ପାକିସ୍ତାନରେ ରାଜନୈତିକ ଉତ୍ତେଜନା ମଧ୍ୟରେ ଏକ ବଡ଼ ପଦକ୍ଷେପ ଗ୍ରହଣ କରାଯାଇଛି। ଜେଲ୍ରେ ବନ୍ଦୀ ଥିବା ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ୍ ଖାନଙ୍କ ଦଳ  'ପାକିସ୍ତାନ ତେହେରିକ୍-ଏ-ଇନସାଫ୍' (PTI) ସରକାର ଚାଲୁଥିବା ଖାଇବର ପାଖତୁନଖ୍ୱା ପ୍ରଦେଶରେ ଏମର୍ଜେନ୍ସି ଘୋଷଣା କରାଯାଇଛି। ଅନ୍ୟପଟେ, PTI ର ପ୍ରମୁଖ ଜୁନୈଦ୍ ଅକବର ଦାବି କରିଛନ୍ତି ଯେ ତାଙ୍କୁ ଏବଂ ମୁଖ୍ୟମନ୍ତ୍ରୀ ମୁହମ୍ମଦ ସୋହେଲ୍ ଆଫ୍ରିଦିଙ୍କୁ ଗିରଫ କରାଯାଇଛି। ରବିବାର ସମ୍ବିଧାନର ଦୁଇଟି ଅନୁଚ୍ଛେଦ ଅଧୀନରେ ଲାଗୁ କରାଯାଇଥିବା ଏହି ଏମର୍ଜେନ୍ସି ଦ୍ୱାରା ପ୍ରଦେଶର PTI ସରକାରଙ୍କ ଅଧିକାର ପ୍ରଭାବିତ ହୋଇପାରେ। ଏହି ନିଷ୍ପତ୍ତି ଏପରି ସମୟରେ ଆସିଛି, ଯେତେବେଳେ ଇମ୍ରାନ୍ ଖାନଙ୍କ ମୁକ୍ତି ଦାବିରେ ଦଳ ଇସଲାମାବାଦ ପର୍ଯ୍ୟନ୍ତ ମାର୍ଚ୍ଚ  କରିବାକୁ ପ୍ରସ୍ତୁତି ଚଳାଇଛି।

ପାକିସ୍ତାନ ରାଷ୍ଟ୍ରପତି ଆସିଫ୍ ଅଲ୍ଲୀ ଜରଦାରୀ ସୋସିଆଲ ମିଡିଆ ପୋଷ୍ଟ ଜରିଆରେ ଜଣାଇଛନ୍ତି ଯେ ସେ କ୍ୟାବିନେଟ୍ର ସୁପାରିଶଗୁଡ଼ିକୁ ମଞ୍ଜୁରୀ ଦେଇଛନ୍ତି। ଏହା ପୂର୍ବରୁ ପ୍ରଧାନମନ୍ତ୍ରୀ ଶାହବାଜ ଶରୀଫଙ୍କ ଅଧ୍ୟକ୍ଷତାରେ କ୍ୟାବିନେଟ୍ ବୈଠକ ଅନୁଷ୍ଠିତ ହୋଇଥିଲା। ପ୍ରଧାନମନ୍ତ୍ରୀ କାର୍ଯ୍ୟାଳୟର ବକ୍ତବ୍ୟ ଅନୁଯାୟୀ, ବୈଠକରେ ସୁରକ୍ଷା ପରିସ୍ଥିତିର ସମୀକ୍ଷା କରାଯାଇଥିଲା।

କାହିଁକି ନିଆଗଲା ଏହି ନିଷ୍ପତ୍ତି?

ସରକାର ଅଭିଯୋଗ ଆଣିଛନ୍ତି ଯେ ଖାଇବର ପାଖତୁନଖ୍ୱାର ପ୍ରାଦେଶିକ ସରକାର ଆତଙ୍କବାଦ ବିରୋଧୀ ଲଢ଼େଇରୁ ଜାଣିଶୁଣି ଓହରି ଯାଉଥିଲେ। ଏହି ଆଧାରରେ ଇମର୍ଜେନ୍ସି ଲାଗୁ କରିବାକୁ ନିଷ୍ପତ୍ତି ନିଆଗଲା। ତେବେ, ରାଷ୍ଟ୍ରପତି କାର୍ଯ୍ୟାଳୟ ପକ୍ଷରୁ ଏହା ସ୍ପଷ୍ଟ କରାଯାଇନାହିଁ ଯେ ଇମର୍ଜେନ୍ସି ପରେ ପ୍ରଦେଶର ପ୍ରଶାସନ କିପରି ପରିଚାଳିତ ହେବ।

ପାକିସ୍ତାନର ସମ୍ବିଧାନ ସଂଘୀୟ ସରକାରଙ୍କୁ ଏମର୍ଜେନ୍ସି ସମୟରେ ପ୍ରାଦେଶିକ ସରକାରଙ୍କ କିଛି କିମ୍ବା ସମସ୍ତ କାର୍ଯ୍ୟଭାର ନିଜ ହାତକୁ ନେବାକୁ ଅନୁମତି ଦେଇଥାଏ। ଏପରି ସ୍ଥିତିରେ ଏହି ନିଷ୍ପତ୍ତି ଦ୍ୱାରା ଇମ୍ରାନ୍ ଇମ୍ରାନ୍ ଖାନଙ୍କ ଦଳର ପ୍ରାଦେଶିକ ସରକାରଙ୍କ କ୍ଷମତା ପ୍ରଭାବିତ ହୋଇପାରେ।

ଏମର୍ଜେନ୍ସି ଘୋଷଣାର କିଛି ସମୟ ପରେ PTI ସାଂସଦ ଜୁନୈଦ୍ ଅକବର ଦାବି କରିଥିଲେ ଯେ ଖାଇବର ପାଖତୁନଖ୍ୱାର ମୁଖ୍ୟମନ୍ତ୍ରୀ ସୋହେଲ୍ ଆଫ୍ରିଦିଙ୍କୁ ପ୍ରଦେଶର ଦଳୀୟ ଅଧ୍ୟକ୍ଷଙ୍କ ସହ ଗିରଫ କରାଯାଇଛି। ତେବେ, ଏହି ଦାବିର ସତ୍ୟାସତ୍ୟ ଜଣା ପଡ଼ିନାହିଁ। 

ଇମ୍ରାନ୍ ଖାନଙ୍କ ମୁକ୍ତି ପାଇଁ ମାର୍ଚ୍ଚ ପ୍ରସ୍ତୁତି

PTI ନିଜ ନେତା ଇମ୍ରାନ୍ ଇମ୍ରାନ୍ ଖାନଙ୍କ ମୁକ୍ତି ଦାବିରେ ଇସଲାମାବାଦ ପର୍ଯ୍ୟନ୍ତ ମାର୍ଚ୍ଚ ବାହାର କରିବାକୁ ପ୍ରସ୍ତୁତ ହେଉଛି। ଇମ୍ରାନ୍ ଖାନ୍ ତିନି ବର୍ଷରୁ ଅଧିକ ସମୟ ହେବ ଜେଲ୍ରେ ଅଛନ୍ତି। ଦଳର ଏହି ମାର୍ଚ୍ଚ ପୂର୍ବରୁ ୨୭ ସେପ୍ଟେମ୍ବରରେ ହେବାର ଥିଲା, କିନ୍ତୁ ସରକାର ଏବଂ PTI ନେତୃତ୍ୱ ମଧ୍ୟରେ ଆଲୋଚନା ପାଇଁ ଏହାକୁ ୪ ଅକ୍ଟୋବର ପର୍ଯ୍ୟନ୍ତ ସ୍ଥଗିତ ରଖାଯାଇଥିଲା।

ପାକିସ୍ତାନ ସରକାର ସ୍ପଷ୍ଟ କରିଛନ୍ତି ଯେ ସେ ବିକ୍ଷୋଭକାରୀଙ୍କୁ ରାଜଧାନୀରେ ପ୍ରବେଶ କରିବାକୁ ଦେବେ ନାହିଁ। ଏଥିପାଇଁ ଇସଲାମାବାଦର ପ୍ରମୁଖ ରାସ୍ତାଗୁଡ଼ିକରେ ସିପିଂ କଣ୍ଟେନର୍ ଲଗାଇ ବ୍ୟାରିକେଡ୍ ପ୍ରସ୍ତୁତ କରାଯାଇଛି।

ରଏଟର୍ସ  ଅନୁଯାୟୀ, PTI ମୁଖପାତ୍ର ଜୁଲ୍ଫିକାର୍ ବୁଖାରୀ ଏମର୍ଜେନ୍ସି ନିଷ୍ପତ୍ତିର କଠୋର ସମାଲୋଚନା କରିଛନ୍ତି। ସେ କହିଛନ୍ତି ଯେ ଏହାଦ୍ୱାରା ଆହୁରି ଅଧିକ ରକ୍ତପାତ, ଅସ୍ଥିରତା ଏବଂ କ୍ଷତି ହୋଇପାରେ। ତାଙ୍କର କହିବା କଥା ଥିଲା ଯେ ଆଲୋଚନାର ସୁଯୋଗ ଥିଲା, କିନ୍ତୁ ସରକାରଙ୍କ ନିଷ୍ପତ୍ତିରୁ ଲାଗୁଛି ଯେ ସେମାନେ ଆଲୋଚନା କରିବାକୁ ଆଦୌ ଚାହୁଁନଥିଲେ।

ଜିଲ୍ଲାପାଳ ଓ ଏସପିଙ୍କ ଜନଶୁଣାଣୀ ବେଳେ ମସଜିଦ୍ରୁ ଆସିଲା ଆୱାଜ୍; ତା’ପରେ ଗିରଫ ହେଲେ ମୁଅଜ୍ଜିନ୍

ଉତ୍ତର ପ୍ରଦେଶର ବିଜନୋର ଜିଲ୍ଲା ନଜିବାବାଦ କୋତାୱାଲିରେ ଡିଏମ୍ ଉମେଶ ପ୍ରତାପ ସିଂହ ଏବଂ ଏସପି କୃଷ୍ଣ କୁମାର ବିଷ୍ଣୋଇ 'ସମାଧାନ ଦିବସ' କାର୍ଯ୍ୟକ୍ରମରେ ଲୋକଙ୍କ ଅଭିଯୋଗ ଶୁଣୁଥିଲେ। ଏହି ମଧ୍ୟରେ ନଜିବୁଦ୍ଦୌଲାସ୍ଥିତ ମସଜିଦରୁ ଉଚ୍ଚ ଶବ୍ଦରେ ଲାଉଡସ୍ପିକର ଆୱାଜ୍ ଆସିବାକୁ ଲାଗିଲା। ଯାହା ପରେ ସେମାନେ ତୁରନ୍ତ ପୁଲିସ ପଠାଇ ଲାଉଡ୍ସ୍ପିକର୍ କାଢ଼ି ଦେଇଥିଲେ। ପୁଲିସ ମସଜିଦ୍ର ମୁଅଜ୍ଜିନ୍ ଫୈଜାନ୍ଙ୍କୁ ଗିରଫ କରିଛି।

ପୁଲିସର ଏହି କାର୍ଯ୍ୟାନୁଷ୍ଠାନ ଯୋଗୁଁ ସମଗ୍ର ଅଞ୍ଚଳରେ ହଙ୍ଗାମା ସୃଷ୍ଟି ହୋଇଛି। ସବ୍-ଇନ୍ସପେକ୍ଟର ସୌରଭ ସିଂହଙ୍କ କହିବା ଅନୁଯାୟୀ, ସୁପ୍ରିମ୍ କୋର୍ଟଙ୍କ ନିୟମାବଳୀର ଉଲ୍ଲଂଘନ କାରଣରୁ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଏହା ସହିତ ଏସପି କର୍ତ୍ତବ୍ୟରେ ଅବହେଳା ପାଇଁ ଜଣେ ସିପାହୀଙ୍କୁ ନିଲମ୍ବିତ କରିଛନ୍ତି।

ଜନସୁଣାଣି କରୁଥିଲେ ଦୁଇ ଅଧିକାରୀ

ମିଳିଥିବା ସୂଚନା ଅନୁଯାୟୀ, ଶନିବାର ନଜିବାବାଦ କୋତାୱାଲିରେ ଜନସୁଣାଣି କାର୍ଯ୍ୟକ୍ରମରେ ଡିଏମ୍ ଉମେଶ ପ୍ରତାପ ସିଂହ ଏବଂ ଏସପି କୃଷ୍ଣ କୁମାର ବିଷ୍ଣୋଇ ପହଞ୍ଚିଥିଲେ। ଦୁଇ ଅଧିକାରୀ ଲୋକଙ୍କ ସମସ୍ୟା ଶୁଣୁଥିଲେ। ଏହି ମଧ୍ୟରେ ମସଜିଦର ଲାଉଡସ୍ପିକର ଉଚ୍ଚ ଶବ୍ଦ ଆସିବାରୁ ଦୁଇ ଅଧିକାରୀ ଅସନ୍ତୋଷ ପ୍ରକାଶ କରିଥିଲେ। ଯାହା ପରେ ପୁଲିସ ପଠାଇ ଲାଉଡ ଓହ୍ଲାଯାଇଥିଲା।

ସୁପ୍ରିମ୍ କୋର୍ଟଙ୍କ ନିୟମ ଅବହେଳା

ସବ୍-ଇନ୍ସପେକ୍ଟର ସୌରଭ ସିଂହଙ୍କ ଏଫ୍ଆଇଆର୍ ଅନୁଯାୟୀ, ସୁପ୍ରିମ୍ କୋର୍ଟଙ୍କ ଆଦେଶ ଅବମାନନା ଅଭିଯୋଗରେ ମସଜିଦ୍ର ମୁଅଜ୍ଜିନ୍ ଫୈଜାନଙ୍କୁ ଗିରଫ କରାଯାଇଛି। ମସଜିଦ୍ର ଲାଉଡସ୍ପିକର  ନିର୍ଦ୍ଧାରିତ ମାପଦଣ୍ଡଠାରୁ ଅଧିକ ଶବ୍ଦ ହେଉଥିଲା, ଯାହାଫଳରେ ସାଧାରଣ ଜନତାଙ୍କୁ ସମସ୍ୟା ହେଉଥିଲା। ମସଜିଦରୁ ଲାଉଡସ୍ପିକର ମଧ୍ୟ କାଢ଼ି ଦିଆଯାଇଛି। ବାକି ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି।

ଅପରପକ୍ଷରେ ଏସପି, କନେଷ୍ଟବଳ ଲଲିତ କୁମାରଙ୍କୁ ମଧ୍ୟ କର୍ତ୍ତବ୍ୟରେ ଅବହେଳା କରିବା ଅଭିଯୋଗରେ ନିଲମ୍ବିତ କରିଛନ୍ତି। ଏହି କାର୍ଯ୍ୟାନୁଷ୍ଠାନକୁ ନେଇ ପୂରା ଅଞ୍ଚଳରେ ଚର୍ଚ୍ଚା ଜୋର୍ ଧରିଛି। ଏପରି କାର୍ଯ୍ୟାନୁଷ୍ଠାନ ଯୋଗୁଁ ଆଲୋଡନ ସୃଷ୍ଟି ହୋଇଛି। ଘଟଣାସ୍ଥଳରେ ଉପସ୍ଥିତ ଲୋକଙ୍କ କହିବା ଅନୁଯାୟୀ, ଦୁଇ ଅଧିକାରୀ ଲାଉଡସ୍ପିକରର ଆୱାଜ୍ ଶୁଣି କ୍ରୋଧାନ୍ୱିତ ହୋଇପଡ଼ିଥିଲେ, ଯାହା ପରେ ତୁରନ୍ତ ପୁଲିସ ପଠାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା। ଏହା ସହ ଅଧିକାରୀମାନେ ସ୍ଥାନୀୟ ପୁଲିସ କର୍ମଚାରୀଙ୍କୁ ଏହି ସମ୍ବନ୍ଧରେ ନିର୍ଦ୍ଦେଶ ଦେଇଥିଲେ ଏବଂ ମସଜିଦ୍ଗୁଡ଼ିକରେ ନିର୍ଦ୍ଧାରିତ ମାପଦଣ୍ଡ ଅନୁଯାୟୀ ହିଁ ଲାଉଡସ୍ପିକର ଲଗାଇବାକୁ ନିର୍ଦ୍ଦେଶ ଦେଇଥିଲେ।