ମୁଜାଫରପୁର: ବିହାରର ମୁଜାଫରପୁର ଜିଲ୍ଲାରେ ଟ୍ରାକ୍ଟର ଚୋରି ସନ୍ଦେହରେ ଜଣେ ବ୍ୟକ୍ତିଙ୍କୁ ପିଟିପିଟି ହତ୍ୟା କରାଯାଇଥିବା ଅଭିଯୋଗ ହୋଇଛି। ଏହି ଘଟଣାରେ ଟ୍ରାକ୍ଟର ମାଲିକଙ୍କ ସମେତ ୨ ଜଣଙ୍କୁ ଗିରଫ କରାଯାଇଛି। ଏହି ଘଟଣାରେ ଅଧିକ ତଦନ୍ତ ଜାରି ରହିଛି ବୋଲି ରବିବାର ପୁଲିସ କହିଛି। 

ପୁଲିସ ଉକ୍ତ ଯୁବକଙ୍କୁ ଉଦ୍ଧାର କରିବା ପରେ ମୃତ ଘୋଷଣା କରିଥିଲା। ମୃତ ବ୍ୟକ୍ତିଙ୍କ ନାମ ଶମ୍ଭୁ ସାହାଣୀ ବୋଲି ଜଣାପଡ଼ିଛି। ଓରାଇ ଥାନା ଏସଏଚଓ ଅଭିଜିତ ଅଲକେଶ ଗଣମାଧ୍ୟମକୁ କହିଛନ୍ତି, ଟ୍ରାକ୍ଟର ଚୋରି ସନ୍ଦେହରେ ଶନିବାର ରାତିରେ ଯୋଗିଆଁ ଗାଁରେ ଜଣେ ବ୍ୟକ୍ତିଙ୍କୁ ପିଟିପିଟି ହତ୍ୟା କରାଯାଇଥିବା ଅଭିଯୋଗ ହୋଇଛି। 

ଗ୍ରାମବାସୀଙ୍କ କହିବା ଅନୁଯାୟୀ, ଶମ୍ଭୁ ସାହାଣୀଙ୍କୁ ଟ୍ରାକ୍ଟର ମାଲିକ ଓ ଅନ୍ୟମାନେ ପିଟିପିଟି ହତ୍ୟା କରିଥିଲେ। ଘଟଣା ସମ୍ପର୍କରେ ଖବର ପାଇ ରବିବାର ସକାଳେ ପୁଲିସ ଘଟଣାସ୍ଥଳରେ ପହଞ୍ଚି ତାଙ୍କୁ ଡାକ୍ତରଖାନା ରେ ଭର୍ତ୍ତି କରିଥିବା ବେଳେ ସେଠାରେ ତାଙ୍କୁ ମୃତ ଘୋଷଣା କରାଯାଇଥିଲା।  ଏହି ଘଟଣାରେ ଟ୍ରାକ୍ଟର ମାଲିକ ଗଙ୍ଗା ସାହାଣୀ ଓ ପୁକର ସାହାଣୀ ନାମକ ଦୁଇ ଜଣଙ୍କୁ ଗିରଫ କରାଯାଇଛି। ଏହି ମାମଲାର ଅଧିକ ତଦନ୍ତ ଚାଲିଛି।