧାନସଭା ନିର୍ବାଚନ ହେବାକୁ ଥିବାରୁ ବିଜେପି ଏବେଠାରୁ ସଂଗଠନ ଓ ନିର୍ବାଚନୀ ରଣନୀତିକୁ ସଜାଡ଼ିବା ଆରମ୍ଭ କରିଛି। ଉଭୟ କମିଟିରେ ଅଭିଜ୍ଞ ରାଜନେତାଙ୍କ ସହ ବିଭିନ୍ନ କ୍ଷେତ୍ରର ପ୍ରଭାବଶାଳୀ ବ୍ୟକ୍ତିଙ୍କୁ ସାମିଲ କରିବା ଦଳର ପ୍ରସ୍ତୁତିର ଏକ ଅଂଶ ବୋଲି ମନେ କରାଯାଉଛି।

ବିଶେଷ କରି ରାଘବ ଚଢ଼ା ଏବଂ ସନ୍ଦୀପ ପାଠକଙ୍କ ଭଳି ପୂର୍ବତନ ଆପ୍ ନେତାଙ୍କୁ ଦାୟିତ୍ୱ ଦେବା ରାଜ୍ୟର ଆଗାମୀ ରାଜନୈତିକ ଲଢ଼େଇକୁ ଆହୁରି ରୋଚକ କରିଛି। ଏବେ ଦେଖିବାକୁ ବାକି ରହିଲା, ବିଜେପିର ଏହି ନୂଆ ରଣନୀତି ୨୦୨୭ ନିର୍ବାଚନରେ ଦଳକୁ କେତେ ଫାଇଦା ଦେଉଛି।