ପୂର୍ବ ସରକାରକୁ ଜବାବ ଦେଲେ ଛାତ୍ରଛାତ୍ରୀ!ଭୁବନେଶ୍ୱର: ଦୀର୍ଘ ବର୍ଷ ପରେ ରାଜ୍ୟରେ ଛାତ୍ର ସଂସଦ ନିର୍ବାଚନକୁ ନେଇ ରାଜନୀତି ସରଗରମ। ପୂର୍ବତନ ବିଜେଡି ସରକାରକୁ ଟାର୍ଗେଟ୍ କରି ବଡ଼ ବୟାନ ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ୨୦୧୭ ମସିହାରୁ ଛାତ୍ର ସଂସଦ ନିର୍ବାଚନ ବନ୍ଦ ରହିବା ପ୍ରସଙ୍ଗ ଉଠାଇ ସେ କହିଛନ୍ତି, ଛାତ୍ର ସମାଜ ଉପରେ ଆସ୍ଥା ନଥିବାରୁ ତତ୍କାଳୀନ ସରକାର ନିର୍ବାଚନ ବନ୍ଦ ରଖିଥିଲେ।

ମୁଖ୍ୟମନ୍ତ୍ରୀଙ୍କ ଅଭିଯୋଗ ଅନୁସାରେ, ଛାତ୍ର ଆନ୍ଦୋଳନରୁ ରାଜନୀତି ଆରମ୍ଭ କରିଥିବା ତତ୍କାଳୀନ ଶାସକ ଦଳର ନେତା ଏବଂ ଉଚ୍ଚଶିକ୍ଷା ମନ୍ତ୍ରୀ ମଧ୍ୟ ନିର୍ବାଚନ ବନ୍ଦ ରଖିବା ନିଷ୍ପତ୍ତିକୁ ବିରୋଧ କରିନଥିଲେ। ନିର୍ବାଚନ ଆୟୋଜନ ପ୍ରସଙ୍ଗରେ ଦେଶର ପରିସ୍ଥିତି ଅନୁକୂଳ ନଥିବା ଏବଂ ଜେନ୍‌-ଜିଙ୍କ ଅସନ୍ତୋଷକୁ ନେଇ ମଧ୍ୟ ଯୁକ୍ତି ଦିଆଯାଇଥିବା ସେ କହିଛନ୍ତି।

ଛାତ୍ର ସଂସଦ ନିର୍ବାଚନ: ପୂର୍ବ ସରକାରକୁ ଜବାବ ଦେଲେ ଛାତ୍ରଛାତ୍ରୀ!

ନିଜ ସରକାର ପ୍ରତିଶ୍ରୁତି ପୂରଣ କରି ରାଜ୍ୟରେ ଶାନ୍ତିପୂର୍ଣ୍ଣ ଓ ଶୃଙ୍ଖଳିତ ଭାବେ ଛାତ୍ର ସଂସଦ ନିର୍ବାଚନ କରାଇଥିବା ଦାବି କରିଛନ୍ତି ମୋହନ ମାଝୀ। ତାଙ୍କ ମତରେ, ଏହି ନିର୍ବାଚନ ମାଧ୍ୟମରେ ଛାତ୍ରଛାତ୍ରୀମାନେ ପୂର୍ବ ସରକାରକୁ ନିଜର ଜବାବ ଦେଇଛନ୍ତି।

ଅନ୍ୟପକ୍ଷରେ, ଓଡ଼ିଶାରେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ABVP)ର ବିଜୟକୁ ମଧ୍ୟ ସେ ପ୍ରଶଂସା କରିଛନ୍ତି। ଦିଲ୍ଲୀ ବିଶ୍ୱବିଦ୍ୟାଳୟ ପରି ଓଡ଼ିଶାରେ ମଧ୍ୟ ABVPର ବିଜୟ ଯୁବପିଢ଼ିଙ୍କ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିକାଶ ନୀତି ପ୍ରତି ସମର୍ଥନର ସଙ୍କେତ ବୋଲି ସେ ମତ ଦେଇଛନ୍ତି।

ନବନିର୍ବାଚିତ ଛାତ୍ରନେତାଙ୍କୁ ମୋହନ ମାଝୀଙ୍କ ପରାମର୍ଶ

ନବନିର୍ବାଚିତ ଛାତ୍ର ପ୍ରତିନିଧିମାନଙ୍କୁ ସମ୍ବୋଧିତ କରି ମୁଖ୍ୟମନ୍ତ୍ରୀ କହିଛନ୍ତି, ନିର୍ବାଚନରେ ବିଜୟ ଅହଙ୍କାରର ବିଷୟ ନୁହେଁ, ବରଂ ଏହା ଏକ ବଡ଼ ଦାୟିତ୍ୱର ଆରମ୍ଭ। ଛାତ୍ରନେତାମାନେ କେବଳ ରାଜନୀତିରେ ସୀମିତ ନରହି ଛାତ୍ରଛାତ୍ରୀଙ୍କ ଶିକ୍ଷା, ହଷ୍ଟେଲ ଓ କ୍ରୀଡ଼ା ସମ୍ପର୍କିତ ସମସ୍ୟାର ସମାଧାନ ପାଇଁ କାମ କରିବା ଉଚିତ।

ଏଥିସହ ସରକାରୀ ଜନକଲ୍ୟାଣକାରୀ ଯୋଜନାର ସୁଫଳ ପ୍ରତ୍ୟେକ ଶିକ୍ଷାର୍ଥୀଙ୍କ ପାଖରେ ପହଞ୍ଚାଇବା, କଲେଜ କର୍ତ୍ତୃପକ୍ଷଙ୍କ ସହ ସମନ୍ୱୟ ରଖିବା ଏବଂ କ୍ୟାମ୍ପସକୁ ହିଂସାମୁକ୍ତ ଓ ନିଶାମୁକ୍ତ କରିବା ଦିଗରେ ଛାତ୍ର ପ୍ରତିନିଧିମାନେ କାମ କରିବାକୁ ସେ ଆହ୍ୱାନ ଦେଇଛନ୍ତି। ଛାତ୍ର ସଂସଦ ନିର୍ବାଚନକୁ ନେଇ ମୁଖ୍ୟମନ୍ତ୍ରୀଙ୍କ ଏହି ବୟାନ ରାଜ୍ୟ ରାଜନୀତିରେ ନୂଆ ଚର୍ଚ୍ଚା ସୃଷ୍ଟି କରିଛି।