ଭୁବନେଶ୍ୱର: ସୁନ୍ଦରଗଡ଼ରେ ପାଉଁଶ ମାଫିଆଙ୍କ ଦୌରାତ୍ମ୍ୟରେ ଅତିଷ୍ଠ ସାଧାରଣ ଜନତା । ପରିବେଶ ଦୂଷିତ ହେବା ସହିତ ଲୋକଙ୍କ ସ୍ୱାସ୍ଥ୍ୟ ଉପରେ ପ୍ରତିକୂଳ ପ୍ରଭାବ ପକାଉଛି । ଯାହାକୁ ନେଇ ଗଭୀର ଉଦବେଗ ପ୍ରକାଶ କରିଛନ୍ତି ବିଧାନସଭା ଉପବାଚସ୍ପତି ଭବାନୀ ଶଙ୍କର ଭୋଇ । ଏଥିପାଇଁ ସ୍ପେଶାଲ୍ ଟାସ୍କଫୋର୍ସ ଗଠନ କରି ଆବଶ୍ୟକୀୟ ପଦକ୍ଷେପ ଗ୍ରହଣ କରିବାକୁ ଉପବାଚସ୍ପତି ସୁନ୍ଦରଗଡ଼ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି । 

ସୁନ୍ଦରଗଡ଼ ଜିଲ୍ଲାର ବିଭିନ୍ନ ସ୍ଥାନରେ ବେଆଇନ ପାଉଁଶ ପରିବହନ ଏବଂ ଅବାଧରେ ଫ୍ଲାଏ ଆଶ୍ ପକାଯିବାକୁ ନେଇ ଉପବାଚସ୍ପତି ଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ କରିଛନ୍ତି । ଏହା ପରିବେଶ ଦୂଷିତ, କୃଷି ଜମି ଏବଂ ଜଳାଶୟକୁ ପ୍ରଦୂଷିତ କରିବା ସହିତ ଲୋକଙ୍କ ସ୍ୱାସ୍ଥ୍ୟ ଉପରେ କୁପ୍ରଭାବ ପକାଉଛି । ଯାହା ସ୍ଥାନୀୟ ଜନସାଧାରଣ ମନରେ କ୍ରୋଧ ସୃଷ୍ଟି କରୁଛି । ଏହାକୁ ରୋକିବାକୁ ଜିଲ୍ଲାର ତିନୋଟି ସବଡିଭିଜନରେ ସ୍ୱତନ୍ତ୍ର ଟାସ୍କ ଫୋର୍ସ ବା ଏସଟିଏଫ୍ ଗଠନ କରି କଠୋର ପଦକ୍ଷେପ ନେବାକୁ ଉପବାଚସ୍ପତି ଅନୁରୋଧ କରିଛନ୍ତି । ପ୍ରତ୍ୟେକ ଟାସ୍କ ଫୋର୍ସରେ ପୋଲିସ ବିଭାଗ, ବନ ବିଭାଗ, ରାଜସ୍ୱ ବିଭାଗ, ପରିବହନ ବିଭାଗ ଏବଂ ଓଡ଼ିଶା ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ଅଧିକାରୀମାନେ ରହିପାରିବେ । ସେମାନଙ୍କ ପାଖରେ ପର୍ଯ୍ୟାପ୍ତ ମାନବସମ୍ବଳ ରହିବ ଏବଂ ପ୍ରଭାବଶାଳୀ କାର୍ଯ୍ୟାନୁଷ୍ଠାନ ପାଇଁ ଉତ୍ସର୍ଗୀକୃତ ଯାନବାହନ ଯୋଗାଇ ଦିଆଯାଇପାରିବ। 

ଏହି ଏସଟିଏଫ୍ ନିୟମିତ ପାଟ୍ରୋଲିଂ, ନଜର ରଖିବା, ବେଆଇନ ଫ୍ଲାଏ ଆସ୍ ପରିବହନକୁ ରୋକିବା, ବେଆଇନ ଡମ୍ପିଂ ରୋକିବା, ଅପରାଧକାରୀ ଯାନଗୁଡ଼ିକୁ ଜବତ କରିବା, ଆଇନ ଅନୁଯାୟୀ ଦଣ୍ଡ ଦେବା ଏବଂ ଅଭ୍ୟାସଗତ ଅପରାଧୀଙ୍କ ବିରୁଦ୍ଧରେ ଫୌଜଦାରୀ କାର୍ଯ୍ୟାନୁଷ୍ଠାନ ଗ୍ରହଣ କରିପାରିବେ । ଏସଟିଏଫ୍ ଟିମ୍ ତିନୋଟି ସିଫ୍ଟରେ ୨୪ ଘଣ୍ଟା କାର୍ଯ୍ୟରତ ରହିବେ । ଚିହ୍ନଟ ହୋଇଥିବା ହଟସ୍ପଟ୍‌ଗୁଡ଼ିକରେ ଅଚାନକ ଚଢ଼ାଉ କରାଯିବ । ଏସଟିଏଫ୍ ଜିଲ୍ଲାପାଳଙ୍କୁ ସାପ୍ତାହିକ ରିପୋର୍ଟ ଦାଖଲ କରିବେ । 

ବେଆଇନ ପାଉଁଶ ପରିବହନ ରୋକିବାକୁ ଏକ ଜିଲ୍ଲାସ୍ତରୀୟ ତଦାରଖ ବ୍ୟବସ୍ଥା କରିବାକୁ ଉପବାଚସ୍ପତି ପରାମର୍ଶ ଦେଇଛନ୍ତି । ଏଥିରେ ସ୍ଥାନୀୟ ତହସିଲଦାର, ଉପଜିଲ୍ଲାପାଳଏବଂ ଉପ-ବିଭାଗୀୟ ପୋଲିସ ଅଧିକାରୀ ସାମିଲ ହେବେ ।