ନୂଆଦିଲ୍ଲୀ: ଦୀପାବଳି ପରଠାରୁ ଦିଲ୍ଲୀରେ ବାୟୁ ପ୍ରଦୂଷଣ ସ୍ଥିତି ଗମ୍ଭୀର ରହିଛି। ରାଜଧାନୀର ଲୋକଙ୍କୁ ଦୂଷିତ ବାୟୁରୁ ଏବେ ବି ଆଶ୍ୱସ୍ତି ମିଳିନାହିଁ। ଶନିବାର ଦିଲ୍ଲୀର ହାରାହାରି ବାୟୁ ଗୁଣବତ୍ତା ସୂଚକାଙ୍କ (AQI) ୩୬୭ ରେକର୍ଡ କରାଯାଇଛି। ଏହା 'ଅତି ଖରାପ' ବର୍ଗରେ ରହିଛି। ତେବେ ପାଣିପାଗରେ ପରିବର୍ତ୍ତନ ଏବଂ ବର୍ଷାର ସମ୍ଭାବନା ଯୋଗୁଁ ଆଗାମୀ ଦୁଇ ଦିନରେ ପ୍ରଦୂଷଣ ସ୍ଥିତିରେ ସାମାନ୍ୟ ସୁଧାର ଆସିପାରେ ବୋଲି ପାଣିପାଗ ବିଭାଗ ଆକଳନ କରିଛି।

ଆଗାମୀ ଦୁଇ ଦିନରେ ମିଳିପାରେ ଆଶ୍ୱସ୍ତି

ଦିଲ୍ଲୀର ବାୟୁ ଗୁଣବତ୍ତା ପୂର୍ବ ସତର୍କତା ପ୍ରଣାଳୀ (AQEWS) ଅନୁସାରେ, ଆଗାମୀ ଦୁଇ ଦିନ ମଧ୍ୟରେ ବାୟୁରେ ପ୍ରଦୂଷଣକାରୀ କଣିକାର ପରିମାଣ କମିବାର ସମ୍ଭାବନା ରହିଛି। ବିଶେଷକରି PM2.5 ଏବଂ PM10 ସ୍ତରରେ ହ୍ରାସ ହୋଇପାରେ। ଶୁକ୍ରବାର ଦିଲ୍ଲୀର ହାରାହାରି AQI ୩୭୩ ଥିବା ବେଳେ ଶନିବାର ଏହା ସାମାନ୍ୟ ହ୍ରାସ ପାଇ ୩୬୭ରେ ପହଞ୍ଚିଛି।

ତେବେ ଏହି ସୁଧାର ଯଥେଷ୍ଟ ନୁହେଁ। ଦିଲ୍ଲୀବାସୀଙ୍କୁ ଏବେ ବି ପ୍ରଦୂଷିତ ବାୟୁ ମଧ୍ୟରେ ରହିବାକୁ ପଡ଼ୁଛି। ୫୯ଟି ମନିଟରିଂ କେନ୍ଦ୍ରରୁ ଆସିଲା ଚିନ୍ତାଜନକ ରିପୋର୍ଟ ରାଜଧାନୀର ୫୯ଟି ବାୟୁ ଗୁଣବତ୍ତା ମାପ କେନ୍ଦ୍ରର ତଥ୍ୟ ଅନୁସାରେ ପ୍ରଦୂଷଣ ସ୍ଥିତି ଏବେ ବି ଚିନ୍ତାଜନକ ରହିଛି।

୧୭ଟି କେନ୍ଦ୍ରରେ AQI 'ଗମ୍ଭୀର' ଶ୍ରେଣୀରେ ରହିଛି।୩୮ଟି କେନ୍ଦ୍ରରେ 'ଅତି ଖରାପ' ରେକର୍ଡ ହୋଇଛି। ୩ଟି କେନ୍ଦ୍ରରେ 'ଖରାପ' ସ୍ଥିତି ରହିଛି। ଗୋଟିଏ କେନ୍ଦ୍ରରେ 'ମଧ୍ୟମ' ବାୟୁ ଗୁଣବତ୍ତା ରେକର୍ଡ ହୋଇଛି।

ଗାଡ଼ି ଧୂଆଁରୁ ବଢ଼ୁଛି ପ୍ରଦୂଷଣ

ଦିଲ୍ଲୀର ପ୍ରଦୂଷଣ ବୃଦ୍ଧି ପଛରେ ଯାନବାହନରୁ ନିର୍ଗତ ଧୂଆଁ ଏକ ପ୍ରମୁଖ କାରଣ ପାଲଟିଛି। ନିଷ୍ପତ୍ତି ସହାୟତା ବ୍ୟବସ୍ଥା (DSS)ର ତଥ୍ୟ ଅନୁସାରେ, ଶନିବାର ଦିଲ୍ଲୀର ମୋଟ ପ୍ରଦୂଷଣରେ ପରିବହନ କ୍ଷେତ୍ରର ଅବଦାନ ୨୦.୫ ପ୍ରତିଶତ ରହିଥିଲା। ଏହାବ୍ୟତୀତ ଶନିବାର PM10 ଦିଲ୍ଲୀର ବାୟୁରେ ପ୍ରମୁଖ ପ୍ରଦୂଷକ ଭାବେ ଚିହ୍ନଟ ହୋଇଥିଲା। ଦିଲ୍ଲୀର ବାୟୁ ପ୍ରଦୂଷଣରେ ପଡ଼ୋଶୀ ରାଜ୍ୟଗୁଡ଼ିକରେ ପରାଳି ଜଳାଇବାର ପ୍ରଭାବ ମଧ୍ୟ ଦେଖିବାକୁ ମିଳିଛି। ମୋଟ ପ୍ରଦୂଷଣରେ ପରାଳି ଜଳାଇବାର ଅବଦାନ ୧୩.୩ ପ୍ରତିଶତ ରହିଥିଲା।

ଉପଗ୍ରହ ତଥ୍ୟ ଅନୁସାରେ, ଶନିବାର ୬ଟି ରାଜ୍ୟରେ ମୋଟ ୫୩୭ଟି ପରାଳି ଜଳାଇବା ଘଟଣା ଚିହ୍ନଟ ହୋଇଥିଲା। ସେଥିମଧ୍ୟରୁ ମଧ୍ୟପ୍ରଦେଶରେ ସର୍ବାଧିକ ୨୪୬ଟି ଘଟଣା ରହିଥିବା ବେଳେ ପଞ୍ଜାବରେ ୨୧୪ଟି ଘଟଣା ରେକର୍ଡ ହୋଇଥିଲା। ଏହାବ୍ୟତୀତ ଉତ୍ତରପ୍ରଦେଶରେ ୩୩, ରାଜସ୍ଥାନରେ ୩୩ ଏବଂ ହରିୟାଣାରେ ୧୧ଟି ଘଟଣା ଚିହ୍ନଟ ହୋଇଥିଲା।