ବେଙ୍ଗାଲୁରୁ: ଆଇପିଏଲ୍ ୨୦୨୫ର ଫାଇନାଲରେ ପଞ୍ଜାବ କିଙ୍ଗ୍ସକୁ ହରାଇ ପ୍ରଥମ ଥର ଟାଇଟଲ୍ ଜିତିଥିବା ଆରସିବି । ଦଳ ସହ ବେଙ୍ଗାଲୁରୁ ସହର ପୂରା ଉତ୍ସବରେ ଡୁବି ଯାଇଥିଲା । ତେବେ ଖେଳାଳି ଓ ପ୍ରଶଂସକଙ୍କ ଖୁସି ଅଧିକ ସମୟ ରହି ନ ଥିଲା । ଉତ୍ସବ ପାଳନ ପାଇଁ ଖେଳାଳିଙ୍କ ଉଦ୍ଦେଶ୍ୟରେ ଚିନ୍ନାସ୍ୱାମୀ ଷ୍ଟାଡିୟମରେ ଏକ ସ୍ୱତନ୍ତ୍ର କାର୍ଯ୍ୟକ୍ରମର ଆୟୋଜନ ହୋଇଥିଲା । ତେବେ ପ୍ରବଳ ଭିଡ କାରଣରୁ ଷ୍ଟାଡିୟମ ବାହାରେ ଭୟଙ୍କର ଦଳାଚକଟା ହୋଇଥିଲା । ଏଥିରେ ୧୧ ଜଣଙ୍କ ମୃତ୍ୟୁ ଘଟିଥିଲା । ଏବେ ଆରସିବି ଟିମ୍ ମୃତକଙ୍କ ପରିଜନ ପ୍ରତି ସହାୟତା ରାଶି ଘୋଷଣା କରିଛନ୍ତି ।
ଆରସିବି ପକ୍ଷରୁ ଏକ୍ସରେ ଲେଖା ହୋଇଛି ଯେ, ୨୦୨୫ ଜୁନ ୪ ତାରିଖରେ ଆମର ହୃଦୟ ଭାଙ୍ଗିଥିଲା । ଆମେ ଆରସିବି ପରିବାରର ୧୧ ସଦସ୍ୟଙ୍କୁ ହରାଇଦେଲୁ । ସେମାନଙ୍କର ଅନୁପସ୍ଥିତି ସର୍ବଦା ଆମକୁ ବ୍ୟଥିତ କରିବ । ସେମାନଙ୍କ ସ୍ଥାନ ଆଉ କେହି ନେଇ ପାରିବେ ନାହିଁ । ପ୍ରଥମ ପଦକ୍ଷେପ ସ୍ୱରୂପ ଗଭୀର ସମ୍ମାନର ସହ ଆରସିବି ସେମାନଙ୍କ ପରିବାର ପିଛା ୨୫ ଲକ୍ଷ ଟଙ୍କାର ସହାୟତା ରାଶି ଦେଉଛି । କେବଳ ଏହା ଏକ ଆର୍ଥିକ ସହାୟତା ନୁହେଁ, ବରଂ ଏକତା ଓ ନିରନ୍ତର ଯତ୍ନ ନେବା ଦୃଷ୍ଟିରୁ ଦିଆଯାଉଛି । ଆରସିବି ପକ୍ଷରୁ କୁହାଯାଇଛି ଯେ, ଏହା ଆରସିବି କେୟାର୍ସର ମଧ୍ୟ ଆରମ୍ଭ ହେଉଛି । ପରବର୍ତ୍ତୀ ସମୟରେ ଏହି ବିଷୟରେ ବିସ୍ତୃତ ସୂଚନା ଦିଆଯିବ ।
ଦଳାଚକଟା ପରେ କର୍ଣ୍ଣାଟକ ସରକାର ଡି କୁହ୍ନା ଆୟୋଗ ଗଠନ କରିଥିଲା । ଏହା ପରେ ଆୟୋଗ ନିଜର ରିପୋର୍ଟରେ ଦର୍ଶାଇଥିଲା ଯେ, ବେଙ୍ଗାଲୁରୁ ଏମ ଚିନ୍ନାସ୍ୱାମୀ ଷ୍ଟାଡିୟମ ବଡ ଆୟୋଜନ ପାଇଁ ଅସୁରକ୍ଷିତ ସ୍ଥାନ । ଏହା ପରେ ମହିଳା ବିଶ୍ୱକପ୍ ୨୦୨୫ରେ ବେଙ୍ଗାଲୁରୁରେ ହେବାକୁ ଥିବା ମ୍ୟାଚକୁ ଅନ୍ୟତ୍ର ସ୍ଥାନାନ୍ତର କରାଯାଇଛି । ଏହି ମ୍ୟାଚ୍ ନଭି ମୁମ୍ବାଇରେ ଖେଳାଯିବ ।
Also read: ଜାପାନରେ ବୁଲେଟ ଟ୍ରେନରେ ବୁଲିଲେ ମୋଦୀ; ପ୍ରଧାନମନ୍ତ୍ରୀ ଇଶିବାଙ୍କ ସହ ଏକାଠି କଲେ ଯାତ୍ରା; ତାଲିମ ନେଉଥିବା ଭାରତ ଡ୍ରାଇଭରଙ୍କୁ ବି ଭେଟିଲେ