ଭୁବନେଶ୍ୱର: ଭୁବନେଶ୍ୱରସ୍ଥିତ ଡିଏଚଏସଇ (ଓ) ବା DHSE (O)ର ଅତିରିକ୍ତ ନିର୍ଦ୍ଦେଶକଭାବେ ନିଯୁକ୍ତ ହୋଇଛନ୍ତି ଧ୍ରୁବ ଚରଣ ବେହେରା । ସେ ବର୍ତ୍ତମାନ ବଲାଙ୍ଗୀର ଜିଲ୍ଲା ଶିକ୍ଷା ଅଧିକାରୀଭାବେ କାର୍ଯ୍ୟ କରୁଛନ୍ତି । ସେହିପରି ଡିଏଚଏସଇ (ଓ) ଅତିରିକ୍ତ ନିର୍ଦ୍ଦେଶକ ଥିବା ବିଶ୍ୱଜିତ୍ ଘୋଷଙ୍କୁ ଓସେପା (OSEPA)ର ଅତିରିକ୍ତ ନିର୍ଦ୍ଦେଶକ ଭାବେ ଦାୟିତ୍ୱ ମିଳିଛି । ଏହି କ୍ରମରେ ଆଜି ରାଜ୍ୟ ୩୦ ଜଣ ଶିକ୍ଷାଧିକାରୀଙ୍କ ବଦଳି ଏବଂ ପଦୋନ୍ନତି କରାଯାଇଛି । ଏ ନେଇ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି । 

OSEPAର ଯୁଗ୍ମ ନିର୍ଦ୍ଦେଶକ ଭାବେ ୩ ଜଣଙ୍କୁ ଦାୟିତ୍ୱ ମିଳିଛି । ଢେଙ୍କାନାଳ ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀଭାବେ କାର୍ଯ୍ୟରତ ଥିବା ସସ୍ମିତା ସାହୁ, କେନ୍ଦୁଝର ଡିଇଓ ଗୌରୀରାଣୀ ନାଏକ ଓ ଗଞ୍ଜାମ ଡିଇଓ-ଡିପିସି ଅମିତା ପଟ୍ଟନାୟକ ଯୁଗ୍ମ ନିର୍ଦ୍ଦେଶକଭାବେ ନିଯୁକ୍ତ ହୋଇଛନ୍ତି । ଭୁବନେଶ୍ୱର ସିଏଚଏସଇ (ଓ)ର ଉପ ନିର୍ଦ୍ଦେଶକ ହୋଇଛନ୍ତି ରାଜଶ୍ରୀ ପଟ୍ଟାନାୟକ । ସେ ନୟାଗଡ଼ ଡିଇଓ ଏବଂ ଡିପିସିଭାବେ କାର୍ଯ୍ୟରତ ଅଛନ୍ତି । କଟକସ୍ଥିତ ମାଧ୍ୟମିକ ବୋର୍ଡର କଣ୍ଟ୍ରୋଲର୍ ଭାବେ ଅମ୍ରିତା ପ୍ରୀତିନନ୍ଦାଙ୍କୁ ପଦୋନ୍ନତି ମିଳିଛି । 

ସେହିପରି ଦେଓଗଡ଼, ଗଞ୍ଜାମ, ଯାଜପୁର, କଳାହାଣ୍ଡି, ଖୋର୍ଦ୍ଧା, ମାଲକାନଗିରି, ନୟାଗଡ଼, ସମ୍ବଲପୁର, ସୋନପୁର, କେନ୍ଦୁଝର ଓ କେନ୍ଦ୍ରାପଡ଼ା ଆଦି ଜିଲ୍ଲାରେ ନୂତନ ଡିଇଓ ନିଯୁକ୍ତି ହୋଇଛନ୍ତି ।