ଭୁବନେଶ୍ୱର: 'ସମୃଦ୍ଧ ଓଡ଼ିଶା ୨୦୩୬' ଲକ୍ଷ୍ୟକୁ ଆଗକୁ ନେବା ପାଇଁ ରାଜ୍ୟ ସରକାର ଶିଳ୍ପ କ୍ଷେତ୍ରରେ ଏକ ବଡ଼ ସଫଳତା ହାସଲ କରିଛନ୍ତି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଦୂରଦୃଷ୍ଟିସମ୍ପନ୍ନ ନେତୃତ୍ୱରେ ରାଜ୍ୟରେ ଶିଳ୍ପର ବିକାଶ ସହ ରୋଜଗାର ସୃଷ୍ଟି ପ୍ରକ୍ରିୟା ବେଶ୍ ଜୋରଦାର ହୋଇଛି। ମୁଖ୍ୟ ଶାସନ ସଚିବ ଅନୁ ଗର୍ଗଙ୍କ ପୌରୋହିତ୍ୟରେ ବସିଥିବା ୧୪୯ତମ SLSWCA ବୈଠକରେ ମୋଟ ୨,୭୮୦.୧୦ କୋଟି ଟଙ୍କାର ୧୪ଟି ଗୁରୁତ୍ୱପୂର୍ଣ୍ଣ ଶିଳ୍ପ ନିବେଶ ପ୍ରସ୍ତାବକୁ ସବୁଜ ପତାକା ଦେଖାଯାଇଛି। ଏହିସବୁ ପ୍ରକଳ୍ପ କାର୍ଯ୍ୟକାରୀ ହେଲେ ରାଜ୍ୟର ୧୪,୧୦୪ ଜଣ ଯୁବକଯୁବତୀଙ୍କ ପାଇଁ ନୂଆ ନିଯୁକ୍ତି ସୁଯୋଗ ସୃଷ୍ଟି ହେବ।

ଏହି ନୂତନ କାରଖାନା ଓ ପ୍ରକଳ୍ପଗୁଡ଼ିକ ଅନୁଗୋଳ, ବଲାଙ୍ଗୀର, କଟକ, ଢେଙ୍କାନାଳ, ଗଞ୍ଜାମ, କେନ୍ଦୁଝର, ଖୋର୍ଦ୍ଧା, ନୟାଗଡ଼, ନୂଆପଡ଼ା ଏବଂ ସୁନ୍ଦରଗଡ଼ ଭଳି ବିଭିନ୍ନ ଜିଲ୍ଲାରେ ପ୍ରତିଷ୍ଠା କରାଯିବ।

ଖାଦ୍ୟ ପ୍ରକ୍ରିୟାକରଣ ଓ କୃଷି କ୍ଷେତ୍ର

ଖୋର୍ଦ୍ଧା କିମ୍ବା କଟକରେ ହାଲଦିରାମ ସ୍ନାକ୍ସ ୫୦୦ କୋଟି ଟଙ୍କାର ପ୍ରକଳ୍ପ ବସାଇବ, ଯେଉଁଥିରୁ ୮୦୦ ଜଣଙ୍କୁ ଚାକିରି ମିଳିବ। ସେହିପରି ତିୱାନା ନ୍ୟୁଟ୍ରିସନ୍ ୧୪୦ କୋଟି ଟଙ୍କା ବ୍ୟୟରେ ଗୋ-ଖାଦ୍ୟ ୟୁନିଟ୍ (୨,୫୦୦ ନିଯୁକ୍ତି) ଏବଂ ପ୍ରିମିୟମ୍ ଚିକ୍ ଫିଡ୍ସ ୧୦୫.୩୮ କୋଟି ଟଙ୍କା ବିନିଯୋଗରେ କୁକୁଡ଼ା ଖାଦ୍ୟ ପ୍ଲାଣ୍ଟ (୧,୦୫၄ ନିଯୁକ୍ତି) ସ୍ଥାପନ କରିବ।

ଟେକ୍ସଟାଇଲ୍ ଓ ବସ୍ତ୍ର ଶିଳ୍ପ

ଢେଙ୍କାନାଳରେ ସାହାନା କ୍ଲୋଦିଂ ୨୫୧.୪୫ କୋଟି ଟଙ୍କା ନିବେଶ କରିବାକୁ ଯାଉଛି, ଯାହା ମାଧ୍ୟମରେ ସର୍ବାଧିକ ୫,୧୦୪ ଜଣଙ୍କୁ ନିଯୁକ୍ତି ସୁଯୋଗ ମିଳିବ। ଏଥିସହିତ ବଲାଙ୍ଗୀରରେ ପ୍ରତିମା ଆଗ୍ରୋ ସ୍ପିନିଂ ମିଲ୍ ୧୨୫ କୋଟି ଟଙ୍କାର ସୂତା ପ୍ରକ୍ରିୟାକରଣ କାରଖାନା (୪୦୦ ନିଯୁକ୍ତି) ଗଢ଼ିତୋଳିବ।

ରସାୟନ ଓ ଫାର୍ମାସ୍ୟୁଟିକାଲ୍ସ

ଗଞ୍ଜାମରେ ପ୍ରାସୋଲ କେମିକାଲ୍ସ ୪୫୦ କୋଟି (୪୫୮ ନିଯୁକ୍ତି), ସୁନ୍ଦରଗଡ଼ରେ ନ୍ୟୁ ଜେନେରେସନ ମାନୁଫାକ୍ଚରିଂ ୮୦ କୋଟି (୩୦୧ ନିଯୁକ୍ତି) ଏବଂ ନୂଆପଡ଼ାରେ ହାସଭାନ୍ ରସାୟନ ୫୫ କୋଟି ଟଙ୍କା (୭୦ ନିଯୁକ୍ତି) ବିନିଯୋଗ କରିବେ।

ଇଲେକ୍ଟ୍ରୋନିକ୍ସ ଓ ମେଡିକାଲ୍ ସରଞ୍ଜାମ

ଖୋର୍ଦ୍ଧାରେ ସିର୍ମା ଏସଜିଏସ ଟେକ୍ନୋଲୋଜି ୩୦୦ କୋଟି ଟଙ୍କା ନିବେଶରେ PCB ଆସେମ୍ବଲି ୟୁନିଟ୍ (୫୦୦ ନିଯୁକ୍ତି) ଏବଂ ଶସ୍ତାସୁନ୍ଦର ହେଲଥବଡି ୫୬ କୋଟି ଟଙ୍କାର ମେଡିକାଲ ଉପକରଣ ପ୍ରକଳ୍ପ (୧,୦୫୦ ନିଯୁକ୍ତି) ବସାଇବ।

ଧାତବ, ଇସ୍ପାତ ଓ ଭିତ୍ତିଭୂମି

କେନ୍ଦୁଝରରେ ମହାତ୍ରିପୁରସୁନ୍ଦରୀ ମିନେରାଲ୍ସ ୧୬୦ କୋଟି (୧,୪୬୦ ନିଯୁକ୍ତି), କଟକରେ ଶ୍ରୀ ଜଗନ୍ନାଥ ଇସ୍ପାତ ୯୦.୯၄ କୋଟି(୨୩୦ ନିଯୁକ୍ତି) ଏବଂ ଢେଙ୍କାନାଳରେ NKS ଆର୍ଥବିଲ୍ଡ ୬୦.୯୮ କୋଟି ଟଙ୍କାର ପ୍ରକଳ୍ପ ସ୍ଥାପନ କରିବେ। ଏହାଛଡ଼ା ଅନୁଗୋଳରେ ମହାନଦୀ କୋଲଫିଲ୍ଡସ (MCL) ୪୦୫.୩୫ କୋଟି ଟଙ୍କା ବ୍ୟୟରେ ନୂତନ ରେଳ ସାଇଡିଂ ନିର୍ମାଣ କରିବ।