ନୂଆଦିଲ୍ଲୀ: ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜାପାନ ଏବଂ ଚୀନ ଗସ୍ତ ପାଇଁ ଯାତ୍ରା କରିଛନ୍ତି। ପ୍ରଧାନମନ୍ତ୍ରୀ ମୋଦୀ ଅଗଷ୍ଟ ୨୯ ଏବଂ ୩୦ ତାରିଖରେ ଜାପାନରେ ରହିବେ ଏବଂ ଏଠାରେ ୧୫ତମ ଭାରତ-ଜାପାନ ବାର୍ଷିକ ଶିଖର ସମ୍ମିଳନୀରେ ଅଂଶଗ୍ରହଣ କରିବେ। ଏହା ପରେ ପ୍ରଧାନମନ୍ତ୍ରୀ ମୋଦି ଅଗଷ୍ଟ ୩୧ ରୁ ସେପ୍ଟେମ୍ବର ୧ ତାରିଖ ୨୦୨୫ ପର୍ଯ୍ୟନ୍ତ ଚୀନ ଗସ୍ତରେ ରହିବେ। ଏଠାରେ ପ୍ରଧାନମନ୍ତ୍ରୀ ମୋଦି ସାଂଘାଇ ସହଯୋଗ ସଂଗଠନ (SCO) ଶିଖର ସମ୍ମିଳନୀରେ ଯୋଗ ଦେବେ। ଦୁଇ ଦେଶ ଗସ୍ତ କରିବା ପୂର୍ବରୁ, ପ୍ରଧାନମନ୍ତ୍ରୀ ମୋଦୀ ଟ୍ୱିଟ୍ କରି ଏହି ଗସ୍ତ ବିଷୟରେ ଅନେକ ଗୁରୁତ୍ୱପୂର୍ଣ୍ଣ କଥା କହିଛନ୍ତି।
ପ୍ରଧାନମନ୍ତ୍ରୀ ମୋଦୀ ଏକ୍ସରେ ଲେଖିଛନ୍ତି ଆସନ୍ତା କିଛି ଦିନ ମଧ୍ୟରେ, ମୁଁ ବିଭିନ୍ନ ଦ୍ୱିପାକ୍ଷିକ ଏବଂ ବହୁପାକ୍ଷିକ କାର୍ଯ୍ୟକ୍ରମରେ ଅଂଶଗ୍ରହଣ କରିବା ପାଇଁ ଜାପାନ ଏବଂ ଚୀନ ଗସ୍ତ କରୁଛି। ଜାପାନରେ, ମୁଁ ୧୫ତମ ବାର୍ଷିକ ଭାରତ-ଜାପାନ ଶିଖର ସମ୍ମିଳନୀରେ ଯୋଗଦେବି ଏବଂ ପ୍ରଧାନମନ୍ତ୍ରୀ ଶିଗେରୁ ଇଶିବାଙ୍କ ସହ ଆଲୋଚନା କରିବି। ଆମର ସ୍ୱତନ୍ତ୍ର ରଣନୈତିକ ଏବଂ ବିଶ୍ୱସ୍ତରୀୟ ସହଭାଗୀତାକୁ ଆହୁରି ନିବିଡ଼ କରିବା ଏବଂ ଅର୍ଥନୈତିକ ଏବଂ ସାଂସ୍କୃତିକ ସମ୍ପର୍କକୁ ପ୍ରୋତ୍ସାହିତ କରିବା ଉପରେ ଧ୍ୟାନ ଦିଆଯିବ। ମୁଁ ସେଣ୍ଡାଇରେ ଏକ ସେମିକଣ୍ଡକ୍ଟର କାରଖାନା ମଧ୍ୟ ପରିଦର୍ଶନ କରିବି, ଯେଉଁଠାରେ ମୁଁ ଉଦୀୟମାନ ପ୍ରଯୁକ୍ତିବିଦ୍ୟା, AI ଏବଂ ସେମିକଣ୍ଡକ୍ଟର ଭଳି କ୍ଷେତ୍ରରେ ଆମର ସହଯୋଗର ଭବିଷ୍ୟତ ଦିଗ ଉପରେ ଆଲୋଚନା କରିବି।
ପ୍ରଧାନମନ୍ତ୍ରୀ ମୋଦୀ ଏହା ମଧ୍ୟ କହିଛନ୍ତି, ମୁଁ ଚୀନର ତିଆନଜିନରେ ସାଂଘାଇ ସହଯୋଗ ସଂଗଠନ (SCO) ଶିଖର ସମ୍ମିଳନୀରେ ଯୋଗଦେବି। ଏହା ଏକ ଏପରି ମଞ୍ଚ ଯେଉଁଠାରେ ଭାରତ ସର୍ବଦା ସକ୍ରିୟ ଏବଂ ଗଠନମୂଳକ ଭୂମିକା ଗ୍ରହଣ କରିଆସିଛି। ବିଭିନ୍ନ ଚ୍ୟାଲେଞ୍ଜର ମୁକାବିଲା ପାଇଁ ଭାରତ ଏସସିଓ ସଦସ୍ୟମାନଙ୍କ ସହିତ ନିବିଡ଼ ଭାବରେ କାମ କରିବା ଜାରି ରଖିବ। ମୁଁ ଶିଖର ସମ୍ମିଳନୀରେ ରାଷ୍ଟ୍ରପତି ସି ଜିନପିଙ୍ଗ, ରାଷ୍ଟ୍ରପତି ପୁଟିନ ଏବଂ ଅନ୍ୟ ନେତାମାନଙ୍କୁ ମଧ୍ୟ ଭେଟିବି।
Also read: ଟ୍ରମ୍ପଙ୍କ ଟ୍ରାରିଫ୍କୁ ନେଇ ଚିନ୍ତା ନାହିଁ! ୨୦୩୮ ସୁଦ୍ଧା ଏମିତି କମାଲ୍ କରିବ ଭାରତ, ଆମେରିକା ପାଇଁ ପାଲଟିବ ବଡ଼ ସମସ୍ୟା