ନୂଆଦିଲ୍ଲୀ: ପାକିସ୍ତାନ କ୍ରିକେଟ୍ ଟିମ୍ର ପୂର୍ବତନ ଖେଳାଳି ବାସିତ ଅଲି ନିକଟରେ ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି)ରେ ଭାରତର ପ୍ରଭାବକୁ ନେଇ ଏକ ବଡ଼ ବୟାନ ଦେଇଥିଲେ। ପୂର୍ବତନ କ୍ରିକେଟର ଏହି ଅବସରରେ ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ (ବିସିସିଆଇ)ର ଆଲୋଚନା କରିଥିଲେ। ସେ ଅଭିଯୋଗ ଆଣିଥିଲେ ଯେ, ଆଇସିସିରେ ଭାରତ ପ୍ରଭାବ ଏତେ ବଢ଼ି ଯାଇଛି ଯେ, ଯାହା କହିବ, ତାହା କରିପାରିବ। ବାକି ସଦସ୍ୟ ଦେଶର ରାୟକୁ ଅଣଦେଖା ମଧ୍ୟ କରାଯାଇପାରେ।
ଚାମ୍ପିଅନ୍ସ ଟ୍ରଫି-୨୦୨୫ର ଆୟୋଜନ ଆସନ୍ତା ବର୍ଷ ଫେବ୍ରୁଆରି-ମାର୍ଚ୍ଚରେ ପାକିସ୍ତାନରେ ହେବ। ଏହି ଟୁର୍ଣ୍ଣାମେଣ୍ଟ ପୂର୍ବରୁ ପାକିସ୍ତାନ କ୍ରିକେଟ୍ ବୋର୍ଡ (ପିସିବି) ଅଡୁଆ ସ୍ଥିତିରେ ଅଛି। କାରଣ ଭାରତୀୟ ଟିମ୍ ପାକିସ୍ତାନ ଗସ୍ତ କରିବ ନାହିଁ ବୋଲି ପୂର୍ବରୁ କହିସାରିଛି।
ବିସିସିଆଇ ଭାରତ-ପାକିସ୍ତାନ ମଧ୍ୟରେ ରାଜନୈତିକ ସଂପର୍କକୁ ଦୃଷ୍ଟିରେ ରଖି ଭାରତର ପାକିସ୍ତାନ ଗସ୍ତ ପାଇଁ ପକ୍ଷରେ ନାହିଁ। ବିସିସିଆଇ, ଆଇସିସିରୁ ଚାମ୍ପିଅନ୍ସ ଟ୍ରଫି ୨୦୨୫କୁ ହାଇବ୍ରିଡ ମଡେଲ କରାଇବାକୁ ନେଇ ମତ ରଖିଛି।
ଏହାରି ମଧ୍ୟରେ ଚାମ୍ପିଅନ୍ସ ଟ୍ରଫିର ଆୟୋଜନକୁ ନେଇ ଚାଲିଥିବା ବିବାଦ ମଧ୍ୟରେ ପାକିସ୍ତାନର ପବୂର୍ତନ କ୍ରିକେଟର ବାସିତ ଅଲି ନିଜର ୟୁଟ୍ୟୁବ୍ ଚ୍ୟାନେଲରେ ବିସିସିଆଇ ସଂପର୍କରେ ଆଲୋଚନା କରିଛନ୍ତି। ସେ କହିଛନ୍ତି, ବିସିସିଆଇ ପାଖରେ ଅର୍ଥ ଅଛି। ଏଥି ପାଇଁ ସମସ୍ତ ବୋର୍ଡ ତାଙ୍କର କଥା ଶୁଣନ୍ତି। ଯଦି ସେମାନେ କହିବେ, ଚାମ୍ପିଅନ୍ସ ଟ୍ରଫି ପାକିସ୍ତାନରେ ହେବ, ଅନ୍ୟମାନେ ମଧ୍ୟ ଏହାକୁ ରାଜି ହେବେ।