ମୁୁମ୍ବାଇ: ‘ସ୍ତ୍ରୀ ୨’ ଚଳିତ ବର୍ଷର ସବୁଠୁ ବଡ ସୁପରହିଟ୍ ବ୍ଲକବଷ୍ଟର ସାବ୍ୟସ୍ତ ହୋଇଛି । ଏହି ଫିଲ୍ମ ଅନେକ ବଡ ବଡ ରେକର୍ଡ ଭାଙ୍ଗି ସାରିଲାଣି । ତଥାପି ବକ୍ସ ଅଫିସରେ ଏହି ଫିଲ୍ମର ଜଲୱା ଥମିବାର ନାଁ ନେଉନି । ‘ସ୍ତ୍ରୀ ୨’କୁ ରିଲିଜ୍ ହେବାରେ ୩୧ ଦିନ ବିତି ସାରିଛି, ତଥାପି ଫିଲ୍ମ ପ୍ରତି ଦିନ କୋଟି କୋଟି ଟଙ୍କାର ବ୍ୟବସାୟ କରି ଚାଲିଛି । ପଞ୍ଚମ ଶନିବାର ଫିଲ୍ମର କାରବାରରେ ବୃଦ୍ଧି ଦେଖିବାକୁ ମିଳିଛି ।

ସ୍ୟାକନିଲକର ରିପୋର୍ଟ ଅନୁଯାୟୀ, ‘ସ୍ତ୍ରୀ ୨’ ୩୦ ଦିନରେ କେବଳ ଭାରତରେ ମୋଟ୍ ୫୬୭.୫୩ କୋଟି ଟଙ୍କାର ଆୟ କରିଛି । ୩୧ତମ ଦିନରେ ମଧ୍ୟ ଫିଲ୍ମ ବମ୍ପର ବ୍ୟବସାୟ କରିଛି । ଅନ୍ୟ ଫିଲ୍ମ ପରଦାରେ ଥିଲେ ମଧ୍ୟ ‘ସ୍ତ୍ରୀ ୨’ ପଞ୍ଚମ ଶନିବାରରେ ୫.୨୫ କୋଟି ଟଙ୍କାର ବକ୍ସଅଫିସ କଲେକ୍ସନ କରିଛି । ଶ୍ରଦ୍ଧାକପୁର ଓ ରାଜକୁମାର ରାଓଙ୍କ ଏହି ହରର କମେଡି ଫିଲ୍ମ ୬୦୦ କୋଟି କ୍ଲବର ନିକଟତର ହେବାରେ ଲାଗିଛି ।

‘ସ୍ତ୍ରୀ ୨’ ଘରୋଇ ବକ୍ସ ଅଫିସରେ ମୋଟ୍ ୫୭୨.୭୮ କୋଟି ଟଙ୍କାର ବ୍ୟବସାୟ କରିଛି । ଏଥିସହ ଚତୁର୍ଥ ସପ୍ତାହରେ ସବୁଠୁ ଅଧିକ ଆୟ କରିଥିବା ଫିଲ୍ମ ତାଲିକାରେ ଦ୍ୱିତୀୟ ସ୍ଥାନରେ ରହିଛି । ପ୍ରଥମ ସ୍ଥାନରେ ବାହୁବଳୀ ୨ର ଦବଦବା କାଏମ ରହିଛି ।  ଏସଏସ ରାଜାମୌଲୀଙ୍କ ଏହି ଫିଲ୍ମ ଚତୁର୍ଥ ସପ୍ତାହରେ ୧୨ କୋଟି ଟଙ୍କାର ବ୍ୟବସାୟ କରିଥିଲା । 

ଚଳିତ ମାସ ୧୩ ତାରିଖରେ ସିନେମାଘରେ ଅନେକ ଫିଲ୍ମ ରିଲିଜ ହୋଇଛି । କରୀନା କପୁରଙ୍କ ଦ ବର୍କିଂଘମ ମର୍ଡର୍ସ ପରଦାକୁ ଆସିଥିବା ବେଳେ ତୁମ୍ବବାଡ ଓ ବୀରଜରା ପୁଣି ଥରେ ରି ରିଲିଜ ହୋଇଛି । ତଥାପି ‘ସ୍ତ୍ରୀ ୨’ ଉପରେ ଏହାର କୌଣସି ପ୍ରଭାବ ଦେଖିବାକୁ ମିଳିନି ଏବଂ ଫିଲ୍ମ ଦମଦାର ଆୟ କରି ଚାଲିଛି । ଫିଲ୍ମର ୱାର୍ଲ୍‌ୱାଇଡ କଲେକ୍ସନ ୭୭୦ କୋଟି ହେବା ସହ ୮୦୦ କୋଟି କ୍ଲବରେ ସାମିଲ ହେବାର ନିକଟତର ହୋଇଛି ।