ଇନ୍ଦୋର: ଭାରତ ଓ ୱେଷ୍ଟଇଣ୍ଡିଜ୍ ମଧ୍ୟରେ ଅକ୍ଟୋବର ୧୧ରେ ଇନ୍ଦୋରଠାରେ ଖେଳାଯାଇଥିବା ତୃତୀୟ ଟି-୨୦ ମ୍ୟାଚ୍‌ରେ ଭାରତୀୟ ବ୍ୟାଟର ତିଲକ ବର୍ମାଙ୍କ ରନ୍ ଆଉଟ୍‌କୁ ନେଇ କ୍ରିକେଟ୍ ଜଗତରେ ଏବେ ବଡ଼ ବିବାଦ ସୃଷ୍ଟି ହୋଇଛି। ବଲ୍‌ଟି ବାଉଣ୍ଡ୍ରି ହୋଇସାରିଛି ଏବଂ ଆଉଟ୍ ଅଫ୍ ପ୍ଲେ’ ହୋଇଯାଇଛି ଭାବି ଭାରତୀୟ କ୍ରିଜ୍‌ରେ ଥିବା ବ୍ୟାଟରମାନେ ସାଧାରଣ ଭାବେ ଠିଆ ହୋଇଥିବା ବେଳେ, କ୍ୟାରିବିଆନ୍ ଦଳ ଖେଳ ଭାବନାକୁ  ଅଣଦେଖା କରି ରଥମେ ଅକ୍ଷର ପଟେଲ୍ ଓ ପରେ ତିଲକ ବର୍ମାଙ୍କୁ ରନ୍ ଆଉଟ୍ କରିବାକୁ ଚେଷ୍ଟା କରିଥିଲେ। ଅକ୍ଷର ବଞ୍ଚିଯାଇଥିଲେ ହେଁ ତିଲକ ଏହି ବିବାଦୀୟ ନିଷ୍ପତ୍ତିର ଶିକାର ହୋଇଛନ୍ତି।

କିପରି ଘଟିଥିଲା  ଘଟଣା ?

ଭାରତୀୟ ଇନିଂସର ୧୭ତମ ଓଭରରେ କ୍ୟାରିବିଆନ୍ ସ୍ପିନର ଗୁଡାକେଶ ମୋତି ବୋଲିଂ କରୁଥିଲେ। ଓଭରର ଚତୁର୍ଥ ବଲ୍‌କୁ ବ୍ୟାଟର ଲେଗ୍ ସାଇଡ୍‌କୁ ଠେଲି ଦେଇଥିଲେ। ବଲ୍‌ଟି ଚୌକା ପାଇଁ ସୀମାରେଖା ଆଡ଼କୁ ଯାଉଥିବା ଦେଖି ଭାରତୀୟ ବ୍ୟାଟରମାନେ ଭାବିଥିଲେ ଯେ ଚୌକା ହୋଇସାରିଛି। ମାତ୍ର ସୀମାରେଖା ନିକଟରେ ୱେଷ୍ଟଇଣ୍ଡିଜ୍‌ର ଫିଲ୍ଡର ଡାଇଭ୍ ମାରି ବଲ୍‌ଟିକୁ ଅଟକାଇ ଦେଇ ୱିକେଟକିପରଙ୍କ ଆଡ଼କୁ ଫିଙ୍ଗିଥିଲେ।

ଏହି ସମୟରେ ୱିକେଟକିପର ଶାଇ ହୋପ୍ ବଲ୍‌କୁ ଧରି ପ୍ରଥମେ ଅକ୍ଷର ପଟେଲଙ୍କୁ ରନ୍ ଆଉଟ୍ କରିବାକୁ ଚେଷ୍ଟା କରିଥିଲେ, କିନ୍ତୁ ଅକ୍ଷର ସମୟ ଥାଉଣୁ କ୍ରିଜ୍ ଭିତରେ ବ୍ୟାଟ୍ ରଖିଦେଇଥିଲେ। ଏହାପରେ ହୋପ୍ ବଲ୍‌ଟିକୁ ବୋଲର ଗୁଡାକେଶ ମୋତିଙ୍କ ଆଡ଼କୁ ବଢ଼ାଇ ଦେଇଥିଲେ। ମୋତି ନନ୍-ଷ୍ଟ୍ରାଇକିଂ ଏଣ୍ଡ୍‌ରେ ବେଲ୍ସ  ଉପାଡ଼ି ଦେଇ ଆଉଟ୍ ପାଇଁ ଆବେଦନ କରିଥିଲେ। ତିଲକ୍ ବର୍ମା ବଲ୍‌ଟି ଅନ୍-ପ୍ଲେ ଅଛି ବୋଲି ସମ୍ପୂର୍ଣ୍ଣ ଅଜ୍ଞ ଥିବାରୁ କ୍ରିଜ୍ ବାହାରେ ଅସାବଧାନ ହୋଇ ଠିଆ ହୋଇଥିଲେ।

ନିୟମ ଅନୁସାରେ ଆଉଟ୍

ଥର୍ଡ ଅମ୍ପାୟାର ରିପ୍ଲେ ଯାଞ୍ଚ କରିବା ପରେ ଫିଲ୍ଡର ବଲ୍‌ଟିକୁ ସୀମାରେଖା ଭିତରେ ଅଟକାଇଥିବା ସ୍ପଷ୍ଟ ହୋଇଥିଲା। କ୍ରିକେଟ୍ ନିୟମାଅନୁସାରେ ତିଲକ୍ କ୍ରିଜ୍ ବାହାରେ ଥିବାରୁ ତାଙ୍କୁ 'ଆଉଟ୍' ଘୋଷଣା କରାଯାଇଥିଲା। କିନ୍ତୁ ଏହା କେବଳ ଭୁଲ୍ ବୁଝାମଣା ଯୋଗୁଁ ଘଟିଥିବାରୁ, ୱେଷ୍ଟଇଣ୍ଡିଜ୍ ଟିମ୍ ନିଜର ଅପିଲ୍ ପ୍ରତ୍ୟାହାର ନକରିବା ଖେଳ ଭାବନା ପ୍ରତି ଏକ କଠୋର ଆଘାତ ବୋଲି କ୍ରିକେଟ୍ ପ୍ରେମୀ ଓ ବିଶ୍ଳେଷକମାନେ ମତ ପ୍ରକାଶ କରିଛନ୍ତି।

ମନେପଡ଼ିଲେ MS ଧୋନି ଓ ଇଆନ୍ ବେଲ୍‌ଙ୍କ ୨୦୧୧ ପ୍ରସଙ୍ଗ

ଏହି ଘଟଣା ସମସ୍ତଙ୍କୁ ୨୦୧୧ରେ ଭାରତ-ଇଂଲଣ୍ଡ ମଧ୍ୟରେ ଖେଳାଯାଇଥିବା ନଟିଂହାମ୍ ଟେଷ୍ଟ ମ୍ୟାଚ୍‌ର ସ୍ମୃତି ତାଜା କରିଦେଇଛି। ସେତେବେଳେ ଇଆନ୍ ମୋର୍ଗାନଙ୍କ ଏକ ଶଟ୍ ଚୌକା ହୋଇଗଲା ଭାବି ଇଆନ୍ ବେଲ୍ ଚା' ପାନ ବିରତି ପାଇଁ ପାଭିଲିୟନ୍ ଆଡ଼କୁ ଚାଲିଯାଇଥିଲେ। ପ୍ରବୀଣ କୁମାର ଚୌକା ଅଟକାଇ ଫିଙ୍ଗିବାରୁ ଭାରତୀୟ ଦଳ ଆଉଟ୍ ଆପିଲ୍ କରିଥିଲା ଏବଂ ଥର୍ଡ ଅମ୍ପାୟାର ବେଲ୍‌ଙ୍କୁ ଆଉଟ୍ ଦେଇଥିଲେ।

ମାତ୍ର ସେତେବେଳର ଭାରତୀୟ ଅଧିନାୟକ ମହେନ୍ଦ୍ର ସିଂହ ଧୋନି ଖେଳ ଭାବନା ଓ ସୁପରମ୍ପରା ଦେଖାଇ ନିଜର ଅପିଲ୍ ପ୍ରତ୍ୟାହାର କରିନେଇଥିଲେ ଏବଂ ଇଆନ୍ ବେଲ୍‌ଙ୍କୁ ପୁନର୍ବାର ବ୍ୟାଟିଂ ପାଇଁ ଡାକିଥିଲେ।