ଭୁବନେଶ୍ବର : ପ୍ରତିବର୍ଷ ଶ୍ରାବଣ ମାସର ପୂର୍ଣ୍ଣିମା ତିଥିରେ ପଡୁଥିବା ମହାନ ପର୍ବ ରାକ୍ଷୀ ପୂର୍ଣ୍ଣିମାକୁ ସମଗ୍ର ଦେଶରେ ବେଶ୍ ଆନନ୍ଦ ଉଲ୍ଲାସର ସହ ପାଳନ କରାଯାଏ। ତେବେ ଚଳିତ ବର୍ଷ ରାକ୍ଷୀ ପୂର୍ଣ୍ଣିମା ଆସନ୍ତା ଅଗଷ୍ଟ ୨୮ ତାରିଖ ଶୁକ୍ରବାର ଦିନ ପଡ଼ୁଥିବା ବେଳେ, ସେହି ଦିନ ଏକ ବିରଳ ମହାଜାଗତିକ ଘଟଣା ସୃଷ୍ଟି ହେବାକୁ ଯାଉଛି। କାରଣ ଅଗଷ୍ଟ ୨୮ ତାରିଖରେ ବର୍ଷର ଶେଷ ଆଂଶିକ ଚନ୍ଦ୍ରଗ୍ରହଣ ଲାଗିବ । ରକ୍ଷାବନ୍ଧନ ଭଳି ଏକ ଶୁଭ ଦିନରେ ଚନ୍ଦ୍ରଗ୍ରହଣ ପଡ଼ୁଥିବାରୁ, ଏହାକୁ ନେଇ ଲୋକଙ୍କ ମନରେ ସୂତକ କାଳ ଏବଂ ରାକ୍ଷୀ ବାନ୍ଧିବା ସମୟକୁ ନେଇ ଅନେକ ଦ୍ୱନ୍ଦ୍ୱ ଦେଖାଦେଇଥିଲା। ତେବେ ଧର୍ମଶାସ୍ତ୍ର ଓ ଜ୍ୟୋତିଷ ଗଣନା ଅନୁଯାୟୀ ଏହି ଆଶଙ୍କା ଏବେ ଦୂର ହୋଇଯାଇଛି । 

ପାଞ୍ଜି ଗଣନା ଅନୁଯାୟୀ, ଅଗଷ୍ଟ ୨୮ ତାରିଖ ସକାଳ ୬ଟା ୫୩ ମିନିଟରୁ ଚନ୍ଦ୍ରଗ୍ରହଣ ଆରମ୍ଭ ହେବ ଏବଂ ଏହା ଅପରାହ୍ନ ୧୨ଟା ୩୨ ମିନିଟ୍ ପର୍ଯ୍ୟନ୍ତ ଚାଲିବ। ତେବେ ସବୁଠାରୁ ଖୁସିର କଥା ହେଉଛି, ଭାରତରେ ଏହି ସମୟରେ ଦିନ ହୋଇଥିବାରୁ ଚନ୍ଦ୍ରଗ୍ରହଣ ଆଦୌ ଦୃଶ୍ୟମାନ ହେବ ନାହିଁ। ତେଣୁ ଭାରତରେ ଏହି ଗ୍ରହଣର ସୂତକ ଲାଗିବ ନାହିଁ। ଅର୍ଥାତ୍ ମନ୍ଦିରର କବାଟ ବନ୍ଦ ହେବ ନାହିଁ କିମ୍ବା ରାକ୍ଷୀ ପୂର୍ଣ୍ଣିମା ପାଳନରେ କୌଣସି ଧାର୍ମିକ କଟକଣା ରହିବ ନାହିଁ । 

ସେହିପରି ଚଳିତ ବର୍ଷ ପୂର୍ଣ୍ଣିମା ତିଥି ଅଗଷ୍ଟ ୨୭ ତାରିଖ ସକାଳ ୯ଟା ୦୮ ମିନିଟରୁ ଆରମ୍ଭ ହୋଇ ଅଗଷ୍ଟ ୨୮ ସକାଳ ୯ଟା ୪୮ ମିନିଟ୍ ପର୍ଯ୍ୟନ୍ତ ରହିବ। ପ୍ରାୟତଃ ପ୍ରତିବର୍ଷ ରାକ୍ଷୀ ପୂର୍ଣ୍ଣିମାରେ ଭଦ୍ରା କାଳର ଛାୟା ପଡ଼ିଥାଏ, ଯାହାକି ଅଶୁଭ ବୋଲି ବିବେଚନା କରାଯାଏ। ମାତ୍ର ଚଳିତ ବର୍ଷ ଭଦ୍ରା କାଳ ଅଗଷ୍ଟ ୨୭ ତାରିଖ ରାତି ୯ଟା ୩୨ ମିନିଟରେ ଶେଷ ହୋଇଯାଉଛି। ଫଳରେ ଅଗଷ୍ଟ ୨୮ ତାରିଖ ସକାଳେ ରାକ୍ଷୀ ବାନ୍ଧିବା ପାଇଁ ଏକ ନିର୍ଦ୍ଦୋଷ ଏବଂ ପବିତ୍ର ସମୟ ମିଳିବ। ତେଣୁ ଅଗଷ୍ଟ ୨୮ ତାରିଖ ସକାଳ ୫ଟା ୫୮ ମିନିଟରୁ ନେଇ ସକାଳ ୯ଟା ୪୮ ମିନିଟ୍ ମଧ୍ୟରେ ରାକ୍ଷୀ ବାନ୍ଧିବା ପାଇଁ ସର୍ବୋତ୍ତମ ମୁହୂର୍ତ୍ତ ରହିଛି। ଏହି ସମୟରେ ଭଉଣୀମାନେ ନିଜ ଭାଇମାନଙ୍କ ରାକ୍ଷୀ ବାନ୍ଧି ମିଠା ଖୁଆଇ ପାରିବେ ।

ଗ୍ରହଣର ସୂତକ ନଥିବାରୁ ରୋଷେଇ କରିବା ଉପରେ ମଧ୍ୟ କୌଣସି ପ୍ରତିବନ୍ଧକ ଲାଗିବ ନାହିଁ।