କୋଲକାତା: କ୍ରିକେଟର ମହମ୍ମଦ ଶାମିଙ୍କୁ କଲିକତା ହାଇକୋର୍ଟରୁ ଲାଗିଛି ବଡ଼ ଝଟକା। ହାଇକୋର୍ଟ ଶାମିଙ୍କୁ ତାଙ୍କ ପତ୍ନୀ ହାସିନ ଜାହାନ ଏବଂ ଝିଅ ଆୟରାଙ୍କୁ ପ୍ରତି ମାସରେ ୪ ଲକ୍ଷ ଟଙ୍କା ଦେବାକୁ ନିର୍ଦ୍ଦେଶ ଦେଇଛନ୍ତି। ମହମ୍ମଦ ଶାମିଙ୍କୁ ମାସିକ ଭରଣପୋଷଣ ପାଇଁ ଏହି ଟଙ୍କା ଦେବାକୁ ପଡିବ। ଶାମିଙ୍କ ଏହି ମାମଲାର ଶୁଣାଣି ୨୦୨୫ ଏପ୍ରିଲ ୨୧ରେ ହୋଇଥିଲା, ଯାହା ଉପରେ ଆଜି ନିଷ୍ପତ୍ତି ଆସିଛି।

କଲିକତା ହାଇକୋର୍ଟଙ୍କ ନିଷ୍ପତ୍ତି ପରେ ମହମ୍ମଦ ଶାମିଙ୍କୁ ତାଙ୍କ ପତ୍ନୀ ହାସିନ ଜାହାନଙ୍କୁ ଭରଣପୋଷଣ ବାବଦରେ ପ୍ରତି ମାସରେ ୧ ଲକ୍ଷ ୫୦ ହଜାର ଟଙ୍କା  ଦେବାକୁ ପଡ଼ିବ। ଏହା ସହିତ ଝିଅ ଆୟରାଙ୍କୁ ମାସିକ ଖର୍ଚ୍ଚ ବାବଦରେ ୨ ଲକ୍ଷ ୫୦ ହଜାର ଟଙ୍କା ଦେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି।

ମହମ୍ମଦ ଶାମି ଏବଂ ହାସିନ ଜାହାନଙ୍କ ମଧ୍ୟରେ ଏହି ମାମଲା ସାତ ବର୍ଷ ପୁରୁଣା। ହାଇକୋର୍ଟର ନିର୍ଦ୍ଦେଶ ଅନୁଯାୟୀ, ମହମ୍ମଦ ଶାମିଙ୍କୁ ଗତ ସାତ ବର୍ଷର ଖର୍ଚ୍ଚ ମଧ୍ୟ ଦେବାକୁ ପଡିବ। ଶାମିଙ୍କୁ ତାଙ୍କ ସ୍ତ୍ରୀ ଏବଂ ଝିଅକୁ ସାତ ବର୍ଷ ପାଇଁ ପ୍ରତି ମାସରେ ୪ ଲକ୍ଷ ଟଙ୍କା ହିସାବରେ ୩ କୋଟି ୩୬ ଲକ୍ଷ ଟଙ୍କା ଦେବାକୁ ପଡିବ।

କଲିକତା ହାଇକୋର୍ଟ ମଧ୍ୟ ନିମ୍ନ ଅଦାଲତକୁ ଏହି ମାମଲାର ସମାଧାନ ଆଗାମୀ ଛଅ ମାସ ମଧ୍ୟରେ କରିବାକୁ ନିର୍ଦ୍ଦେଶ ଦେଇଛନ୍ତି। ମହମ୍ମଦ ଶାମି ଏବଂ ହାସିନ ଜାହାନ ୨୦୧୪ ଏପ୍ରିଲ ୭ରେ ବିବାହ କରିଥିଲେ। ବିବାହର ପ୍ରାୟ ଗୋଟିଏ ବର୍ଷ ପରେ  ୨୦୧୫ ଜୁଲାଇ ୧୭ରେ ଦୁହେଁ ଏକ ଝିଅକୁ ଜନ୍ମ ଦେଇଥିଲେ, ଯାହାର ନାମ ଆୟରା। ଝିଅ ଆୟରାର ଜନ୍ମ ପରେ ଶାମି ଜାଣିବାକୁ ପାଇଲେ ଯେ ହାସିନ ଜାହାନ ପୂର୍ବରୁ ବିବାହିତ ଏବଂ ତାଙ୍କର ପ୍ରଥମ ବିବାହରୁ ଦୁଇଟି ସନ୍ତାନ ମଧ୍ୟ ଅଛି।

ହସିନ ଜହାନ କ୍ରିକେଟର ଏବଂ ତାଙ୍କ ପରିବାର ଉପରେ ହିଂସାର ଅଭିଯୋଗ ଆଣିଥିଲେ। ଏହା ପରେ, ୨୦୧୮ରୁ ଏହି ମାମଲାର ଶୁଣାଣି କୋର୍ଟରେ ଚାଲିଛି। ଏହି ମାମଲାରେ ଅନେକ ଥର ରାୟ ଆସିଛି, ଯେଉଁଥିରେ ଶାମିଙ୍କୁ ତାଙ୍କ ସ୍ତ୍ରୀ ଏବଂ ଝିଅର ଖର୍ଚ୍ଚ ବହନ କରିବାକୁ ନିର୍ଦ୍ଦେଶ ଦିଆଯାଇଥିଲା। କିନ୍ତୁ ପ୍ରତ୍ୟେକ ଥର ହସିନ ଜାହାନଙ୍କୁ ଟଙ୍କା କମ୍ ମିଳୁଥିଲା ଏବଂ ସେ ଖର୍ଚ୍ଚ ପାଇଁ ଅଧିକ ଟଙ୍କା ଦାବି କରୁଥିଲେ। ଏବେ କଲିକତା ହାଇକୋର୍ଟ ଶାମିଙ୍କୁ ପ୍ରତି ମାସରେ ୪ ଲକ୍ଷ ଟଙ୍କା ଦେବାକୁ ନିର୍ଦ୍ଦେଶ ଦେଇଛନ୍ତି।