ଭୁବନେଶ୍ୱର: ଦୀର୍ଘ  ୧୫ ଦିନ ଧରି ଜାରି ରହିଥିବା ରାଜ୍ୟ ଅମଲା ସଂଘର ଆନ୍ଦୋଳନ ସ୍ଥଗିତ ରହିଛି । ଅମଲା ସଂଘ ମଙ୍ଗଳବାର ଆନ୍ଦୋଳନରୁ ଓହରିବାକୁ ନିଷ୍ପତ୍ତି ନେଇଛି । ଗତକାଲି ମୁଖ୍ୟ ଶାସନ ସଚିବଙ୍କ ସହିତ ଆଲୋଚନା ପରେ ସଂଘ ଆନ୍ଦୋଳନକୁ ସ୍ଥଗିତ ରଖିଛି । ଫଳରେ ଆଜିଠାରୁ ଅମଲା କର୍ମଚାରୀମାନେ କାର୍ଯ୍ୟରେ ଯୋଗ ଦେବେ । ଏନେଇ ସଂଘର ସଭାପତି ତ୍ରିପତି ବାଲାଜୀ ସୂଚନା ଦେଇଛନ୍ତି।

ଗତ ୧୧ ତାରିଖରୁ ବିଭିନ୍ନ ଦାବି ନେଇ ୧୫ ଦିନ ହେବ ଅମଲା କର୍ମଚାରୀମାନେ ଆନ୍ଦୋଳନ ଜାରି ରଖିଥିଲେ । କ୍ୟାଡର ପୁନର୍ଗଠନ ତାଙ୍କର ପ୍ରମୁଖ ଦାବି ରହିଥିଲା । ଶନିବାର ରାଜସ୍ୱ ମନ୍ତ୍ରୀଙ୍କ ସହିତ ଆଲୋଚନା ପରେ ମଧ୍ୟ ଅମଲା ସଂଘ ଆନ୍ଦୋଳନରୁ ଓହରିନଥିଲା । ଏହା ସମୟ ସାପେକ୍ଷ ବ୍ୟବସ୍ଥା ବୋଲି ମନ୍ତ୍ରୀ ସୁରେଶ ପୂଜାରୀ କହିଥିଲେ । ଗତକାଲି ପୁଣି ଥରେ ମୁଖ୍ୟ ସଚିବଙ୍କ ସହିତ ଗୁରୁତ୍ୱପୂର୍ଣ୍ଣ ଆଲୋଚନା ହୋଇଥିଲା । 

ଗତ ୧୨ ତାରିଖରେ ବିଭାଗୀୟ ଅତିରିକ୍ତ ମୁଖ୍ୟ ଶାସନ ସଚିବ ଦେଓରଞ୍ଜନ କୁମାର ସିଂହ ସବୁ ଜିଲ୍ଲାପାଳଙ୍କୁ ଚିଠି ଲେଖିଥିଲେ । ସମୂହ ଛୁଟିରେ ଯାଇଥିବା କର୍ମଚାରୀଙ୍କ ଅନୁପସ୍ଥିତ ଦିନର ଦରମା ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି ।