ଲିଡ୍ସ: ଲିଡ୍ସ କ୍ରିକେଟ୍ ଗ୍ରାଉଣ୍ଡରେ ଆଜିଠୁ ଭାରତ ଓ ଇଂଲଣ୍ଡ ମଧ୍ୟରେ ପ୍ରଥମ ଟେଷ୍ଟ ଖେଳାଯିବ । ଭାରତୀୟ ସମୟନୁସାର ମ୍ୟାଚ୍ ଅପରାହ୍ଣ ୩ଟା ୩୦ରେ ଆରମ୍ଭ ହେବ । ଟସ୍ ଜିତିି ଇଂଲଣ୍ଡର ଅଧିନାୟକ ବେନ ଷ୍ଟୋକ୍ସ ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଛନ୍ତି । ଆଉ ପ୍ରଥମେ ବ୍ୟାଟିଂ କରିବ ଟିମ୍ ଇଣ୍ଡିଆ । ଶୁଭମନ ଗିଲଙ୍କ ଅଧିନାୟକ ଯୁଗ ଆଜି ଆରମ୍ଭ ହେଉଛି । ସାଇ ସୁଦର୍ଶନ ଟେଷ୍ଟରେ ପଦାର୍ପଣ କରିଛନ୍ତି ।  ୮ ବର୍ଷ ପରେ କରୁଣ ନାୟର ଦଳକୁ ପ୍ରତ୍ୟାବର୍ତ୍ତନ କରିଛନ୍ତି । ୩ ଦ୍ରୁତ ବୋଲର ସହ ଶାର୍ଦ୍ଦୁଳ ଠାକୁରଙ୍କୁ ଚୂଡାନ୍ତ ଏକାଦଶରେ ସ୍ଥାନ ମିଳିଛି । 

ସାଇ ସୁଦର୍ଶନଙ୍କୁ ପ୍ରଥମ ଟେଷ୍ଟର ଚୂଡାନ୍ତ ଏକାଦଶରେ ସ୍ଥାନ ମିଳିଛି । ଆଇପିଏଲ ୨୦୨୫ରେ ତାଙ୍କ ପ୍ରଦର୍ଶନ ଚମତ୍କାର ଥିଲା । ସେ ୧୫ଟି ଇନିଂସରେ ୭୫୯ ରନ କରିଛନ୍ତି । ସେ ଅରେଞ୍ଜ କ୍ୟାପ ଜିତିଥିଲେ । ତାଙ୍କର ଏହା କ୍ୟାରିୟରର ପ୍ରଥମ ଟେଷ୍ଟ ହେଲେ ମଧ୍ୟ ଇଂଲଣ୍ଡରେ ତାଙ୍କର ଖେଳିବାର ଅନୁଭବ ରହିଛି । ସେ କାଉଣ୍ଟି ଚାମ୍ପିଅନ୍ସିପ ପୂର୍ବରୁ ଖେଳି ସାରିଛନ୍ତି ।

ସାଇ ସୁଦର୍ଶନଙ୍କ ପ୍ରଥମ ଶ୍ରେଣୀ କ୍ୟାରିୟର ବେଶ ଦମଦାର ରହିଛି । ସେ ୨୯ଟି ମ୍ୟାଚରେ ୪୯ ଇନିଂସରୁ ୧୯୫୭ ରନ କରିଛନ୍ତି । ଏଥିରେ ୭ ଶତକ ଓ ୫ ଅର୍ଦ୍ଧଶତକ ସାମିଲ । ସେ ଭାରତ ପାଇଁ ୩ଟି ଦିନିକିଆ ଓ ଗୋଟିଏ ଟି-୨୦ ମ୍ୟାଚ୍ ଖେଳିଛନ୍ତି । ଏବେ ଟେଷ୍ଟରେ ଚୂଡାନ୍ତ ଏକାଦଶରେ ସାମିଲ ହୋଇ  ସେ ଭାରତ ପାଇଁ ତିନି ଫର୍ମାଟରେ ଖେଳିବାର ଉପଲବ୍ଧି ଅର୍ଜନ କରିଛନ୍ତି । ସାଇ ସୁଦର୍ଶନ ନମ୍ବର ୩ରେ ବ୍ୟାଟିଂ କରିବେ । ଶୁଭମନ ଗିଲ୍ ନମ୍ବର ୪ରେ ବିରାଟ କୋହଲିଙ୍କ ସ୍ଥାନ ନେବେ । 

ଇଂଲଣ୍ଡ ବିପକ୍ଷରେ ଟେଷ୍ଟରେ ସବୁଠୂ ଅଧିକ ରନର ଇନିଂସ ଖେଳିଥିବା ଖେଳାଳି ହେଉଛନ୍ତି କରୁଣ ନାୟର । ସେ ନିଜର ଶେଷ ଟେଷ୍ଟ ୨୦୧୭ରେ ଖେଳିଥିଲେ । ୮ ବର୍ଷ ପରେ ଭାରତୀୟ ଟେଷ୍ଟ ଦଳକୁ ପ୍ରତ୍ୟାବର୍ତ୍ତନ କରିଛନ୍ତି । ହେଲେ ଅଭ୍ୟାସ ସମୟରେ ତାଙ୍କୁ ଆଘାତ ଲାଗିଥିଲା । ତେଣୁ ତାଙ୍କର ପ୍ରଥମ ଟେଷ୍ଟ ଖେଳିବା ନେଇ ସଂଶୟ ଲାଗି ରହିଥିଲା । ହେଲେ ସେ ଏବେ ଫିଟ୍ ହେବା ସହ ଚୂଡାନ୍ତ ଏକାଦଶରେ ତାଙ୍କୁ ସ୍ଥାନ ମିଳିଛି । ନାୟର ୬ଟି ଟେଷ୍ଟର ୭ଟି ଇନିଂସରେ ୩୭୪ ରନ କରିଛନ୍ତି । 

ପ୍ରଥମ ଟେଷ୍ଟ ପାଇଁ ଭାରତର ଚୂଡାନ୍ତ ଏକାଦଶ

ଯଶସ୍ୱୀ ଜୟସ୍ୱାଲ, କେଏଲ ରାହୁଲ, ସାଇ ସୁଦର୍ଶନ, ଶୁଭମନ ଗିଲ(ଅଧିନାୟକ), ଋଷଭ ପନ୍ତ(ୱିକେଟ୍ କିପର), କରୁଣ ନାୟର, ରବୀନ୍ଦ୍ର ଜାଡେଜା, ଶାର୍ଦ୍ଦୁଳ ଠାକୁର, ଯଶପ୍ରୀତ ବୁମରା, ମହମ୍ମଦ ସିରାଜ, ପ୍ରସିଦ୍ଧ କୃଷ୍ଣା । 

ଇଂଲଣ୍ଡର ଚୂଡାନ୍ତ ଏକାଦଶ

ଜ୍ୟାକ କ୍ରାଉଲି, ବେନ ଡକେଟ୍‌, ଓଲି ପୋପ, ଜୋ ରୁଟ, ହ୍ୟାରି ବ୍ରୁକ, ବେନ ଷ୍ଟୋକ୍ସ(ଅଧିନାୟକ), ଜେମି ସ୍ମିଥ(ୱିକେଟ୍ କିପର), କ୍ରିସ ୱକ୍ସ, ବ୍ରାୟଡନ କର୍ସ, ଜୋଶ ଟଙ୍ଗ, ଶୋଏବ ବଶିର ।