ଭୁବନେଶ୍ୱର: ରାଜଧାନୀ ଭୁବନେଶ୍ୱରବାସୀଙ୍କ ପାଇଁ ଏକ ବଡ଼ ଆଶ୍ୱସ୍ତିକର ଖବର ସାମ୍ନାକୁ ଆସିଛି। ସହରର ସବୁଠାରୁ ବ୍ୟସ୍ତବହୁଳ ଜୟଦେବ ବିହାର-ନନ୍ଦନକାନନ ରୁଟ୍‌ରେ ଏବେ ଟ୍ରାଫିକ ସମସ୍ୟାର ସ୍ଥାୟୀ ସମାଧାନ ହେବାକୁ ଯାଉଛି। ଏହି ସମ୍ପୂର୍ଣ୍ଣ ରାସ୍ତାକୁ ସମ୍ପୂର୍ଣ୍ଣ ଭାବେ 'ଟ୍ରାଫିକ ଫ୍ରି' କରିବା ପାଇଁ ରାଜ୍ୟ ସରକାର ଏକ ବଡ଼ ନିଷ୍ପତ୍ତି ନେଇଛନ୍ତି। ଏଣିକି ଏହି ସଡ଼କ ୮ ଲେନ୍ ବିଶିଷ୍ଟ ହେବ ଏବଂ ଏଥିପାଇଁ ରାଜ୍ୟ କ୍ୟାବିନେଟ ବୈଠକରେ ପୂର୍ତ୍ତ ବିଭାଗର ମେଗା ପ୍ରକଳ୍ପ ପ୍ରସ୍ତାବ ଉପରେ ମୋହର ବାଜିଛି।

ଏହି ବୃହତ ପ୍ରକଳ୍ପ ପାଇଁ ସରକାର ପ୍ରାୟ ୫୭୯ କୋଟି ଟଙ୍କା ଖର୍ଚ୍ଚ କରିବେ ବୋଲି ଜଣାପଡ଼ିଛି। ଆଗାମୀ ଦୁଇ ବର୍ଷ ମଧ୍ୟରେ ଏହି ସମ୍ପୂର୍ଣ୍ଣ ରାସ୍ତା ନିର୍ମାଣ କାର୍ଯ୍ୟ ଶେଷ କରିବାକୁ ସରକାର ଏକ ବଡ଼ ଲକ୍ଷ୍ୟ ରଖିଛନ୍ତି। ଏହି ପ୍ରକଳ୍ପ ଦ୍ୱାରା ଜୟଦେବ ବିହାର-ନନ୍ଦନକାନନ କରିଡରରେ ପ୍ରତିଦିନ ହେଉଥିବା ଗାଡ଼ି ମୋଟରର ପ୍ରବଳ ଭିଡ଼ ବହୁ ପରିମାଣରେ ହ୍ରାସ ପାଇବ।

ଏହି ସମ୍ପ୍ରସାରଣ କାର୍ଯ୍ୟ କଳିଙ୍ଗ ଷ୍ଟାଡିୟମ ଗେଟ୍ ନଂ-୪ ଠାରୁ ଆରମ୍ଭ ହୋଇ ରଘୁନାଥପୁର ସେତୁ ପର୍ଯ୍ୟନ୍ତ ସାଢେ ୯ କିଲୋମିଟର ରାସ୍ତା ପାଇଁ କରାଯିବ। ବର୍ତ୍ତମାନ ଥିବା ୬ ଲେନ୍ ରାସ୍ତାକୁ ୮ ଲେନ୍ ବିଶିଷ୍ଟ ମୁଖ୍ୟ ସଡ଼କ ସହିତ ସର୍ଭିସ୍ ରୋଡ୍‌ରେ ପରିଣତ କରାଯିବ। ଏହି ନୂତନ ବ୍ୟବସ୍ଥା ଦ୍ୱାରା ବାରଙ୍ଗ ଏବଂ କଟକ ଆଡ଼କୁ ଯାଉଥିବା ଲୋକମାନେ ବିନା କୌଣସି ବାଧାରେ ନିରବଚ୍ଛିନ୍ନ ଭାବେ ଯାତାୟାତ କରିପାରିବେ।

ଗାଡ଼ିଗୁଡ଼ିକର ଅବାଧ ଚଳାଚଳ ଏବଂ ସୁରକ୍ଷା ପାଇଁ ଜୟଦେବ ବିହାର ଛକରେ NH-16 ଉପରେ ଏକ ଅତ୍ୟାଧୁନିକ ୪-ଲେନ୍ ବିଶିଷ୍ଟ କେବଲ୍-ଷ୍ଟେଡ୍ (Cable-Stayed) ସେତୁ ନିର୍ମାଣ ହେବ। ଏହା ସହିତ କଳିଙ୍ଗ ହସ୍ପିଟାଲ ଛକ, ଡମଣା ଛକ, କିଟ୍ (KIIT) ଛକ ଏବଂ କଳାରାହାଙ୍କ ଛକରେ ସ୍ୱତନ୍ତ୍ର ୪-ଲେନ୍ ବିଶିଷ୍ଟ ଫ୍ଲାଏଓଭର ଏବଂ ମାଇନର ବ୍ରିଜ୍ ନିର୍ମାଣ କରାଯିବ, ଯାହା ଦ୍ୱାରା ଛକଗୁଡ଼ିକରେ ଗାଡ଼ି ଅଟକିବ ନାହିଁ।

ଏହି ସୁନ୍ଦର କରିଡରରେ ୫.୫ ମିଟର ଚଉଡ଼ାର ସର୍ଭିସ୍ ରୋଡ୍ ଏବଂ ୭.୫ ମିଟର ଚଉଡ଼ାର ସ୍କ୍ରିପ୍ ରୋଡ୍ ମଧ୍ୟ ରହିବ। ଏହାଛଡ଼ା ଚାଲି ଚାଲି ଯାଉଥିବା ପଦଚାରୀଙ୍କ ପାଇଁ ସ୍ୱତନ୍ତ୍ର ଭିତ୍ତିଭୂମିର ବିକାଶ କରାଯିବ। ସଡ଼କ ସୁରକ୍ଷାକୁ ଦୃଷ୍ଟିରେ ରଖି ଦୁର୍ଘଟଣାପ୍ରବଣ ସ୍ଥଳଗୁଡ଼ିକୁ ସମ୍ପୂର୍ଣ୍ଣ ରୂପେ ଦୂର କରାଯିବ।

ରାସ୍ତାର ସୌନ୍ଦର୍ଯ୍ୟକରଣ ଉପରେ ମଧ୍ୟ ବିଶେଷ ଧ୍ୟାନ ଦିଆଯାଇଛି। ସାରା ରାସ୍ତାରେ ଆଧୁନିକ ଷ୍ଟ୍ରିଟ୍ ଲାଇଟିଂ, ପ୍ରୋପର ରୋଡ୍ ମାର୍କିଂ, ଜଙ୍କସନ ଡେଭଲପମେଣ୍ଟ ଏବଂ ସ୍ୱତନ୍ତ୍ର ପାର୍କିଂ ବେ ର ବ୍ୟବସ୍ଥା କରାଯିବ। ପୂର୍ତ୍ତ ବିଭାଗର ଏହି ଯୋଜନା କାର୍ଯ୍ୟକାରୀ ହେଲେ ଆଗାମୀ ଦିନରେ ରାଜଧାନୀର ପରିବହନ ବ୍ୟବସ୍ଥାରେ ଏକ ବଡ଼ ପରିବର୍ତ୍ତନ ଆସିବ।