ନୂଆଦିଲ୍ଲୀ: ଦେଶର ରାଜନୀତିରେ ଏକ ବଡ଼ ଧରଣର ଓଲଟଫେର ଦେଖିବାକୁ ମିଳିଛି। ଆମ୍ ଆଦ୍‌ମୀ ପାର୍ଟି (AAP) ର ସାତ ଜଣ ରାଜ୍ୟସଭା ସାଂସଦ ବିଜେପିରେ ସାମିଲ ହେବା ପରେ ଏବେ ମାମଲା ରାଷ୍ଟ୍ରପତି ଭବନରେ ପହଞ୍ଚିଛି। ଆସନ୍ତା ମେ’ ୫ ତାରିଖ ସକାଳ ୧୦ଟା ୪୦ ମିନିଟରେ ଏହି ସାତ ସାଂସଦ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଭେଟିବାର କାର୍ଯ୍ୟକ୍ରମ ରହିଛି।

ରାଜନୈତିକ ପ୍ରତିଶୋଧର ଅଭିଯୋଗ

ବିଜେପିରେ ସାମିଲ ହୋଇଥିବା ସାଂସଦ ରାଘବ ଚଢ଼ା, ସନ୍ଦୀପ ପାଠକ, ହରଭଜନ ସିଂ, ସ୍ୱାତୀ ମାଲିୱାଲ, ଅଶୋକ କୁମାର ମିତ୍ତଲ, ବିକ୍ରମଜିତ ସିଂ ସାହନି ଏବଂ ରାଜେନ୍ଦ୍ର ଗୁପ୍ତା ରାଷ୍ଟ୍ରପତିଙ୍କୁ ଭେଟି ପଞ୍ଜାବ ସରକାରଙ୍କ ବିରୋଧରେ ଫେରାଦ ହେବେ। ସେମାନଙ୍କ ଅଭିଯୋଗ ଅନୁଯାୟୀ, ଦଳ ବଦଳ କରିଥିବାରୁ ପଞ୍ଜାବ ସରକାର ସେମାନଙ୍କ ବିରୋଧରେ ପ୍ରତିଶୋଧ ପରାୟଣ ହୋଇ କାର୍ଯ୍ୟ କରୁଛନ୍ତି ଏବଂ ସରକାରୀ କଳର ଅପବ୍ୟବହାର କରାଯାଉଛି।

କେମିତି ବଞ୍ଚିଲା ସାଂସଦ ପଦ?

ସମ୍ବିଧାନର ଦଶମ ଅନୁସୂଚୀ (Anti-Defection Law) ଅନୁଯାୟୀ, ଯଦି କୌଣସି ଦଳର ଦୁଇ-ତୃତୀୟାଂଶ ସଦସ୍ୟ ଅନ୍ୟ ଦଳରେ ମିଶନ୍ତି, ତେବେ ସେମାନଙ୍କ ସଦସ୍ୟତା ରଦ୍ଦ ହୁଏନାହିଁ। ଆପ୍‌ର ୭ ସାଂସଦ ଏହି ନିୟମର ବ୍ୟବହାର କରି ବିଜେପିରେ ମିଶିଥିବାରୁ ରାଜ୍ୟସଭା ଅଧ୍ୟକ୍ଷ ଏହି ମିଶ୍ରଣକୁ ମଞ୍ଜୁରୀ ଦେଇଛନ୍ତି।

ମୁହାଁମୁହିଁ ସ୍ଥିତି

ଅନ୍ୟପଟେ ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନ ମଧ୍ୟ ସେହିଦିନ ରାଷ୍ଟ୍ରପତିଙ୍କୁ ଭେଟି ସାଂସଦମାନଙ୍କୁ ଫେରାଇ ଆଣିବା ଏବଂ ମିଶ୍ରଣ ପ୍ରକ୍ରିୟାର ବୈଧତା ଉପରେ ପ୍ରଶ୍ନ ଉଠାଇ ପାରନ୍ତି। ଫଳରେ ମେ’ ୫ ତାରିଖରେ ଦିଲ୍ଲୀ ରାଜନୀତି ସରଗରମ ରହିବ।