ନୂଆଦିଲ୍ଲୀ:  ଚାମ୍ପିଅନ୍ସ ଟ୍ରଫି ୨୦୨୫ରେ ଶେଷ ଥର ଅନ୍ତର୍ଜାତୀୟ  କ୍ରିକେଟ୍ ଖେଳିଥିବା ମହମ୍ମଦ ଶାମିଙ୍କୁ ଏସିଆ କପ୍ ୨୦୨୫ ଦଳରେ ଚୟନ କରାଯାଇ ନାହିଁ । ଲଗାତାର ବଡ ବଡ ଟୁର୍ଣ୍ଣାମେଣ୍ଟ ଓ ସିରିଜରେ ତାଙ୍କୁ ଅଣଦେଖା କରାଯାଉଛି । ଏହା ପରେ ଶାମିଙ୍କ ଅବସର ନେଇ ପ୍ରଶ୍ନ ଉଠିଛି । ଯେବେ ଶାମିଙ୍କୁ ଏହି ପ୍ରଶ୍ନ କରାଗଲା ସେ ସମାଲୋଚକଙ୍କୁ ଦୃଢ ଜବାବ ଦେଇଛନ୍ତି । ସେ କହିଛନ୍ତି, ମୋତେ କୁହନ୍ତୁ ମୁଁ କାହା ଜୀବନର ପଥର ପାଲଟିଛି କି, ଯଦ୍ୱାରା ମୁଁ କ୍ରିକେଟରୁ ଅବସର ନେଇଯିବି । ଶାମି ଚାମ୍ପିଅନ୍ସ ଟ୍ରଫିରେ ଭାରତର ବିଜୟରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ । ସେ ଟୁର୍ଣ୍ଣାମେଣ୍ଟରେ ୯ ୱିକେଟ୍ ନେଇ ସର୍ବାଧିକ ୱିକେଟ୍ ହାସଲକାରୀ ବୋଲର ତାଲିକାରେ ଯୁଗ୍ମ ଭାବେ ଦ୍ୱିତୀୟ ସ୍ଥାନରେ ଥିଲେ ।

ଏାମି ନ୍ୟୁଜ ୨୪ ସହ ଆଲୋଚନା ବେଳେ କହିଛନ୍ତି, ଯଦି କାହାକୁ କିଛି ସମସ୍ୟା ହେଉଛି ତେବେ ମୋତେ ଜଣାନ୍ତୁ, କଣ ମୋର ଅବସରରେ ତାଙ୍କ ଜୀବନ ସୁଧୁରିଯିବ । ମୋତେ ଜଣାନ୍ତୁ ଯେ, ମୁଁ କଣ କାହା ଜୀବନରେ ପଥର ପାଲଟିଛି ଯେ, ଅବସର ନେଇଯିବି । ଯେଉଁ ଦିନ ମୁଁ ବୋର ହୋଇଯିବି ତେବେ ଖେଳ ଛାଡି ଦେବି । ଆପଣ ମୋତେ ଚୟନ କରନ୍ତୁ କି ନ କରନ୍ତୁ ମୁଁ ପରିଶ୍ରମ କରି ଚାଲିବି ଏବଂ ଖେଳି ଚାଲିବି । ମୋତେ ଅନ୍ତର୍ଜାତୀୟ ମ୍ୟାଚ୍ ପାଇଁ ଚୟନ ନ କଲେ ମୁଁ ଘରୋଇ କ୍ରିକେଟ୍ ଖେଳି ଚାଲିବି । ଏବେ ଅବସର  ନେବା ପାଇଁ ସମୟ ହୋଇନି ।

ମହମ୍ମଦ ଶାମି କହିଛନ୍ତି, ସେ ଘରୋଇ କ୍ରିକେଟ୍ ଖେଳି କଡା ପରିଶ୍ରମ କରିବାକୁ ପ୍ରସ୍ତୁତ ଏବଂ ତାଙ୍କର ଧ୍ୟାନ ଭାରତୀୟ ଦଳକୁ ପ୍ରତ୍ୟାବର୍ତ୍ତନ କରି ଦିନିକିଆ ବିଶ୍ୱକପ୍ ୨୦୨୭ ଜିତାଇବାର ଅଛି । ମୋର କେବଳ ଗୋଟିଏ ସ୍ୱପ୍ନ ଦିନିକିଆ ବିଶ୍ୱକପ୍ ଜିତିବା । ମୁଁ ସେହି ଦଳର ଅଂଶ ହେବାକୁ ଚାହୁଁଛି ଯିଏ ଦମଦାର ପ୍ରଦର୍ଶନ କରି ବିଶ୍ୱକପ୍ ଜିତି ଘରକୁ ଫେରୁ । ୨୦୨୩ରେ ଆମେ ବହୁତ ନିକଟତର ଥିଲୁ । ଆଶାବାଦୀ ଥିଲୁ କିନ୍ତୁ ଡର ଥିଲା ଯେ, ଆମେ ଲଗାତାର ମ୍ୟାଚ୍ ଜିତି ଚାଲିଥିଲୁ । ଆଉ ନକଆଉଟରେ ଝୁଣ୍ଟିଗଲୁ ।