ନୂଆଦିଲ୍ଲୀ: ଫାଇନାଲରେ ଦକ୍ଷିଣ ଆଫ୍ରିକାକୁ ହରାଇ ପ୍ରଥମ ଥର ମହିଳା ବିଶ୍ଵକପ୍ ଚାମ୍ପିଅନ ହୋଇଛି ଭାରତୀୟ ଦଳ। ସମଗ୍ର ଦେଶରୁ ଖେଳାଳିଙ୍କ ପ୍ରତି ଛୁଟୁଛି ଶୁଭେଚ୍ଛାର ସୂଅ। ଏହି କ୍ରମରେ ୨୦୨୫ ବିଶ୍ୱକପ୍ ବିଜେତା ଟିମ୍ ଇଣ୍ଡିଆର ଖେଳାଳିମାନେ ଖୁବ୍ ଶୀଘ୍ର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭେଟିବେ। ପ୍ରଧାନମନ୍ତ୍ରୀ ମୋଦୀ ନଭେମ୍ବର ୫ ତାରିଖରେ ଭାରତୀୟ ଦଳ ସହିତ ଭୋଜନ କରିପାରନ୍ତି।
ଭାରତୀୟ ଦଳ ଆସନ୍ତାକାଲି ମୁମ୍ବାଇରୁ ଦିଲ୍ଲୀରେ ପହଞ୍ଚିବେ। ଖେଳାଳିମାନେ ଚାର୍ଟର ବିମାନ ଯୋଗେ ଦିଲ୍ଲୀ ଯିବେ ଏବଂ ଆସନ୍ତାକାଲି ଦିଲ୍ଲୀରେ ଅବତରଣ କରିବେ। ଅଷ୍ଟ୍ରେଲିଆ, ଇଂଲଣ୍ଡ ଏବଂ ନ୍ୟୁଜିଲ୍ୟାଣ୍ଡ ପରେ ମହିଳା ଦିନିକିଆ ବିଶ୍ୱକପ୍ ଜିତିବାରେ ଭାରତ ହେଉଛି ଚତୁର୍ଥ ଦେଶ। ବିଜୟ ପରେଡ୍ ସମ୍ପର୍କରେ ବିସିସିଆଇ ସଚିବ କହିଛନ୍ତି ଯେ ଏପର୍ଯ୍ୟନ୍ତ ଏପରି କୌଣସି ଯୋଜନା କରାଯାଇ ନାହିଁ। ସୂଚନା ଅନୁଯାୟୀ, ପ୍ରଧାନମନ୍ତ୍ରୀ ବୁଧବାର ଦିନ ଟିମ୍ ଇଣ୍ଡିଆକୁ ଭେଟିବେ ବୋଲି ବିସିସିଆଇ ଏକ ଆନୁଷ୍ଠାନିକ ନିମନ୍ତ୍ରଣ ପତ୍ର ପାଇଥିବା ବୋର୍ଡ କହିଛି।
ପ୍ରଧାନମନ୍ତ୍ରୀ ମୋଦୀ ଜଣାଇଥିଲେ ଅଭିନନ୍ଦନ
ଭାରତୀୟ ଦଳ ନଭେମ୍ବର ୨ରେ ଫାଇନାଲରେ ଦକ୍ଷିଣ ଆଫ୍ରିକାକୁ ୫୨ ରନ୍ ରେ ପରାସ୍ତ କରି ପ୍ରଥମ ଥର ପାଇଁ ବିଶ୍ୱକପ୍ ଜିତିଥିଲା। ଏହି ଐତିହାସିକ ବିଜୟ ପାଇଁ ଟିମ୍ ଇଣ୍ଡିଆକୁ ଅଭିନନ୍ଦନ ଜଣାଇଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ସେ ଏକ୍ସରେ ଲେଖିଥିଲେ, ମହିଳା ବିଶ୍ୱକପ୍ ୨୦୨୫ର ଫାଇନାଲରେ ଟିମ୍ ଇଣ୍ଡିଆ ପାଇଁ ମହାନ ବିଜୟ। ଫାଇନାଲରେ ଖେଳାଳିମାନଙ୍କ ପ୍ରଦର୍ଶନ ଦକ୍ଷତା ଏବଂ ଆତ୍ମବିଶ୍ୱାସରେ ପରିପୂର୍ଣ୍ଣ ଥିଲା। ଦଳ ଅସାଧାରଣ ଏକତା ଏବଂ ଦୃଢ଼ତା ପ୍ରଦର୍ଶନ କରିଥିଲା। ଆମର ସମସ୍ତ ଖେଳାଳିଙ୍କୁ ଅଭିନନ୍ଦନ। ଏହି ଐତିହାସିକ ବିଜୟ ଭବିଷ୍ୟତର ଚାମ୍ପିଅନମାନଙ୍କୁ ପ୍ରେରଣା ଦେବ।
Also read: ବିଶ୍ୱକପ୍ ତାଲିକାରେ ନ ଥିଲେ ଶେଫାଳୀ, କିନ୍ତୁ ଫାଇନାଲର ହେଲେ ନାୟିକା