ଅହମ୍ମଦାବାଦ: ପ୍ରତ୍ୟେକ ଆଶା, ପ୍ରତ୍ୟେକ ଆକାଂକ୍ଷା ଏବଂ ପ୍ରତ୍ୟେକ ଇଚ୍ଛା ପୂରଣ ହୋଇଛି। ପ୍ରତ୍ୟେକ ସମାଲୋଚନା, ପ୍ରତ୍ୟେକ ପ୍ରଶ୍ନ ଏବଂ ପ୍ରତ୍ୟେକ ସନ୍ଦେହ ଉପରେ ପଡ଼ିଛି ପୂର୍ଣ୍ଣଛେଦ। ଗତ ଦୁଇ ବର୍ଷର ପରିବର୍ତ୍ତନ, କଠିନ ପରିଶ୍ରମ ଏବଂ ରଣନୀତି ଶେଷରେ ସଫଳ ହୋଇଛିୱ. ହଁ, ଟିମ୍ ଇଣ୍ଡିଆ ଆରମ୍ଭରୁ ଯାହା ଆଶା କରାଯାଇଥିଲା ତାହା ହାସଲ କରିଛି। ଡିଫେଣ୍ଡିଂ ଚାମ୍ପିଅନ୍ ଭାରତ ୨୦୨୬ ଟି-୨୦ ବିଶ୍ୱକପରେ ସଫଳତାର ସହ ନିଜର ଟାଇଟଲ୍ ରକ୍ଷା କରିବାରେ ସଫଳ ହୋଇଛି। ଲଗାତାର ଦ୍ୱିତୀୟ ଥର ପାଇଁ ବିଶ୍ୱ ଚାମ୍ପିଅନ୍ ହୋଇଛି ଭାରତ। ଫାଇନାଲରେ, ଟିମ୍ ଇଣ୍ଡିଆ ସମ୍ପୂର୍ଣ୍ଣ ଏକପାଖିଆ ମ୍ୟାଚ୍‌ରେ ନ୍ୟୁଜିଲ୍ୟାଣ୍ଡକୁ ୯୬ ରନରେ ପରାସ୍ତ କରି ରେକର୍ଡ ତୃତୀୟ ଥର ପାଇଁ ଟାଇଟଲ୍ ଜିତିଛି।

୧୯ ନଭେମ୍ବର ୨୦୨୩ରେ ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଦିନିକିଆ ବିଶ୍ୱକପ୍ ଫାଇନାଲରେ ପରାଜୟର ଯନ୍ତ୍ରଣା ଏବେ ବି ଭାରତୀୟ ପ୍ରଶଂସକଙ୍କ ମନରେ ରହିଥିଲା। ହେଲେ ୮ ମାର୍ଚ୍ଚ ରବିବାର ଦିନ ସେହି ଷ୍ଟାଡିୟମରେ ଟାଇଟଲ୍ ମ୍ୟାଚରେ ଟିମ୍ ଇଣ୍ଡିଆ ନ୍ୟୁଜିଲ୍ୟାଣ୍ଡକୁ ପରାସ୍ତ କରି ୨୦୨୩ ନଭେମ୍ବର ୧୯ର ଯନ୍ତ୍ରଣାକୁ ପୋଛି ପାରିଛି। 

ଟସ୍ ହାରି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେବା ପରେ, ଭାରତୀୟ ଦଳ ୨୦ ଓଭରରେ ରେକର୍ଡ ୨୫୫ ରନର ବିଶାଳ ସ୍କୋର କରିଥିଲା। ଏହା ଟି-20 ବିଶ୍ୱକପ୍ ଫାଇନାଲରେ ଯେକୌଣସି ଦଳ ଦ୍ୱାରା ସର୍ବାଧିକ ସ୍କୋର ଥିଲା। ପୁଣିଥରେ, ସଞ୍ଜୁ ସାମସନ ୮୯ ରନ ସହିତ କ୍ରମାଗତ ତୃତୀୟ ଅର୍ଦ୍ଧଶତକ ହାସଲ କରି ଏହି ସ୍କୋରରେ ପହଞ୍ଚିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ଇଶାନ କିଶାନ ମଧ୍ୟ ବିଶ୍ୱକପରେ ନିଜର ତୃତୀୟ ଅର୍ଦ୍ଧଶତକ ହାସଲ କରିଥିଲେ। ଅଭିଷେକ, ଯିଏ ଟୁର୍ଣ୍ଣାମେଣ୍ଟରେ ଗୁରୁତ୍ୱପୂର୍ଣ୍ଣ ଅବଦାନ ଦେଇପାରି ନଥିଲେ, ସେ ଫାଇନାଲ୍ ମ୍ୟାଚରେ  ଦମଦାର ପ୍ରଦର୍ଶନ କରିଥିଲେ। ସେ ୫୨ ରନ କରିଥିଲେ। ଶେଷରେ, ଶିବମ୍ ଦୁବେ ମାତ୍ର ୮ ବଲରେ ୨୬ ରନ କରିଥିଲେ। ନ୍ୟୁଜିଲ୍ୟାଣ୍ଡ ପାଇଁ ଜେମ୍ସ ନୀଶାମ ସର୍ବାଧିକ ୩  ୱିକେଟ ନେଇଥିଲେ।

ଅକ୍ଷର ପଟେଲ ଏବଂ ବୁମରା ନ୍ୟୁଜିଲାଣ୍ଡକୁ ଦେଲେ ଝଟକା 

୨୫୬ ରନର ବିଶାଳ ବିଜୟ ଲକ୍ଷ୍ୟ ପିଛା କରିଥିବା ନ୍ୟୁଜିଲାଣ୍ଡର ଆରମ୍ଭ ନୈରାଶ୍ୟଜନକ ଥିଲା। ଦଳ ୩୨ ରନ ଭିତରେ ୨ଟି ଓ୍ଵିକେଟ୍ ହରାଇଥିଲା। ଫିନ ଆଲେନ ୯ ରନ ଏବଂ ରଚିନ ରବୀନ୍ଦ୍ରନ ମାତ୍ର ୧  ରନ କରି ପାଭିଲିୟନ ଫେରିଥିଲେ। ଭାରତୀୟ ବୋଲର ଶାଣିତ ବୋଲିଂ କରି କିଓ୍ଵିର କୌଣସି ବ୍ୟାଟରଙ୍କୁ କ୍ରିଜରେ ଜମିବାକୁ ଦେଇ ନ ଥିଲେ। 

ଗ୍ଲେନ ଫିଲିପ୍ସ ୫ ରନ ଓ ମାର୍କ ଚାମପ୍ୟାନ ୩ ରନ କରି ଆଉଟ୍ ହୋଇଥିଲେ। ଶେଷ ଆଡ଼କୁ ଏକ ମାତ୍ର ବ୍ୟାଟର ଭାବେ ଅଧିନାୟକ ମିଚେଲ ସାଣ୍ଟନର ୪୩ ରନର ଅଧିନାୟକତ୍ଵ ଇନିଂସ ଖେଳିଥିଲେ। ତେବେ ବୁମରା ଘାତକ ବୋଲିଂ କରି କିଓ୍ଵି ବ୍ୟାଟରଙ୍କୁ ମ୍ୟାଚରେ ପ୍ରତ୍ୟାବର୍ତ୍ତନ କରିବାର ସୁଯୋଗ ଦେଇ ନ ଥିଲେ। ସାଣ୍ଟନର ୪୩  ରନ କରିବାରୁ ନ୍ୟୁଜିଲାଣ୍ଡ ଇନିଂସ ୧୫୯ ରନ କରି ପାରିଛି। ଏଥିସହ ଭାରତ ମ୍ୟାଚକୁ ୯୬ ରନରେ ଜିତି କ୍ରମାଗତ ଟି-୨୦ ବିଶ୍ଵକପ୍ ଚାମ୍ପିଅନ ହେବା ସହ ଇତିହାସ ରଚିଛି। 

ବୋଲିଂରେ ଭାରତ ପକ୍ଷରୁ ତାରକା ବୋଲର ଯଶପ୍ରୀତ ବୁମରା ମାତ୍ର ୪ ଓଭରରେ ୧୫ ରନ ଦେଇ ୪ଟି ଓ୍ଵିକେଟ୍ ନେଇଛନ୍ତି। ଉପଅଧିନାୟକ ଅକ୍ଷର ପଟେଲ ୨୭ ରନ ଦେଇ ୩ଟି ଓ୍ଵିକେଟ୍ ନେଇ ଦଳ ବିଜୟରେ ବି ଗୁରୁତ୍ଵପୂର୍ଣ୍ଣ ଭୂମିକା ଗ୍ରହନ କରିଛନ୍ତି। ହାର୍ଦ୍ଦିକ ପାଣ୍ଡ୍ୟା, ବରୁଣ ଚକ୍ରବର୍ତ୍ତୀ ଓ ଅଭିଷେକ ଶର୍ମା ପ୍ରତ୍ୟେକ ଗୋଟିଏ ଲେଖାଏଁ ଓ୍ଵିକେଟ୍ ନେଇଛନ୍ତି।