ପୁରୀ ରେଳ ଷ୍ଟେସନ ନିକଟରେ ଶୁକ୍ରବାର ଅଳ୍ପକେ ଏକ ବଡ଼ ଦୁର୍ଘଟଣା ଟଳିଯାଇଛି। ତାଳଚେରରୁ ପୁରୀ ଆସୁଥିବା ଏକ ମେମୁ (MEMU) ଯାତ୍ରୀବାହୀ ଟ୍ରେନ ଷ୍ଟେସନରେ ପ୍ରବେଶ କରୁଥିବା ବେଳେ ଲାଇନଚ୍ୟୁତ ହୋଇଛି। ଟ୍ରେନଟି କମ୍ ବେଗରେ ଚାଲୁଥିବାରୁ ବଡ଼ ଧରଣର କ୍ଷୟକ୍ଷତିକୁ ଏଡ଼ାଇ ଦିଆଯାଇଛି।

ସୂଚନା ଅନୁସାରେ, ପୁରୀ ରେଳ ଷ୍ଟେସନଠାରୁ ପ୍ରାୟ ୫୦୦ ମିଟର ଦୂରରେ ଥିବା ପ୍ଲାଟଫର୍ମ ନମ୍ବର-୩ ନିକଟରେ ଟ୍ରେନଟି ହଠାତ୍ ଲାଇନଚ୍ୟୁତ ହୋଇଥିଲା। ଘଟଣା ସମୟରେ ଟ୍ରେନରେ ଶହ ଶହ ଯାତ୍ରୀ ଥିଲେ। ତେବେ ଟ୍ରେନର ବେଗ କମ୍ ଥିବାରୁ କୌଣସି ବଡ଼ ଅଘଟଣ ଘଟିନଥିବା ବେଳେ ତୁରନ୍ତ କୌଣସି ମୃତାହତ ଖବର ମିଳିନାହିଁ।

ଟ୍ରେନ ଅଟକିବା ପରେ ଭୟଭୀତ ଯାତ୍ରୀମାନେ ନିଜ ନିଜ ସାମଗ୍ରୀ ଧରି ଟ୍ରେନରୁ ଓହ୍ଲାଇ ଷ୍ଟେସନ ଆଡ଼କୁ ଚାଲିଯାଇଥିଲେ। ଘଟଣାସ୍ଥଳରେ ରେଳବାଇ କର୍ମଚାରୀ ଓ ଆରପିଏଫ୍‌ ଯବାନମାନେ ପହଞ୍ଚି ସ୍ଥିତି ନିୟନ୍ତ୍ରଣକୁ ନେଇଥିଲେ।

ଲାଇନଚ୍ୟୁତ ଟ୍ରେନକୁ ହଟାଇ ରେଳ ଚଳାଚଳ ସ୍ୱାଭାବିକ କରିବାକୁ ରେଳବାଇ ପକ୍ଷରୁ ତୁରନ୍ତ ଉଦ୍ୟମ ଆରମ୍ଭ ହୋଇଛି। ଘଟଣା ଯୋଗୁଁ କିଛି ସମୟ ପାଇଁ ଟ୍ରେନ ଚଳାଚଳ ପ୍ରଭାବିତ ହୋଇଥିଲେ ମଧ୍ୟ ଅନ୍ୟ ଟ୍ରେନ ଚଳାଚଳ ଉପରେ ବଡ଼ ପ୍ରଭାବ ପଡ଼ିନଥିବା ଜଣାପଡ଼ିଛି। ଟ୍ରେନଟି କେଉଁ କାରଣରୁ ଲାଇନଚ୍ୟୁତ ହେଲା, ତାହାର ପ୍ରକୃତ କାରଣ ତଦନ୍ତ ପରେ ସ୍ପଷ୍ଟ ହେବ ବୋଲି ରେଳବାଇ ପକ୍ଷରୁ କୁହାଯାଇଛି।