ଖବର ଓଡ଼ିଶା: ସ୍ମାର୍ଟ ସିଟି ଭୁବନେଶ୍ୱରର ପ୍ରମୁଖ ପରିବା ହାଟ ଭିତରକୁ ଯିବା ଏବେ ମୁସ୍କିଲ ହୋଇ ପଡ଼ୁଛି । ଯୁଆଡ଼େ ଚାହିଁଲେ ଅଳିଆ ଆବର୍ଜନା । ଭୁବନେଶ୍ୱର ମହାନଗର ନିଗମ ପକ୍ଷରୁ ପରିମଳ ବ୍ୟବସ୍ଥାକୁ ଗୁରୁତ୍ୱ ଦିଆଯାଉଥିବାବେଳେ ଏଥିରୁ ବାଦ୍ ପଡ଼ିଛି ଏକ ନମ୍ବର ହାଟ । ହାଟର ଦିନକୁ ଦିନ ପରିମଳ ବ୍ୟବସ୍ଥା ଏବଂ ସ୍ଵଚ୍ଛତା ବିଗିଡ଼ିବାରେ ଲାଗିଛି । ୨୦୦୭ ରୁ ହୋଲ୍‌ସେଲ ବ୍ୟବସାୟୀଙ୍କୁ ଭଗବାନପୁରକୁ ସ୍ଥାନାନ୍ତର କରାଯିବା ନେଇ ନିଷ୍ପଭି ହୋଇଥିଲେ ହେଁ ଏପର୍ଯ୍ୟନ୍ତ ସ୍ଥାନାନ୍ତର ହୋଇପାରୁନାହିଁ । ଫଳରେ ଏହାକୁ ନେଇ ବିଭିନ୍ନ ମହଲରେ ଅସନ୍ତୋଷ ଦେଖାଦେଇଛି।

ଏକ ନମ୍ବର ହାଟକୁ ଗଲେ ଦୁର୍ଗନ୍ଧରେ ନାକ ଫାଟିପଡୁଛି । ରାସ୍ତା ଉପରେ ପଡ଼ିରହୁଛି ପଚାଶଢ଼ା ପରିବା । କେବଳ ଏତିକି ନୁହେଁ ଯାହା ସବୁ ଆବର୍ଜନା ବାହାରୁଛି ତାହା ମଧ୍ୟ ରାସ୍ତା ଉପରେ ପଡିରହୁଛି । ଦିନ ତମାମ ଏଠାରେ କାରବାର ବେଶ ଜମୁଥିବା ବେଳେ ହାଟ ମଝି ରାସ୍ତାରେ ପଚାପରିବା ଏବଂ ଅନ୍ୟାନ୍ୟ ଆବର୍ଜନା ଜମୁଥିବାର ଦୃଶ୍ୟ ଦେଖିବାକୁ ମିଳୁଛି । ସେହିପରି ହାଟ ରାସ୍ତା ମରାମତି ଅଭାବରୁ ପରିତ୍ୟକ୍ତ ଅବସ୍ଥାରେ ରହିଛି । ସାମାନ୍ୟ ବର୍ଷାରେ ହାଟର ଅବସ୍ଥା ଦୟନୀୟ ହୋଇପଡୁଛି । ଯଦ୍ୱାରା ବର୍ଷା ପାଣି କାଦୁଅ ଜମି ରହୁଛି । ଏହାକୁ ନେଇ ଗ୍ରାହକ ଏବଂ ବ୍ୟବସାୟୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖା ଦେଉଛି । ସହରର ଅଧିକାଂଶ ଲୋକ ଏବଂ ଛୋଟମୋଟ ବ୍ୟବସାୟୀ ଏହି ହାଟ ଉପରେ ନିର୍ଭରଶୀଳ । କିନ୍ତୁ ଦିନକୁ ଦିନ ହାଟର ପରିମଳ ବ୍ୟବସ୍ଥା ବିଗୁଡୁଥିବାରୁ ଲୋକଙ୍କ ମଧ୍ୟରେ ଅସନ୍ତୋଷ ଦେଖା ଦେଉଛି । ଗ୍ରାହାକମାନେ ହାଟରୁ ମୁହଁ ଫେରାଇ ନେଉଛନ୍ତି । ଫଳରେ ପରିବା ବ୍ୟବସାୟାଙ୍କୁ ଅଭାବୀ ବିକ୍ରିର ସମ୍ମୁଖୀନ ହେବାକୁ ପଡୁଛି । 

ଏକ ନମ୍ବର ହାଟକୁ ଦୈନିକ ହଜାର ହଜାର ଲୋକ ଆସୁଥିବାବେଳେ ପ୍ରାୟ ଅଢ଼େଇରୁ ୩ କୋଟି ଟଙ୍କାର କାରବାର ହେଉଛି । ପରିବା ହାଟରେ କେବଳ ୧୭୦୦ ହୋଲସେଲର ଓ ଛୋଟ ବ୍ୟବସାୟୀ ବ୍ୟବସାୟ କରୁଛନ୍ତି । ପ୍ରତି ବ୍ୟବସାୟୀ ଦୈନିକ ୧୦ ଟଙ୍କା ଗଣୁଥିବାବେଳେ ବର୍ଷକୁ ଟ୍ରେଡ ଲାଇସେନ୍ସ ଏବଂ ଯୁଜର୍ସ ଫି' ବାବଦରେ ମଧ୍ୟ ଟଙ୍କା ଗଣୁଛନ୍ତି । ହେଲେ ବିଏମ୍‌ସି ଯେଭଳିଭାବେ ଏହି ପୁରାତନ ହାଟକୁ ସଫେଇ କରିବା କଥା ସେଭଳି ହେଉନଥିବା ଅନେକ ଦୋକାନୀ ଅଭିଯୋଗ କରିଛନ୍ତି ।