ନୂଆଦିଲ୍ଲୀ: ଦେଶର ରାଜଧାନୀରେ ବଢ଼ୁଥିବା ରାଜନୈତିକ ଉତ୍ତେଜନା ଏବଂ ବିରୋଧୀଙ୍କ ଆକ୍ରମଣ ମଧ୍ୟରେ ଦେଶର ନିର୍ବାଚନ ଆୟୋଗ (ECI) ଏବଂ ସ୍ପେଶାଲ ଇଣ୍ଟେନସିଭ୍ ରିଭିଜନ (SIR) ର ସୁରକ୍ଷା ପାଇଁ ଆଗେଇ ଆସିଛନ୍ତି ୧୨୪ ଜଣ ପୂର୍ବତନ ପ୍ରଶାସନିକ ଅଧିକାରୀ। ଏହି ଅବସରପ୍ରାପ୍ତ IAS, IFS ଏବଂ ବିଭିନ୍ନ ଅଲ୍-ଇଣ୍ଡିଆ ସର୍ଭିସର ଅଧିକାରୀମାନେ ଏକ ମିଳିତ ଖୋଲା ଚିଠି ଜାରି କରି ନିର୍ବାଚନ ପ୍ରକ୍ରିୟା ଉପରେ ଅନାବଶ୍ୟକ ପ୍ରଶ୍ନ ଉଠାଉଥିବା ବ୍ୟକ୍ତିମାନଙ୍କୁ କଡ଼ା ଜବାବ ଦେଇଛନ୍ତି।

ଚିଠିରେ ସ୍ପଷ୍ଟ ଭାବେ କୁହାଯାଇଛି ଯେ, ନିର୍ବାଚନରେ କୌଣସି ପ୍ରକାରର ଅନିୟମିତତା କିମ୍ବା ଜାଲିଆତି ହୋଇଥିବା ନେଇ କେବଳ ପବନରେ ଅଭିଯୋଗ ଆଣିଲେ ଚଳିବ ନାହିଁ, ବରଂ ଏହାର ଠୋସ୍ ଏବଂ ବିଶ୍ୱସନୀୟ ପ୍ରମାଣ ଦାଖଲ କରିବାକୁ ପଡ଼ିବ। ପୂର୍ବତନ ପ୍ରଶାସକମାନେ ରାଜନୈତିକ ଦଳଗୁଡ଼ିକର ଦୋମୁହାଁ ନୀତିକୁ କଡ଼ା ସମାଲୋଚନା କରିଛନ୍ତି। ସେମାନେ ପ୍ରଶ୍ନ କରିଛନ୍ତି ଯେ, ଯେତେବେଳେ କୌଣସି ଦଳ ନିର୍ବାଚନ ଜିତେ, ସେତେବେଳେ ସେହି ସମାନ ଇଲେକ୍ଟ୍ରୋରାଲ୍ ସିଷ୍ଟମ ସେମାନଙ୍କ ପାଇଁ ସମ୍ପୂର୍ଣ୍ଣ ଠିକ୍ ହୋଇଯାଏ, କିନ୍ତୁ ପରାଜୟ ବରଣ କରିବା ମାତ୍ରେ ସେହି ସମାନ ବ୍ୟବସ୍ଥାକୁ 'ଫିକ୍ସଡ୍'  ବୋଲି କୁହାଯାଏ।

ଉଦାହରଣ ଦେଇ ସେମାନେ କହିଛନ୍ତି ଯେ, ଏହି ସମାନ ନିର୍ବାଚନ ଆୟୋଗଙ୍କ ଅଧୀନରେ ହିଁ କେନ୍ଦ୍ରର ଶାସକ ଦଳ ହିମାଚଳ ପ୍ରଦେଶ, କର୍ଣ୍ଣାଟକ, ତେଲେଙ୍ଗାନା, ଝାଡ଼ଖଣ୍ଡ ଏବଂ ଜମ୍ମୁ-କାଶ୍ମୀର ଭଳି ରାଜ୍ୟରେ ନିର୍ବାଚନ ହାରିଛି ଏବଂ ୨୦୨୪ ମସିହାରେ ନିଜର ଏକକ ସଂଖ୍ୟାଗରିଷ୍ଠତା ମଧ୍ୟ ହରାଇଛି। ଭାରତୀୟ ନିର୍ବାଚନ ପ୍ରଣାଳୀର ଅତୀତ ଏବଂ ବର୍ତ୍ତମାନର ସ୍ଥିତିକୁ ତୁଳନା କରି ଅଧିକାରୀମାନେ କହିଛନ୍ତି ଯେ, ଦେଶର ଭୋଟିଂ ବ୍ୟବସ୍ଥା ଏବେ ବୁଥ୍ କ୍ୟାପ୍ଚରିଂ, ବାହୁବଳୀଙ୍କ ଆତଙ୍କ, ବନ୍ଧୁକ ମୁନରେ ମତପେଟି ଲୁଟ୍ ଏବଂ ହିଂସାର ଯୁଗଠାରୁ ବହୁତ ଆଗକୁ ବାହାରି ଆସିଛି।

ବର୍ତ୍ତମାନର ସୁରକ୍ଷା ବ୍ୟବସ୍ଥାକୁ ପ୍ରଶଂସା କରି ସେମାନେ ଇଲେକ୍ଟ୍ରୋନିକ୍ ଭୋଟିଂ ମେସିନ୍ (EVM)ର ସିଲ୍ ପ୍ରକ୍ରିୟା, ଷ୍ଟ୍ରଙ୍ଗ୍-ରୁମର କଡ଼ା ପହରା ଏବଂ ଭୋଟର-ଭେରିଫାଏଡ୍ ପେପର ଅଡିଟ୍ ଟ୍ରେଲ୍ (VVPAT) ସତ୍ୟାପନ ବ୍ୟବସ୍ଥା ସମ୍ପୂର୍ଣ୍ଣ ସୁରକ୍ଷିତ ବୋଲି ଦର୍ଶାଇଛନ୍ତି। ୨୦୨୫ ବିହାର ବିଧାନସଭା ନିର୍ବାଚନର ଉଦାହରଣ ଦେଇ ଦର୍ଶାଇଛନ୍ତି ଯେ, ୧୯୫୧ ମସିହା ପରଠାରୁ ପ୍ରଥମ ଥର ପାଇଁ ସେଠାରେ ବିନା କୌଣସି ପୁନଃମତଦାନରେ ସର୍ବାଧିକ ଭୋଟ୍ ହାର ସହ ସମ୍ପୂର୍ଣ୍ଣ ଶାନ୍ତିପୂର୍ଣ୍ଣ ଭାବେ ନିର୍ବାଚନ ଶେଷ ହୋଇଥିଲା।

ଭୋଟର ତାଲିକା ସଂଶୋଧନକୁ ପୂର୍ଣ୍ଣ ସମର୍ଥନ ଜଣାଇ ଚିଠିରେ କୁହାଯାଇଛି ଯେ, ୨୦୦୩ ପରଠାରୁ ଅନେକ ସ୍ଥାନରେ ଭୋଟର ଲିଷ୍ଟର ଠିକ୍ ଭାବେ ଯାଞ୍ଚ ହୋଇନଥିଲା। ବିହାର SIR ଯାଞ୍ଚ ସମୟରେ ପ୍ରାୟ ୨୨ ଲକ୍ଷ ମୃତ ଭୋଟର, ୭ ଲକ୍ଷ ନକଲି ନାମ ଏବଂ ଲକ୍ଷାଧିକ ସ୍ଥାୟୀ ଭାବେ ସ୍ଥାନାନ୍ତରିତ ଲୋକଙ୍କ ନାମ ତାଲିକାରୁ ବାହାର କରାଯାଇଥିଲା।