ହୀରାକୁଦର ମରାମତି ଓ ରକ୍ଷଣାବେକ୍ଷଣ ନହେଲେ ଆଗକୁ ବିପଦ ମାଡି ଆସୁଛି
Khabar Odisha:State-odisha-if-no-repair-of-hirakud-dam-it-will-come-danger-for-us
ଭୁବନେଶ୍ୱର, ଅଗଷ୍ଟ ୧୪(ଖବର ଓଡ଼ିଶା):

ହୀରାକୁଦ ବନ୍ଧ ଦିନକୁ ଦିନ ର୍ଦୁବଳ ହେବାରେ ଲାଗିଛି । ଡ୍ୟାମର ଜଳଧାରଣାର କ୍ଷମତା କମିବା ସହ ପଟୁ ମାଟି ଜମା ହେବାରେ ଲାଗିଛି । ହୀରାକୁଦ ଡ୍ୟାମ ବନ୍ୟା ନିୟନ୍ତ୍ରଣ କରିବା ପାଇଁ, ଜଳ ସେଚନ କରିବା ପାଇଁ, ପିଇବା ପାଣିର ବ୍ୟବସ୍ଥା କରିବା ପାଇଁ ଏବଂ ଲୋକଙ୍କ ଆବଶ୍ୟକତା ପୂରଣ କରିବା ପାଇଁ  କାର୍ଯ୍ୟକାରୀ ହୋଇଥିଲା । କିନ୍ତୁ ରକ୍ଷଣାବେକ୍ଷଣା ଅଭାବ ଓ ପଟୁମାଟି ମାଡିଥିବା ସ୍ଥାନକୁ ପରିସ୍କାର ନକରିବା ଯୋଗୁଁ ଜଳଧାରଣର କ୍ଷମତା କମିବାର ଲାଗିଛି । ଅନ୍ୟପଟେ ହୀରାକୁଦ ବନ୍ଧରେ ବଡ ବଡ ଫାଟ ସୃଷ୍ଟି ହେଲାଣି । ଏଥିପାଇଁ କେନ୍ଦ୍ର ଜଳଶକ୍ତି ମନ୍ତ୍ରୀ ଯେଉଁ ୬୦୦ କୋଟି ଟଙ୍କା ଘୋଷଣା କରିଛନ୍ତି । ତୁରନ୍ତ ମରାମତି ଓ ରକ୍ଷଣାବେକ୍ଷଣ ନହେଲେ ଆଗକୁ ବିପଦ ମାଡି ଆସୁଛି ବୋଲି ସାଂସଦ ଓ ରାଷ୍ଟ୍ରୀୟ ସଂପାଦକ ସୁରେଶ ପୁଜାରୀ କହିଛନ୍ତି ।

ପୂଜାରୀ କହିଛନ୍ତି ଯେ, ୧୯୪୮ ମସିହାରେ ହୀରାକୁଦ ବନ୍ଧ ନିର୍ମାଣ କାର୍ଯ୍ୟ ଆରମ୍ଭ ହୋଇ ୧୯୫୬ ମସିହାରେ ଶେଷ ହୋଇଥିଲା  । ଯାହାର ଆୟୁ ଥିଲା ୧୦୦ ବର୍ଷ  । ଦୀର୍ଘ  ୭୫ ବର୍ଷ ହୀରାକୁଦ ହୋଇ ସାରିଥିବାବେଳେ  ବାଲି ଏବଂ ପ୍ରେସର ପାଇଁ ଏଥିରେ ବଡ ବଡ ଫାଟ ଦେଖାଗଲାଣି  । ଯଦି ଡ୍ୟାମ ଭୁଶୁଡିଯାଏ ତେବେ ସମ୍ବଲପୁର ଏବଂ ବରଗଡ ସହର ସଂପୂର୍ଣ୍ଣ ଧ୍ୱଂସ ହୋଇଯିବ। ଡ୍ୟାମରେ ଯେଉଁ ସୁଇସ୍ ଗେଟ୍ ସବୁ ଅଛି ସେ ସବୁ ପୁରୁଣା ଯୁଗର ତାକୁ ମାନୁଆଲି ତଳ ଉପର କରି ଖୋଲାଯାଉଛି ଏବଂ ବନ୍ଦ କରାଯାଉଛି। ଏବେ ଏଥିରେ କଳଙ୍କ ଲାଗିବାରୁ  ଏହା କାମ କରୁନାହିଁ । 

ସେ କହିଛନ୍ତି ଯେ, ୧୯୯୫ ମସିହାରେ କେନ୍ଦ୍ରୀୟ ଜଳ କମିଶନର ଅନୁସନ୍ଧାନ ଅନୁଯାୟୀ ହିରାକୁଦ ବନ୍ଧରେ ୩୭.୩୫ ପ୍ରତିଶତ ବାଲିଚର ମାଡିଯାଇଥିଲା । ବର୍ତମାନ ଏହା ନିଶ୍ଚିତ ଭାବେ ବୃଦ୍ଧି ପାଇ ୪୦ ପ୍ରତିଶତରୁ ଅଧିକ ହୋଇସାରିଥିବ । ଯାହା ଫଳରେ ଏକ ତୃତୀୟାଶଂ ଜଳ ଧାରଣ କ୍ଷମତା କମିଯାଇଛି । ଛତିଶଗଡର ଉପର ମୁଣ୍ଡରେ ଅନେକ ଗୁଡିଏ ବ୍ୟାରେଜ ନିର୍ମାଣ କାରଣରୁ ସାଧାରଣ ଭାବରେ ଯେଉଁ ଜଳ ବର୍ଷା ସମୟରେ  ଆସୁଥିଲା ତାହା ଧିରେ ଧିରେ କମିବାରେ ଲାଗିଲାଣି । ଡାଲୁଆ ଫସଲ ସମୟରେ ୮ ହଜାର ମିଲିୟନ୍ କ୍ୟୁବିକ୍ ମିଟର ଜଳର ଆବଶ୍ୟକତା ଥିଲା କିନ୍ତୁ ମାତ୍ର ୫  ହଜାର ମିଲିୟନ୍ କ୍ୟୁବିକ୍ ମିଟର ଜଳ ସେଚନ ପାଇଁ ହିରାକୁଦ ବନ୍ଧ ଯୋଗାଉଛି । ଏହି ପରିସ୍ଥିତିକୁ ସୁଧାରନଗଲେ ଆଗାମୀ ୨୫ ରୁ ୩୦ ବର୍ଷ ପରେ ହିରାକୁଦରେ ଜଳ ଧାରଣ  କ୍ଷମତା ଏବଂ ଜଳ ସେଚନ କମ୍ ହୋଇଯିବ । ଯେଉଁ ଉଦ୍ଦେଶ୍ୟରେ ଏହାକୁ କାର୍ଯ୍ୟକାରୀ କରାଯାଇଥିଲା ତାହା ସଂପୂର୍ଣ୍ଣ ଭାବେ  ବନ୍ଦ ହୋଇଯିବ  । 

ହୀରାକୁଦ ବନ୍ଧର ମରାମତି, ସୁଇସ୍ ଗେଟ୍ରେ ଆଧୁନିକରଣ ଏବଂ ବିଦ୍ୟୁତ୍ ଚାଳିତ ସୁଇସ୍ ଗେଟ୍ କରିବାର ବ୍ୟବସ୍ଥା ପାଇଁ କେନ୍ଦ୍ର ସରକାର ୬୦୦ କୋଟି ଟଙ୍କାର ଅନୁଦାନ ଦେଇଛନ୍ତି । ରାଜ୍ୟସରକାର ଆପଣାଇଥିବା ପୂରୁଣା ବ୍ୟବସ୍ଥା ଛାଡି ନୂତନ ପଦ୍ଧତିରେ ପଟୁ ମାଟିକୁ ବାହାର କରିବା କାର୍ଯ୍ୟକୁ ତ୍ୱରାନ୍ୱିତ କରିବା ଦରକାର । ରାଜ୍ୟ ସରକାର ତୁରନ୍ତ ଏକ ସ୍ୱତନ୍ତ୍ର ଟିମ ଗଠନ କରି ଏହି କାର୍ଯ୍ୟକୁ ତ୍ୱରାନ୍ୱିତ କରନ୍ତୁ । ଫାଟ ଥିବା ବନ୍ଧର ମରାମତି, ନୂତନ ସୁଇଚ ଗେଟ ଲଗାଇବା ସହ କେନ୍ଦ୍ର ସରକାର ବିଶେଷଜ୍ଞମାନଙ୍କୁ ପଠାଇ ହିରାକୁଦ ବନ୍ଧକୁ ଅନୁସୁନ୍ଧାନ କରିବା ଅବଶ୍ୟକତା ଥିବାବେଳେ ରାଜ୍ୟ ସରକାର ସଂପୂର୍ଣ୍ଣ ସହଯୋଗ କରିବାକୁ ପୂଜାରୀ ଅନୁରୋଧ କରିଛନ୍ତି । 

ଅନ୍ତରାଜ୍ୟ ନଦୀ ଜଳ ଆବଂଟନ ଆଇନ ଆଧାରରେ ରାଜ୍ୟ ସରକାର ନିଜ ପକ୍ଷ ରଖି ମହାନଦୀ ଜଳର ନ୍ୟାର୍ଯ୍ୟ ହକ୍ ପାଇଁ ଛତିଶଗଡ ରାଜ୍ୟ ଉପରେ ଲଗାମ ଲଗାଇବାକୁ ସେ ପରାମର୍ଶ ଦେଇଛନ୍ତି । ଅନ୍ୟପଟେ ମୋଦୀ ସରକାର ହିରାକୁଦ ବନ୍ଧ ମରାମତି ପାଇଁ ୬୦୦ କୋଟି ଟଙ୍କା ଅନୁଦାନ ଦେଇଥିବାରୁ ଓଡିଶା ସମେତ ସମସ୍ତ ସମ୍ବଲପୁରବାସୀ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ।

Subscribe

National International State Sports Entertainment