ଏଣିକି ଏଟିଏମରୁ ଟଙ୍କା ଉଠାଣ ହେବ ମହଙ୍ଗା । ପ୍ରତି ଟ୍ରାଞ୍ଜାକ୍ସନ ଉପରେ ଗ୍ରାହକଙ୍କୁ ପୂର୍ବପେକ୍ଷା ଅଧିକ ଚାର୍ଜ ଦେବାକୁ ପଡ଼ିବ । ଏନେଇ  ଭାରତୀୟ ରିଜର୍ଭ ବ୍ୟାଙ୍କ ବା RBI ATM ବିନିମୟ ଶୁଳ୍କ ବୃଦ୍ଧିକୁ ଅନୁମୋଦନ କରିଛି। ମେ ପହିଲାରୁ ବଦଳିବାକୁ ଯାଉଥିବା ନିୟମ ଅନୁସାରେ, ହୋମ ବ୍ୟାଙ୍କ ନେଟଓ୍ବାର୍କ ବାହାରେ ଯଦି କୌଣସି ଏଟିଏମ ମେଶିନରେ ଟ୍ରାଞ୍ଜାକସନ କରିବେ କିମ୍ବା ବାଲାନ୍ସ ଚେକ କରିବେ, ତେବେ ୟୁଜରଙ୍କୁ ଅଧିକ ଚାର୍ଜ ଦେବାକୁ ପଡ଼ିବ । ଭାରତୀୟ ରାଷ୍ଟ୍ରୀୟ ପେମେଣ୍ଟ ନିଗମ (ଏନପିସିଆଇ)ର ପ୍ରସ୍ତାବ ଆଧାରରେ ଆରବିଆଇ ଦ୍ବାରା ଅନୁମୋଦିତ ସଂଶୋଧନର ଏକ ଅଂଶ ।

ବର୍ତ୍ତମାନ ସୁଦ୍ଧା ଯଦି ଗ୍ରାହକ ନିଜର ହାମ ବ୍ୟାଙ୍କର ଏଟିଏମ ବଦଳର ଅନ୍ୟ ବ୍ୟାଙ୍କର ଏଟିଏମରୁ ଟଙ୍କା ଉଠାଉଥିଲେ, ତେବେ ତାଙ୍କୁ ପ୍ରତି ଟ୍ରାଞ୍ଜାକସନ ପିଛା ୧୭ ଟଙ୍କା ଚାର୍ଜ ଦେବାକୁ ପଡ଼ୁଥିଲା । ମାତ୍ର ଏବେ ମେ ୧ରୁ ତାହା ବୃଦ୍ଧି ପାଇ ୧୯ ଟଙ୍କା ହୋଇଯିବ । ସେହିପରି ଗ୍ରାହକ ନିଜ ବ୍ୟାଙ୍କ ବ୍ୟତୀତ ଅନ୍ୟ ବ୍ୟାଙ୍କ ଏଟିମିଏମରେ ବାଲାନ୍ସ କରୁଥିଲେ ପୂର୍ବରୁ ୬ ଟଙ୍କା ଚାର୍ଜ ରହିଥିବା ବେଳେ ଏବେ ତାହା ୭ ଟଙ୍କା ହୋଇଯିବ । ବ୍ୟାଙ୍କ ୟୁଜର ନିଜର ଫ୍ରି ମନ୍ଥଲି ଟ୍ରାଞ୍ଜାକସନ ଲିମିଟ ପରେ ଅର୍ଥ ଉଠାଣ କଲେ ଏହି ଚାର୍ଜ ଲାଗୁ ହେବ ।

ତେବେ ଏ ଚାର୍ଜ ବୃଦ୍ଧି ଯୋଗୁଁ ଛୋଟ ବ୍ୟାଙ୍କଗୁଡ଼ିକ ଅଧିକ ପ୍ରଭାବିତ ହେବା ଆଶଙ୍କା କରାଯାଉଛି। କାରଣ ହେଉଛି ସେମାନଙ୍କର ସୀମିତ ଏଟିଏମ୍ ନେଟୱାର୍କ ଯୋଗୁଁ ସେମାନେ ଅନ୍ୟ ବ୍ୟାଙ୍କର ଏଟିଏମ୍ ଉପରେ ଅଧିକ ନିର୍ଭରଶୀଳ। ଏହି ଏକ୍ସଚେଞ୍ଜ ଫି ବୃଦ୍ଧି ସିଧାସଳଖ ଗ୍ରାହକଙ୍କ ଉପରେ ମଧ୍ୟ ପ୍ରଭାବ ପକାଇବ। ତେବେ ଅତ୍ୟଧିକ ଶୁଳ୍କ ଏଡାଇବା ପାଇଁ, ଯେଉଁମାନେ ବାରମ୍ବାର ATM  ବ୍ୟବହାର କରୁଛନ୍ତି, ସେମାନେ ନିଜ ବ୍ୟାଙ୍କର ATM  ବ୍ୟବହାର କରିପାରିବେ ଅଥବା ଡିଜିଟାଲ୍ ପେମେଣ୍ଟ ପଦ୍ଧତି ମଧ୍ୟ ଗ୍ରହଣ କରିପାରିବେ।