ଗଞ୍ଜାମ ସହର କଲେଜ ରୋଡ଼ ଅଞ୍ଚଳରେ ଅବସ୍ଥିତ ମା’ ଦକ୍ଷିଣ କାଳୀଙ୍କ ପବିତ୍ର ତେର ଦିନିଆ ଦଣ୍ଡଯାତ୍ରା ଗୁରୁବାର ଭକ୍ତିମୟ ପରିବେଶ ମଧ୍ୟରେ ଶୁଭାରମ୍ଭ ହୋଇଛି। ପ୍ରତିବର୍ଷର ପରମ୍ପରା ଅନୁଯାୟୀ ଏହି ଯାତ୍ରା ଅଞ୍ଚଳର ଧାର୍ମିକ ଓ ସାଂସ୍କୃତିକ ଜୀବନକୁ ଅଧିକ ଉଜ୍ଜ୍ୱଳ କରିଥାଏ।

ଯାତ୍ରାର ଆରମ୍ଭରେ ମା’ ଦକ୍ଷିଣ କାଳୀଙ୍କ ଘଟକୁ ଢମଣା ସାହି ସ୍ଥିତ ବାବା ରାମ ଲିଙ୍ଗେଶ୍ୱର ମନ୍ଦିରରେ ବିଧିବଦ୍ଧ ପୂଜାର୍ଚ୍ଚନା କରାଯାଇଥିଲା। ପୂଜା ପରେ ମା’ଙ୍କୁ ଭକ୍ତମାନଙ୍କ ସହ ଭ୍ରମଣରେ ବାହାର କରାଯାଇଥିଲା, ଯାହା ଦେଖିବାକୁ ଭକ୍ତମାନଙ୍କ ଭିଡ଼ ଲାଗିଥିଲା।

ପ୍ରଥମ ଦିନରେ ଢମଣା ସାହିରେ ମଧ୍ୟରାତ୍ରରେ ରାମ ଲିଙ୍ଗେଶ୍ୱର ନାଟ୍ୟ କଳା ସାଂସଦ ଦ୍ୱାରା ପୌରାଣିକ ନାଟକ “କାନ୍ଦଇ ଭାଉଜ ହସେ ଦିଅର” ପରିବେଷଣ ହେବାକୁ ଯାଉଛି। ଏହା ଯାତ୍ରାର ମୁଖ୍ୟ ଆକର୍ଷଣ ହେବ ବୋଲି ମୁଖ୍ୟ ପରିଚାଳକ ପ୍ରଭାତ ସାହୁ ସୂଚନା ଦେଇଛନ୍ତି। ତେବେ ଏହି ଦଣ୍ଡଯାତ୍ରା ମେରୁ ସଂକ୍ରାନ୍ତି ପର୍ଯ୍ୟନ୍ତ ଚାଲିବ। ଏହି ସମୟରେ ମା’ ଦକ୍ଷିଣ କାଳୀ ଗାଁରୁ ଗାଁକୁ ଭ୍ରମଣ କରିବେ ଏବଂ ମାନସିକଧାରୀ ଭକ୍ତମାନେ କଠିନ ତପସ୍ୟା ସ୍ୱରୂପ ଦଣ୍ଡ ଭୋଗ କରିବେ।

ଢହ ଢହ ଖରାରେ ମଧ୍ୟ ଭକ୍ତମାନଙ୍କ ଏହି ଭକ୍ତି ଓ ନିଷ୍ଠା ଦେଖିବାକୁ ଅଦ୍ଭୁତ ଲାଗେ। ଏହି ପବିତ୍ର ଯାତ୍ରାରେ ଅଧିକାରୀ ଭିମା ରେଡି, ମୁଖ୍ୟ ପରିଚାଳକ ସନ୍ତୋଷ ସାହୁ ଓ ପ୍ରଭାତ ସାହୁ ଆଦି ବ୍ୟକ୍ତିବିଶେଷ ମା’ଙ୍କ ସହ ଗାଁକୁ ଗାଁ ପରିଭ୍ରମଣ କରିବେ। ଯାତ୍ରାର ଅନ୍ତିମ ଦିନରେ ମେରୁ ସଂକ୍ରାନ୍ତି ଦିନ ଦାମୋଦରପୁର କଲେଜ ରୋଡ଼ ସ୍ଥିତ ମା’ ଦକ୍ଷିଣ କାଳୀଙ୍କ ମନ୍ଦିର ନିକଟରେ ମେରୁ ଯାତ୍ରା କରାଯିବ। ଗଞ୍ଜାମର ଏହି ପାରମ୍ପରିକ ଦଣ୍ଡଯାତ୍ରା ଭକ୍ତି, ସଂସ୍କୃତି ଓ ଆସ୍ଥାର ଏକ ଜୀବନ୍ତ ଉଦାହରଣ ଭାବେ ସମସ୍ତଙ୍କ ମନକୁ ଆକର୍ଷିତ କରୁଛି।