ନାଗପୁର: ଆରଏସଏସର ୧୦୦ତମ ବାର୍ଷିକୀ ଉପଲକ୍ଷେ ଆୟୋଜିତ ତିନି ଦିନିଆ ସମ୍ମିଳନୀର ଶେଷ ଦିନରେ ଆରଏସଏସ ମୁଖ୍ୟ ମୋହନ ଭାଗବତ ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଟିପ୍ପଣୀ କରିଛନ୍ତି। ମୋହନ ଭାଗବତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ୭୫ତମ ଜନ୍ମଦିନ ପରେ ରାଜନୀତିରୁ ଅବସର ନେବାର କଳ୍ପନାଜଳ୍ପନାକୁ ଖାରଜ କରିଛନ୍ତି। କୁହାଯାଉଥିଲା ଯେ ବିଜେପି ଏବଂ ସଂଘର ପରମ୍ପରା ଅନୁଯାୟୀ, ନେତାମାନେ ୭୫ ବର୍ଷ ବୟସ ପୂରଣ କରିବା ପରେ ସକ୍ରିୟ ରାଜନୀତିରୁ ଅବସର ନିଅନ୍ତି।

ପ୍ରଧାନମନ୍ତ୍ରୀ ମୋଦୀଙ୍କ ଜନ୍ମର ଛଅ ଦିନ ପୂର୍ବରୁ ଜନ୍ମ ହୋଇଥିବା ମୋହନ ଭାଗବତ ଗୁରୁବାର ସନ୍ଧ୍ୟାରେ ସାମ୍ବାଦିକଙ୍କ ସହ ଆଲୋଚନା ବେଳେ କହିଛନ୍ତି,  ମୁଁ କେବେ କହିନାହିଁ ଯେ ମୁଁ ଅବସର ନେବି କିମ୍ବା ଅନ୍ୟ କେହି ୭୫ ବର୍ଷ ବୟସରେ ଅବସର ନେବା ଉଚିତ... ଆମେ ସଂଘ ଯାହା କହିବ ତାହା କରିବୁ। ୭୫ ବର୍ଷ ପରେ ରାଜନୀତିରୁ ଅବସର ନେବା ଉଚିତ କି ପ୍ରଶ୍ନର ଉତ୍ତରରେ, ଆରଏସଏସ ମୁଖ୍ୟ ମୋହନ ଭାଗବତ କହିଛନ୍ତି, ମୁଁ ମୋରୋପନ୍ତଙ୍କ ବକ୍ତବ୍ୟକୁ ଆଧାର କରି ଏହା କହିଥିଲି। କିନ୍ତୁ ମୁଁ କହି ନଥିଲି ଯେ ମୁଁ ଅବସର ନେବି କିମ୍ବା ଅନ୍ୟ କେହି ଅବସର ନେବା ଉଚିତ। ଆମେ ଜୀବନର ଯେକୌଣସି ସମୟରେ ଅବସର ନେବାକୁ ପ୍ରସ୍ତୁତ। ସଂଘ ଆମକୁ ଯେଉଁ ସମୟ ପର୍ଯ୍ୟନ୍ତ କାମ କରିବାକୁ ଚାହୁଁଛି, ଆମେ ସେହି ସମୟ ପର୍ଯ୍ୟନ୍ତ ସଂଘ ପାଇଁ କାମ କରିବାକୁ ମଧ୍ୟ ପ୍ରସ୍ତୁତ।

ଅନୁପ୍ରବେଶ ସମ୍ପର୍କରେ ଆରଏସଏସ ମୁଖ୍ୟ ମୋହନ ଭାଗବତ କହିଛନ୍ତି, ଦେଶରେ ଅନୁପ୍ରବେଶ ବନ୍ଦ ହେବା ଉଚିତ। ସରକାର ଏ ନେଇ ଉଦ୍ୟମ ଚଳାଇଛନ୍ତି , ଏହା ଧୀରେ ଧୀରେ ଆଗକୁ ବଢ଼ୁଛି। କିନ୍ତୁ ଏହା ସମାଜର ହାତରେ ଯେ ଆମେ ଆମ ଦେଶରେ  ନିଜ ଲୋକଙ୍କୁ ନିଯୁକ୍ତି ଦେବୁ। ଆମ ଦେଶରେ ମୁସଲିମ ନାଗରିକ ମଧ୍ୟ ଅଛନ୍ତି। ସେମାନଙ୍କୁ ମଧ୍ୟ ନିଯୁକ୍ତି ଦିଆଯିବାର ଆବଶ୍ୟକତା ଅଛି। ଯଦି ଆପଣ ମୁସଲମାନମାନଙ୍କୁ ନିଯୁକ୍ତି ଦେବାକୁ ଚାହୁଁଛନ୍ତି, ତେବେ ସେମାନଙ୍କୁ ଦିଅନ୍ତୁ। ଆପଣ ବାହାରୁ ଆସିଥିବା ଲୋକଙ୍କୁ କାହିଁକି ଦେଉଛନ୍ତି? ସେମାନେ ନିଜ ଦେଶକୁ ପରିଚାଳନା କରିବା ଉଚିତ ବୋଲି ଭାଗବତ କହିଛନ୍ତି।