କୋଲକାତା: ଆଇପିଏଲ୍ରେ ରେକର୍ଡ ତିଆରି ହୁଏ ଏବଂ ଭାଙ୍ଗିଥାଏ। କିନ୍ତୁ କିଛି ସଫଳତା ଇତିହାସ ପୃଷ୍ଠାରେ ସ୍ୱର୍ଣ୍ଣ ଅକ୍ଷରରେ ଲିପିବଦ୍ଧ ହୋଇ ରହିଯାଏ। ୧୩ ବର୍ଷର ଦୀର୍ଘ ଅପେକ୍ଷା ପରେ କ୍ରିକେଟ୍ ପ୍ରଶଂସକମାନେ ପୁଣି ଥରେ ସମାନ ସଫଳତାର ସାକ୍ଷୀ ହୋଇଛନ୍ତି, ଯାହା ମହାନ ଖେଳାଳି କିରନ୍ ପୋଲାର୍ଡଙ୍କ ସ୍ମୃତିକୁ ଫେରାଇ ଆଣିଛି। ଲକ୍ଷ୍ନୌ ସୁପରଜାଏଣ୍ଟସର ଯୁବ ତାରକା ମୁକୁଲ ଚୌଧୁରୀ କୋଲକାତା ନାଇଟ୍ ରାଇଡର୍ସ ବିପକ୍ଷରେ ଡେଥ୍ ଓଭରରେ ରନର ଝଡ଼ ସୃଷ୍ଟି କରିଛନ୍ତି, ଯାହା ଆଇପିଏଲ୍ ଇତିହାସରେ ପୂର୍ବରୁ କେବଳ ଥରେ ହାସଲ ହୋଇଥିଲା।
ଟାର୍ଗେଟ ପିଛା କରିବା ସମୟରେ ଶେଷ ଓଭରରେ ୫୦ରୁ ଅଧିକ ରନ କରିବା ଏକ ପାହାଡ ଭାଙ୍ଗିବା ଭଳି ସଫଳତାଠାରୁ କମ୍ ନୁହେଁ। ୨୦୧୩ରେ ମୁମ୍ବାଇ ଇଣ୍ଡିଆନ୍ସର କିରନ୍ ପୋଲାର୍ଡ ସନରାଇଜର୍ସ ହାଇଦ୍ରାବାଦ ବିପକ୍ଷରେ ମାତ୍ର ୧୭ଟି ବଲ୍ରେ ୫୭ ରନ କରି ଏକ ଅସମ୍ଭବ ବିଜୟ ହାସଲ କରିଥିଲେ। ସେବେଠାରୁ ଅନେକ କିମ୍ବଦନ୍ତୀ ଫିନିସର ଆସିଛନ୍ତି ଏବଂ ଯାଇଛନ୍ତି। କିନ୍ତୁ ମ୍ୟାଚ୍ ଜିତିବା ପାଇଁ ଡେଥ୍ ଓଭରରେ ୫୦+ ରନ କରିବାର ଏହି ରେକର୍ଡ ଅପରିବର୍ତ୍ତିତ ରହିଛି।
ଇଡେନ୍ ଗାର୍ଡେନ୍ସରେ କୋଲକାତା ବିପକ୍ଷରେ ମୁକୁଲ ଚୌଧୁରୀଙ୍କ ବ୍ୟାଟିଂ ଶୈଳୀ ପୋଲାର୍ଡଙ୍କ ୧୩ ବର୍ଷର ପୁରୁଣା ରେକର୍ଡକୁ ସମକକ୍ଷ କରିଛି। ଚାପକୁ ଖାତିର ନକରି ମୁକୁଲ ଡେଥ୍ ଓଭରରେ ୨୧ବଲ୍ରୁ ୫୨ ରନ୍ କରି ତାଙ୍କ ଦଳକୁ ଶେଷ ବଲ୍ରେ ବିଜୟୀ କରାଇଛନ୍ତି। ଏହା କେବଳ ଏକ ଅର୍ଦ୍ଧଶତକ ନୁହେଁ, ବରଂ ଶାନ୍ତ ଏବଂ ଅବିଶ୍ୱସନୀୟ ପାୱାର-ହିଟିଂର ପ୍ରଦର୍ଶନ ଥିଲା ଯାହା ମୁକୁଲଙ୍କୁ ରାତାରାତି ଆଇପିଏଲ୍ର ନୂତନ ଫିନିସର କରିଛି।
ଶେଷ ଓଭରରେ ୨୧ ବର୍ଷୀୟ ବ୍ୟାଟସମ୍ୟାନ୍ ମୁକୁଲ ଚୌଧୁରୀ ଚମତ୍କାର ବ୍ୟାଟିଂ କରିଥିଲେ। ମାତ୍ର ୨୭ବଲ୍ରୁ ଅପରାଜିତ ୫୪ ରନ୍ କରି ଲକ୍ଷ୍ନୌ ସୁପରଜାଏଣ୍ଟସ୍କୁ ଏକ ସ୍ମରଣୀୟ ବିଜୟ ଦେଇଥିଲେ। ମୁକୁଲ ତାଙ୍କ ଇନିଂସରେ ଦୁଇଟି ଚୌକା ଏବଂ ସାତଟି ଛକା ମାରିଥିଲେ। ଶେଷ ଓଭରରେ ଲକ୍ଷ୍ନୌକୁ ବିଜୟ ପାଇଁ ୧୪ ରନ୍ ଆବଶ୍ୟକ ଥିଲା। ମୁକୁଲ ବୈଭବ ଆରୋରାଙ୍କ ଓଭରରେ ଦୁଇଟି ଛକା ମାରି କୋଲକାତାର ବିଜୟ ଆଶାକୁ ଧୂଳିସାତ୍ କରିଦେଲେ। ବୋଲିଂ ବିଭାଗରେ କୋଲକାତା ପାଇଁ ବୈଭବ ଆରୋରା ଏବଂ ଅନୁକୁଲ ରୟ ଦୁଇଟି ଲେଖାଏଁ ୱିକେଟ୍ ନେଇଥିଲେ। ନାରିନ୍ ଏବଂ କ୍ୟାମେରନ୍ ଗ୍ରୀନ୍ ଗୋଟିଏ ଲେଖାଏଁ ୱିକେଟ୍ ନେଇଥିଲେ।
ଅଧିକ ପଢ଼ନ୍ତୁ: ମହିଳା କହିଲେ- ଆମକୁ ଏଠାରେ ପୋଡ଼ି ଦିଅ ନଚେତ୍ ନୂତନ ଗ୍ରାମ ଦିଅ