ଭୁବନେଶ୍ୱର: ରାସ୍ତାରେ ଗାଡ଼ି ନେଇ ବାହାରିବା ପୂର୍ବରୁ ସାବଧାନ! ଏବେ ବୈଧ ପ୍ରଦୂଷଣ ପ୍ରମାଣପତ୍ର (PUCC) କିମ୍ବା ଇନସ୍ୟୁରାନ୍ସ (Insurance) ନଥିବା ଯାନବାହନ ଚାଳକଙ୍କ ଗାଡ଼ି କଟିବ ଇ-ଚାଲାଣ। ଏନେଇ ପରିବହନ ବିଭାଗ ପକ୍ଷରୁ କଡ଼ା ନିର୍ଦ୍ଦେଶ ଜାରି କରାଯାଇଛି।

ଟୋଲ୍ ପ୍ଲାଜାରେ ହେବ ଇ-ଡିଟେକ୍ସନ୍

ଓଡ଼ିଶାରେ ଇ-ଡିଟେକ୍ସନ୍ (e-Detection) ବ୍ୟବସ୍ଥାକୁ ବିଭିନ୍ନ ଟୋଲ୍ ପ୍ଲାଜା ଏବଂ 'ବାହନ' (VAHAN) ଡାଟାବେସ୍ ସହିତ ସଂଯୋଗ କରାଯାଇଛି। ରାସ୍ତାରେ ଯାତାୟାତ କରୁଥିବା ଗାଡ଼ିର କାଗଜପତ୍ର ବୈଧ ଅଛି କି ନାହିଁ, ତାହା ଏହି ଡିଜିଟାଲ୍ ସିଷ୍ଟମ୍ ସ୍ୱୟଂକ୍ରିୟ ଭାବେ ଯାଞ୍ଚ କରିବ।

ଅଟକାଇବେନି ପୋଲିସ୍, ସିଧା ମୋବାଇଲକୁ ଯିବ ଚାଲାଣ

ମାନୁଆଲ୍ ଯାଞ୍ଚରୁ ମୁକ୍ତି: ଗାଡ଼ିକୁ ରାସ୍ତାରେ ଅଟକାଇ କାଗଜପତ୍ର ଦେଖାଇବାର ଆବଶ୍ୟକତା କମିବ।

ସ୍ୱୟଂକ୍ରିୟ ପ୍ରକ୍ରିୟା: ଟୋଲ୍ ପ୍ଲାଜା ଦେଇ ଗାଡ଼ି ଅତିକ୍ରମ କରିବା ମାତ୍ରେ ସେଥିରେ ଥିବା କ୍ୟାମେରା ଗାଡ଼ିର ନମ୍ବର ରେକର୍ଡ କରି VAHAN ଡାଟା ସହ ମେଳ କରିବ।

ସିଧାସଳଖ କାର୍ଯ୍ୟାନୁଷ୍ଠାନ: ଯଦି PUCC କିମ୍ବା ଇନସ୍ୟୁରାନ୍ସର ମିଆଦ ଶେଷ ହୋଇଥିବ, ତେବେ ନିୟମାନୁସାରେ ସିଧାସଳଖ ଇ-ଚାଲାଣ ଜାରି ହୋଇଯିବ।

ପ୍ରତ୍ୟେକ ଗାଡ଼ି ମାଲିକ ନିଜ ଯାନର ସମସ୍ତ ଆବଶ୍ୟକୀୟ ଦସ୍ତାବିଜର ଶେଷ ତାରିଖ ଯାଞ୍ଚ କରି ତୁରନ୍ତ ନବୀକରଣ (Renew) କରିନେବାକୁ ପରାମର୍ଶ ଦିଆଯାଇଛି।