ବାଲେଶ୍ୱର: ଗନ୍ଧମାର୍ଦ୍ଦନ ଖଣି ଲୋଡ଼ିଂର ଆର୍ଥିକ ଦୁର୍ନୀତି ମାମଲାରେ ଫସିଥିବା ବିଜୁ ଜନତା ଦଳର ଯୁବ ନେତା ସୌମ୍ୟରଞ୍ଜନ ଚକ୍ରଙ୍କୁ ପୁଣି ଥରେ ନିରାଶ ହେବାକୁ ପଡ଼ିଛି । ରାଜାଙ୍କ ଜାମିନ ଆବେଦନକୁ ଖାରଜ କରିଛନ୍ତି ମାନ୍ୟବର ବାଲେଶ୍ଵର ଓପିଆଇଡି ଅଦାଲତ । 

ବାଲେଶ୍ୱର ଓପିଆଇଡି ଅଦାଲତର ବିଚାରପତି ବିଶ୍ୱଜିତ ଦାସ ଜାମିନ ଆବେଦନ ଶୁଣାଣିର ରାୟ ପ୍ରକାଶ କରିଛନ୍ତି । ସମସ୍ତ ଦିଗରୁ ତର୍ଜମା କରି କୋର୍ଟ ରାଜାଙ୍କ ଜାମିନ ନାମଞ୍ଜୁର କରିଛନ୍ତି । ଗତ ୩ ତାରିଖରେ ରାଜାଙ୍କୁ କୋର୍ଟରେ ହାଜର କରାଯାଇଥିଲା । ସେହିଦିନ ତାଙ୍କ ଜାମିନର ଶୁଣାଣି କରାଯାଇ ରାୟକୁ ସୁରକ୍ଷିତ ରଖାଯାଇଥିଲା । ଯାହା ଆଜି ପ୍ରକାଶ ପାଇଛି । ଅନ୍ୟପକ୍ଷରେ ରାଜାଙ୍କ ଓକିଲ ସୁଧାଂଶୁ ଦ୍ଵିବେଦୀ ବିଜେପି ଉପରେ ଲଗାଇଥିବା ଆରୋପକୁ ଖଣ୍ଡନ କରିଛନ୍ତି ଇଓଡବ୍ଲ୍ୟୁ ପକ୍ଷରୁ ମାମଲା ଲଢ଼ୁଥିବା ଓକିଲ କହିଛନ୍ତି । ସେ କହିଛନ୍ତି ଯେ ପ୍ରତିପକ୍ଷ ସମସ୍ତ ମିଥ୍ୟା ଏବଂ ଭିତ୍ତିହୀନ ଅଭିଯୋଗ କରୁଛନ୍ତି । ସେମାନଙ୍କ ପାଖରେ କୌଣସି ତଥ୍ୟ ପ୍ରମାଣ ନାହିଁ । ଇଓଡବ୍ଲ୍ୟୁର ତଦନ୍ତ ସଠିକ ରାସ୍ତାରେ ଯାଉଛି ବୋଲି ସେ କହିଛନ୍ତି । 

ଗନ୍ଧମାର୍ଦ୍ଦନ ଲୋଡିଂ ଏଜେନ୍‌ସି ଆର୍ଥିକ ଅନିୟମିତତା ମାମଲାରେ କ୍ରାଇମ୍‌ବ୍ରାଞ୍ଚ୍‌ ଇଓଡବ୍ଲ୍ୟୁ ରାଜା ଚକ୍ରଙ୍କୁ ଗିରଫ କରିଥିଲା । କୋଟି କୋଟି ଟଙ୍କା ହଡ଼ପ ନେଇ ରାଜାଙ୍କ ବିରୋଧରେ ଅଭିଯୋଗ ରହିଛି । ଏହା ସହିତ ଇଓଡବ୍ଲ୍ୟୁ ଏକାଧିକ ସ୍ଥାନରେ ଚଢ଼ଉ କରି ରାଜା ଚକ୍ରଙ୍କ ୪୮ଟି ଗାଡ଼ି ଜବତ କରିଛି ।