କଳାହାଣ୍ଡି: ବନ୍ୟଜନ୍ତୁ ସଂରକ୍ଷଣ କ୍ଷେତ୍ରରେ ଓଡ଼ିଶା ଆଉ ଏକ ନୂଆ ଅଧ୍ୟାୟ ଲେଖିଛି। ରାଜ୍ୟର ପ୍ରଥମ ହାତୀ ପ୍ରଶିକ୍ଷଣ କେନ୍ଦ୍ର କଳାହାଣ୍ଡି ଜିଲ୍ଲାର ସିମେଲପଦର ଅଞ୍ଚଳରେ ଶୁକ୍ରବାର ଉଦ୍ଘାଟିତ ହୋଇଛି। ରାଜ୍ୟ ସରକାରଙ୍କ ଦୁଇ ବର୍ଷ ପୂର୍ତ୍ତି ଉତ୍ସବ ଅବସରରେ ବନମନ୍ତ୍ରୀ ଗଣେଶ ରାମ ସିଂହଖୁଣ୍ଟିଆ ଏହି ଅଭିନବ କେନ୍ଦ୍ରର ଉଦ୍ଘାଟନ କରିଛନ୍ତି।

କାର୍ଲାପାଟ ବନ୍ୟପ୍ରାଣୀ ଅଞ୍ଚଳରେ ସ୍ଥାପିତ ଏହି କେନ୍ଦ୍ର ରାଜ୍ୟର ଗୁରୁତ୍ୱପୂର୍ଣ୍ଣ ହାତୀ କରିଡର ମଧ୍ୟରୁ ଗୋଟିଏରେ ଅବସ୍ଥିତ। ଗତ କିଛି ବର୍ଷ ଧରି ଏହି ଅଞ୍ଚଳରେ ହାତୀଙ୍କ ଚଳପ୍ରଚଳ ବଢ଼ିଥିବା ବେଳେ ମଣିଷ-ହାତୀ ସଂଘର୍ଷ ମଧ୍ୟ ଚିନ୍ତା ବଢ଼ାଇଥିଲା। ଏପରି ସ୍ଥିତିରେ ଏହି ପ୍ରଶିକ୍ଷଣ କେନ୍ଦ୍ର ବନ ବିଭାଗ ପାଇଁ ଏକ ବଡ଼ ସହାୟକ ସାବ୍ୟସ୍ତ ହେବ ବୋଲି ଆଶା କରାଯାଉଛି।

ବନ ବିଭାଗ ସୂଚନା ଅନୁସାରେ, ଏଠାରେ ବନ କର୍ମଚାରୀମାନଙ୍କୁ ହାତୀଙ୍କ ବ୍ୟବହାର, ଗତିବିଧି ଏବଂ ସଂଘର୍ଷ ପରିଚାଳନା ନେଇ ବିଶେଷ ପ୍ରଶିକ୍ଷଣ ଦିଆଯିବ। ଏହା ଦ୍ୱାରା ହାତୀଙ୍କ ଗତିପଥ ଉପରେ ନଜର ରଖିବା ସହ ଗ୍ରାମାଞ୍ଚଳରେ ଘଟୁଥିବା କ୍ଷତିକୁ କମାଇବା ସମ୍ଭବ ହେବ।

ଉଦ୍ଘାଟନୀ ଉତ୍ସବରେ ବନମନ୍ତ୍ରୀ କହିଥିଲେ, “ହାତୀ କରିଡରର ସୁରକ୍ଷା ଏବଂ ସଠିକ୍ ପରିଚାଳନା ଏବେ ସମୟର ବଡ଼ ଆବଶ୍ୟକତା। ବନ୍ୟଜନ୍ତୁ ସଂରକ୍ଷଣ ସହ ସ୍ଥାନୀୟ ଲୋକଙ୍କ ସୁରକ୍ଷା ମଧ୍ୟ ଆମର ପ୍ରାଥମିକତା। ଏହି କେନ୍ଦ୍ର ମଣିଷ-ହାତୀ ସଂଘର୍ଷ କମାଇବାରେ ମାଇଲଖୁଣ୍ଟ ସାବ୍ୟସ୍ତ ହେବ।”

କେବଳ ପ୍ରଶିକ୍ଷଣ କେନ୍ଦ୍ର ନୁହେଁ, ଏହି ଅବସରରେ ଏକ ନୂତନ ବନ୍ୟଜନ୍ତୁ ମନିଟରିଂ ଟାୱାର ମଧ୍ୟ ଉଦ୍ଘାଟିତ ହୋଇଛି। ଏହା ଜରିଆରେ ବନ କର୍ମଚାରୀମାନେ ବନ୍ୟପ୍ରାଣୀଙ୍କ ଚଳପ୍ରଚଳ ଉପରେ ଅଧିକ ସତର୍କ ନଜର ରଖିପାରିବେ ଏବଂ ବିପଦ ସମୟରେ ତୁରନ୍ତ ପଦକ୍ଷେପ ନେଇପାରିବେ।

ଦେଶରେ ସର୍ବାଧିକ ହାତୀ ସଂଖ୍ୟା ଥିବା ରାଜ୍ୟଗୁଡ଼ିକ ମଧ୍ୟରେ ଓଡ଼ିଶା ଅନ୍ୟତମ। ଫସଲ ନଷ୍ଟ, ଘରବାଡ଼ି କ୍ଷତି ଓ ଜନହାନି ଭଳି ଘଟଣାକୁ ନେଇ ଚିନ୍ତା ବଢ଼ୁଥିବା ବେଳେ କଳାହାଣ୍ଡିର ଏହି ନୂଆ କେନ୍ଦ୍ର ହାତୀ ଓ ମଣିଷ ମଧ୍ୟରେ ସହାବସ୍ଥାନର ନୂଆ ପଥ ଦେଖାଇବ ବୋଲି ବିଶେଷଜ୍ଞମାନେ ମତ ପ୍ରକାଶ କରିଛନ୍ତି। ସଂରକ୍ଷଣ, ପ୍ରଶିକ୍ଷଣ ଓ ପ୍ରଯୁକ୍ତିର ସମନ୍ୱୟରେ ଓଡ଼ିଶାର ବନ୍ୟଜନ୍ତୁ ପରିଚାଳନାକୁ ଏକ ନୂଆ ଦିଗ ଦେଇଛି କଳାହାଣ୍ଡିର ଏହି ହାତୀ ପ୍ରଶିକ୍ଷଣ କେନ୍ଦ୍ର।