ନୂଆଦିଲ୍ଲୀ: ଏସିଆ କପ୍ ୨୦୨୫ରେ  ଟିମ୍ ଇଣ୍ଡିଆ  ସେପ୍ଟେମ୍ବର ୧୦ରେ ନିଜର ପ୍ରଥମ ମ୍ୟାଚ୍ ଖେଳିବ। ଭାରତୀୟ ଦଳ ୬ ଦିନ ପୂର୍ବରୁ ଦୁବାଇ ପହଞ୍ଚିବାକୁ ଯାଉଛି। ରିପୋର୍ଟ ଅନୁଯାୟୀ, ଟିମ୍ ଇଣ୍ଡିଆ ସେପ୍ଟେମ୍ବର ୪ରେ ଦୁବାଇରେ ପହଞ୍ଚିବ। ଆର୍ଶ୍ଚଜ୍ୟକର କଥା ହେଉଛି ସମସ୍ତ ଖେଳାଳି ପୃଥକ ପୃଥକ ଭାବରେ ସେଠାରେ ପହଞ୍ଚିବାକୁ ଯାଉଛନ୍ତି। ସାଧାରଣତଃ ଟିମ୍ ଇଣ୍ଡିଆର ସମସ୍ତ ଖେଳାଳି ମୁମ୍ବାଇରେ ଏକାଠି ହୁଅନ୍ତି ଏବଂ ସେଠାରୁ ଯାତ୍ରା କରନ୍ତି। କିନ୍ତୁ ଏଥର ସମସ୍ତ ଖେଳାଳି ଭିନ୍ନ ଭିନ୍ନ ସମୟରେ ନିଜ ନିଜ ସ୍ଥାନରୁ ଦୁବାଇ ପହଞ୍ଚିବେ। ଖେଳାଳିଙ୍କ ଲଜିଷ୍ଟିକ୍ସ ଏବଂ ଯାତ୍ରା ସୁବିଧାକୁ ଧ୍ୟାନରେ ରଖି ବିସିସିଆଇ ଏହି ନିଷ୍ପତ୍ତି ନେଇଛି।

ବିସିସିଆଇର ଜଣେ ବରିଷ୍ଠ ଅଧିକାରୀ କହିଛନ୍ତି, 'ସମସ୍ତ ଖେଳାଳି ସେପ୍ଟେମ୍ବର ୪ ସନ୍ଧ୍ୟା ସୁଦ୍ଧା ଦୁବାଇରେ ପହଞ୍ଚିବେ ଏବଂ ପ୍ରଥମ ନେଟ୍ ସେସନ୍ ସେପ୍ଟେମ୍ବର ୫ରେ ଆଇସିସି ଏକାଡେମୀରେ ଅନୁଷ୍ଠିତ ହେବ। ଲଜିଷ୍ଟିକ୍ ସୁବିଧାକୁ ଧ୍ୟାନରେ ରଖି, ଖେଳାଳିମାନଙ୍କୁ ସେମାନଙ୍କ ସହରରୁ ଦୁବାଇ ଯିବାକୁ ଅନୁମତି ଦିଆଯିବ।' ବିସିସିଆଇ ଅଧିକାରୀ ଏହା ମଧ୍ୟ କହିଛନ୍ତି, 'କିଛି ଖେଳାଳି ମୁମ୍ବାଇରୁ ଯାତ୍ରା କରିବେ, କିନ୍ତୁ ଅନ୍ୟ ଖେଳାଳିମାନଙ୍କୁ ପ୍ରଥମେ ମୁମ୍ବାଇ ଆସି ତା'ପରେ ଦୁବାଇ ଯିବାକୁ କୁହାଯିବ ନାହିଁ। ସେମାନେ ନିଜ ନିଜ ସହରରୁ ସିଧାସଳକ ଦୁବାଇ ଯାତ୍ରା କରିବେ।

ଭାରତ ଏସିଆ କପ୍ ପାଇଁ ୧୫ ଜଣିଆ ଦଳ ଚୟନ କରିଛି। ସୂର୍ଯ୍ୟକୁମାର ଯାଦବଙ୍କୁ ଦଳର ଅଧିନାୟକ କରାଯାଇଥିବା ବେଳେ ଶୁଭମନ ଗିଲଙ୍କୁ ଉପ-ଅଧିନାୟକ ଦାୟିତ୍ୱ ମିଳିଛି। ତାଙ୍କ ବ୍ୟତୀତ ଅଭିଷେକ ଶର୍ମା, ତିଲକ ବର୍ମା, ହାର୍ଦ୍ଦିକ ପାଣ୍ଡ୍ୟା, ଶିବମ ଦୁବେ, ଅକ୍ଷର ପଟେଲ, ଜିତେଶ ଶର୍ମା, ଯଶପ୍ରୀତ ବୁମରାହ, ବରୁଣ ଚକ୍ରବର୍ତ୍ତୀ, ଅର୍ଶଦୀପ ସିଂହ, କୁଲଦୀପ ଯାଦବ, ସଞ୍ଜୁ ସାମସନ, ହର୍ଷିତ ରାଣା, ରିଙ୍କୁ ସିଂହ ମଧ୍ୟ ଦଳରେ ସ୍ଥାନ ପାଇଛନ୍ତି।

କାର୍ଯ୍ୟସୂଚୀ ଅନୁସାରେ ଭାରତ ସେପ୍ଟେମ୍ବର ୧୦ରେ ୟୁଏଇ ସହିତ ନିଜର ପ୍ରଥମ ମୁକାବିଲା ଖେଳିବ। ଏହା ପରେ ସେପ୍ଟେମ୍ବର ୧୪ ରେ ଦୁବାଇରେ ପାକିସ୍ତାନ ବିପକ୍ଷରେ ବହୁପ୍ରତୀକ୍ଷିତ  ମ୍ୟାଚ୍ ହେବ। ଭାରତର ତୃତୀୟ ଗ୍ରୁପ୍ ମ୍ୟାଚ୍ ସେପ୍ଟେମ୍ବର ୧୯ ରେ ଓମାନ ବିପକ୍ଷରେ ରହିଛି।