ଅହମ୍ମଦାବାଦ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପୈତୃକ ଗାଁ ବଡ଼ନଗରରେ ୩୦୦ କୋଟି ଟଙ୍କା ବ୍ୟୟରେ ଏକ ସଂଗ୍ରହାଳୟ ନିର୍ମାଣ କରାଯାଇଛି। ଏଥିରେ ୨୫୦୦ ବର୍ଷ ପୁରୁଣା ସଂସ୍କୃତିର ପାଖାପାଖି ୫ ହଜାର କଳାକୃତି ପ୍ରଦର୍ଶିତ ହୋଇଛି। ପ୍ରଧାନମନ୍ତ୍ରୀ ମୋଦୀ ଯେଉଁ ପ୍ରାଥମିକ ବିଦ୍ୟାଳୟରେ ଶିକ୍ଷା ଗ୍ରହଣ କରିଥିଲେ ତାହାକୁ ପ୍ରେରଣା କମ୍ପ୍ଲେକ୍ସ ଭାବରେ ବିକଶିତ କରାଯାଇଛି। କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଗୁରୁବାର ଏହି ସଂଗ୍ରହାଳୟ, ପ୍ରେରଣା ପରିସର ଏବଂ ଏକ କ୍ରୀଡ଼ା ପରିସରକୁ ଉଦଘାଟନ କରିବେ। ମେହସାନା ଜିଲ୍ଲାରେ ଅବସ୍ଥିତ ୱାଡନଗର ଏକ ପ୍ରାଚୀନ ସହର। ଏହାକୁ ଦେଶରେ ବିକଶିତ ହେଉଥିବା ବୌଦ୍ଧ ସର୍କିଟ ସହ ମଧ୍ୟ ସଂଯୋଗ କରାଯାଇଛି। ବଡ଼ନଗରରେ ୨୫୦୦ ବର୍ଷ ପୁରୁଣା ସଂସ୍କୃତିର କଳାକୃତି ଦେଖିବାକୁ ମିଳିଛି। ପ୍ରତ୍ନତତ୍ତ୍ୱ ବିଭାଗର ଖନନରୁ ଏହି ପ୍ରାଚୀନ ସଂସ୍କୃତିର ଅବଶିଷ୍ଟ ଅଂଶ ଠାବ ହୋଇଛି। ପ୍ରାଚୀନ ସଂସ୍କୃତିର ଅବଶିଷ୍ଟ ଅଂଶ ଏବଂ ପ୍ରାଚୀନ ସହରର ଜୀବନ୍ତ ଅବଶେଷକୁ ସଂଯୋଗ କରି ୨୯୮ କୋଟି ଟଙ୍କା ବ୍ୟୟରେ ଏକ ପ୍ରତ୍ନତାତ୍ତ୍ୱିକ ସଂଗ୍ରହାଳୟ ନିର୍ମାଣ କରାଯାଇଛି। ଅଡିଓ ଭିଡିଓ ଫିଲ୍ମ ଜରିଆରେ ପର୍ଯ୍ୟଟକଙ୍କୁ ବଡ଼ନଗରର ପ୍ରାଚୀନ ସଂସ୍କୃତି ସହ ପରିଚିତ କରାଯିବ।

ପ୍ରଧାନମନ୍ତ୍ରୀ ମୋଦୀ ଦରବାର ସ୍କୁଲରୁ ପ୍ରଥମରୁ ସପ୍ତମ ଶ୍ରେଣୀ ପର୍ଯ୍ୟନ୍ତ ଶିକ୍ଷା ଗ୍ରହଣ କରିଥିଲେ। ଏବେ କେନ୍ଦ୍ର ଓ ରାଜ୍ୟ ସରକାର ମିଳିତ ଭାବେ ଏହାକୁ ଏକ ପ୍ରେରଣା କେନ୍ଦ୍ର ଭାବେ ବିକଶିତ କରିଛନ୍ତି। ସେପଟେ ଅମିତ ଶାହ ବୁଧବାର ତାଙ୍କ ଲୋକସଭା ନିର୍ବାଚନ ମଣ୍ଡଳୀର ମାନସା ଗାଁରେ ୨୪୧ କୋଟି ଟଙ୍କାର ଉନ୍ନୟନମୂଳକ କାର୍ଯ୍ୟର ଶୁଭାରମ୍ଭ କରିଛନ୍ତି। ଏହାବ୍ୟତୀତ ଗାନ୍ଧୀନଗର ଜିଲ୍ଲାର ମହାକାଳୀ ଧାମ ମିନି ପାଓ୍ଵାଗଡ଼ର ଆମ୍ବୋଦ ଗ୍ରାମରେ ସାବରମତୀ ନଦୀରେ ବ୍ୟାରେଜ୍‌ର ଶିଳାନ୍ୟାସ କରିଥିଲେ, ଯାହା କି ୨୩୪ କୋଟି ଟଙ୍କା ବ୍ୟୟରେ ନିର୍ମାଣ ହେବ। ଏହାଦ୍ୱାରା ଆଖପାଖ ୮ଟି ଗାଁର ୩୫୦୦ ହେକ୍ଟରରୁ ଅଧିକ ଜମିକୁ ଜଳସେଚନ ଜଳ ଯୋଗାଇ ଦିଆଯିବ।